ദക്ഷിണാഫ്രിക്കയ്ക്ക് രണ്ടാം ഇന്നിങ്‌സില്‍ മൂന്ന് വിക്കറ്റ് നഷ്ടം.... നേരത്തേ ദക്ഷിണാഫ്രിക്കയെ 55 റണ്‍സില്‍ ഒതുക്കി മറുപടി ബാറ്റിങ്ങിനിറങ്ങിയ ഇന്ത്യയെ 153 റണ്‍സില്‍ ദക്ഷിണാഫ്രിക്കന്‍ ബൗളര്‍മാര്‍ വരിഞ്ഞുകെട്ടി. രണ്ടാം ഇന്നിങ്‌സ് ആരംഭിച്ച ദക്ഷിണാഫ്രിക്ക സ്റ്റമ്പെടുക്കുമ്പോള്‍ മൂന്ന് വിക്കറ്റ് നഷ്ടത്തില്‍ 62 റണ്‍സെടുത്തു. ഇന്ത്യക്ക് 36 റണ്‍സ് ലീഡ്. 36 റണ്‍സുമായി എയ്ഡന്‍ മാര്‍ക്രമും ഏഴ് റണ്‍സുമായി ബെഡിങ്ഹാമുമാണ് ക്രീസില്‍.

ഒന്നാം ഇന്നിങ്‌സില്‍ വിരാട് കോലിയും ക്യാപ്റ്റന്‍ രോഹിത് ശര്‍മയും ശുഭ്മാന്‍ ഗില്ലും മാത്രമാണ് ഇന്ത്യന്‍ നിരയില്‍ രണ്ടക്കം കടന്നത്. കെ.എല്‍. രാഹുല്‍ എട്ട് റണ്‍സെടുത്തു. ബാക്കിയെല്ലാവരും പൂജ്യത്തിന് പുറത്തായി. 34ാം ഓവര്‍ എറിയാനെത്തുമ്പോള്‍ 153ല്‍ നാല് എന്ന നിലയിലായിരുന്നു ഇന്ത്യ. പിന്നീട് 34.5 ഓവര്‍ പൂര്‍ത്തിയായപ്പോള്‍ അതേ സ്‌കോറില്‍ ബാക്കിയുള്ളവരെല്ലാം മടങ്ങി. അവസാന അഞ്ചുപേര്‍ മടങ്ങിയത് പൂജ്യത്തിന്. അവസാന ആറ് വിക്കറ്റുകള്‍ പോയത് റണ്ണൊന്നും ചേര്‍ക്കാന്‍ കഴിയാതെയാണ്. ഫലത്തില്‍ 153ല്‍ത്തന്നെ ഇന്ത്യയുടെ ഇന്നിങ്‌സ് അവസാനിക്കുകയായിരുന്നു.

അങ്ങേയറ്റം ദുഷ്‌കരമായ പിച്ചില്‍ 98 റണ്‍സ് ലീഡ് നേടിയെന്നതില്‍ ഇന്ത്യക്ക് ആശ്വസിക്കാനാകും. 46 റണ്‍സ് നേടിയ വിരാട് കോലിയാണ് ഇന്ത്യന്‍ നിരയില്‍ ടോപ് സ്‌കോറര്‍. 43 പന്തില്‍ 39 റണ്‍സെടുത്ത് രോഹിത് ശര്‍മയും 55 പന്തില്‍നിന്ന് 36 റണ്‍സെടുത്ത് ശുഭ്മാന്‍ ഗില്ലും രണ്ടക്കം കടന്നിരുന്നു. നാന്ദ്രെ ബര്‍ഗറിന്റെ പന്തുകളില്‍ മാര്‍ക്കോ ജാന്‍സന് ക്യാച്ച് നല്‍കിയാണ് ഇരുവരും മടങ്ങിയത്. റണ്ണൊന്നുമെടുക്കാനായി അനുവദിക്കാതെ ശ്രേയസ് അയ്യരെയും ബര്‍ഗര്‍ തന്നെയാണ് പുറത്താക്കിയത്.

ബൗളര്‍മാരുടെ ടെസ്റ്റായിരുന്നു ഇന്നലെ കണ്ടത്. ദക്ഷിണാഫ്രിക്കയുടെ ആറുപേരെ മടക്കിയയച്ച് മുഹമ്മദ് സിറാജാണ് ആദ്യം താരമായത്. ഇന്ത്യന്‍ ബാറ്റര്‍മാരുടെ വിക്കറ്റുകള്‍ ദക്ഷിണാഫ്രിക്കന്‍ ബൗളര്‍മാര്‍ പങ്കിട്ടെടുത്തു. കഗിസോ റബാദ (മൂന്ന്), ലുങ്കി എങ്കിടി (മൂന്ന്), നാന്ദ്രെ ബര്‍ഗര്‍ (മൂന്ന്) എന്നിവര്‍ക്കാണ് വിക്കറ്റുകള്‍. റണ്ണൗട്ടായി മുഹമ്മദ് സിറാജ്.