ഇംഗ്ലണ്ടിനെതിരായ പിങ്ക് ബോള്‍ ടെസ്റ്റില്‍ ഇന്ത്യയ്ക്ക് ജയം. വെറും രണ്ടു ദിവസം കൊണ്ട് ഇംഗ്ലണ്ടിനെ അടിയറവ് പറയിച്ചാണ് ഇന്ത്യ മൂന്നാം ക്രിക്കറ്റ് ടെസ്റ്റില്‍ വിജയം സ്വന്തമാക്കിയത്. ഇംഗീഷ് നിരയ്‌ക്കെതിരെ പത്തു വിക്കറ്റിനാണ് ഇന്ത്യ ജയം നേടിയത്. ഇംഗ്ലണ്ട് ഉയര്‍ത്തിയ 49 റണ്‍സ് വിജയലക്ഷ്യം വിക്കറ്റ് നഷ്ടമില്ലാതെ മറികടന്നു. 15 റണ്‍സെടുത്ത് ശുഭ്മാന്‍ ഗില്ലും 25 റണ്‍സെടുത്ത രോഹിത് ശര്‍മയും ചേര്‍ന്ന് ഇന്ത്യയെ 7.4 ഓവറില്‍ വിജയത്തിലെത്തിച്ചു. സ്‌കോര്‍ ഇംഗ്ലണ്ട്: 112, 81. ഇന്ത്യ: 145, 49 ന് പൂജ്യം

ബാറ്റ്‌സ്മാന്മാരുടെ ശവപ്പറമ്ബായി മാറിയ മൊട്ടേരയിലെ പിച്ചില്‍ സ്പിന്നര്‍മാര്‍ സംഹാര താണ്ഡവമാടിയതോടെ രണ്ട് ദിവസത്തിനുള്ളില്‍ മത്സരത്തിന് പരിസമാപ്തിയായി. ആദ്യ ഇന്നിങ്‌സില്‍ രണ്ടാം ദിനം ബാറ്റിങ് ആരംഭിച്ച ഇന്ത്യ 145 റണ്‍സിന് ഓള്‍ ഔട്ടായി. 33 റണ്‍സിന്റെ ലീഡും ഇന്ത്യ സ്വന്തമാക്കി. രണ്ടാം ഇന്നിങ്‌സില്‍ ഇംഗ്ലണ്ടിനെ വെറും 81 റണ്‍സിന് ഇന്ത്യന്‍ ബൗളര്‍മാര്‍ ചുരുട്ടിക്കെട്ടി. ഇതോടെ ഇന്ത്യയുടെ വിജയലക്ഷ്യം 49 റണ്‍സായി. ഈ വിജയത്തോടെ നാലുമത്സരങ്ങളടങ്ങിയ ടെസ്റ്റ് പരമ്ബരയില്‍ ഇന്ത്യ 21 ന് മുന്നിലെത്തി. നാലാമത്തെ ടെസ്റ്റ് മത്സരത്തില്‍ തോല്‍ക്കാതിരുന്നാല്‍ ഇന്ത്യ ഐസിസി ലോക ടെസ്റ്റ് ചാന്പ്യന്‍ഷിപ്പിന്റെ ഫൈനല്‍ ഉറപ്പിച്ചു.