ഐസിസി ട്വന്റി-20 ക്രിക്കറ്റ് ഫൈനലില്‍ ന്യൂസിലന്‍ഡിനെ എട്ടു വിക്കറ്റിന് തകര്‍ത്ത് ഓസ്‌ട്രേലിയ കിരീടത്തില്‍ മുത്തമിട്ടു. മിച്ചല്‍ മാര്‍ഷിന്റെയും ഡേവിഡ് വാര്‍ണറിന്റെയും വെടിക്കെട്ട് പ്രകടനമാണ് ഓസീസിന് കിരീടം നേടിക്കൊടുത്തത്.


ന്യൂസിലന്‍ഡ് ഉയര്‍ത്തിയ 173 റണ്‍സ് വിജയലക്ഷ്യം 18.5 ഓവറില്‍ മറികടന്നാണ് ഓസ്‌ട്രേലിയ ലോകചന്പ്യന്‍മാരായത്. 50 പന്തില്‍ പുറത്താകാതെ നാല് സിക്‌സും ആറ് ഫോറും ഉള്‍പ്പെടെ 77 റണ്‍സെടുത്ത മിച്ചല്‍ മാര്‍ഷാണ് ഓസീസ് നിരയിലെ ടോപ് സ്‌കോറര്‍. ഡേവിഡ് വാര്‍ണര്‍ 38 പന്തില്‍ 53 റണ്‍സെടുത്തു.

മൂന്നാം ഓവറില്‍ ഓസീസ് നായകന്‍ ആരോണ്‍ ഫിഞ്ചിനെ (5 റണ്‍സ്) വീഴ്ത്താന്‍ സാധിച്ചതു മാത്രമാണ് ന്യൂസിലന്‍ഡിനുണ്ടായ ഏകനേട്ടം. ട്രെന്‍ഡ് ബോള്‍ട്ടാണ് ഫിഞ്ചിനെ പവലിയന്‍ കയറ്റിയത്. പിന്നീട് ക്രീസിലെത്തിയ മിച്ചല്‍ മാര്‍ഷ് വാര്‍ണര്‍ക്കൊപ്പം ചേര്‍ന്ന് ഓസ്‌ട്രേലിയയെ വിജയത്തീരത്തേക്ക് എത്തിച്ചു. 92 റണ്‍സാണ് ഇരുവരും ചേര്‍ന്ന് അടിച്ചുകൂട്ടിയത്. 13-ാം ഓവറില്‍ വാര്‍ണര്‍ ബോള്‍ട്ടിന് മുന്നില്‍ അടിതെറ്റി പവലിയന്‍ കയറുന്‌പോള്‍ ഓസ്‌ട്രേലിയ 107 റണ്‍സിലെത്തിയിരുന്നു.


വാര്‍ണറിനു പിന്നാലെ ക്രീസിലെത്തിയ ഗ്ലെന്‍ മാക്‌സ്വെല്‍ മാര്‍ഷിനോപ്പം ചേര്‍ന്നതോടെ ഓസീസ് വിജയം അനായാസമായി. മാക്‌സ്വെല്‍ 18 പന്തില്‍ 28 റണ്‍സുമായി പുറത്താകാതെ നിന്നു. ബോള്‍ട്ടിനാണ് ഓസീസിന്റെ രണ്ട് വിക്കറ്റും.




ടോസ് നഷ്ടപ്പെട്ട് ആദ്യം ബാറ്റ് ചെയ്ത ന്യൂസിലന്‍ഡ് നിശ്ചിത ഓവറില്‍ നാല് വിക്കറ്റ് നഷ്ടത്തില്‍ 172 റണ്‍സെടുത്തത്. നായകന്‍ കെയ്ന്‍ വില്യംസണിന്റെ തകര്‍പ്പന്‍ അര്‍ധ സെഞ്ചുറിയാണ് ന്യൂസിലന്‍ഡിനെ മികച്ച നിലയിലെത്തിച്ചത്. 48 പന്തില്‍ മൂന്ന് സിക്‌സും പത്ത് ഫോറും ഉള്‍പ്പെടെ 85 റണ്‍സാണ് വില്യംസണ്‍ അടിച്ചുകൂട്ടിയത്.

എട്ട് പന്തില്‍ 11 റണ്‍സെടുത്ത ഡാരില്‍ മിച്ചലിനെയാണ് ന്യൂസിലന്‍ഡിന് ആദ്യം നഷ്ടമായത്. പിന്നീട് ക്രീസിലെത്തിയ നായകന്‍ വില്യംസണ്‍ ഗപ്റ്റിലുമായി ചേര്‍ന്ന് ന്യൂസിലന്‍ഡ് സ്‌കോര്‍ ഉയര്‍ത്തി. ഇതിനിടെ 35 പന്തില്‍ 28 റണ്‍സുമായിനിന്ന ഗപ്റ്റിലെ സാന്പ പവലിയന്‍ കയറ്റി. ഇതോടെ ക്രീസില്‍ നങ്കുരമുറപ്പിച്ച വില്യംസണ്‍ സ്‌കോര്‍ വേഗത്തിലാക്കി. ഇതിനിടെ ഗ്ലെന്‍ ഫിലിപ്‌സിനെയും (17 പന്തില്‍ 18) കിവീസിന് നഷ്ടമായി.