ഓസ്‌ട്രേലിയയ്‌ക്കെതിരായ ട്വന്റി 20 പരമ്പരയിലെ ആദ്യ മത്സരത്തില്‍ ഇന്ത്യന്‍ വനിതകള്‍ക്ക് 9 വിക്കറ്റിന്റെ തകര്‍പ്പന്‍ ജയം. ഓസീസ് വനിതകളുയര്‍ത്തിയ 142 റണ്‍സ് വിജയലക്ഷ്യം 14 പന്തുകള്‍ ബാക്കി നില്‍ക്കേ ഇന്ത്യ മറികടക്കുകയും ചെയ്തു.

ടോസ് നേടിയ ഇന്ത്യ ഓസ്‌ട്രേലിയയെ ബാറ്റിങ്ങിന് അയക്കുകയായിരുന്നു. തകര്‍പ്പന്‍ പ്രകടനവുമായി കളംനിറഞ്ഞ ടൈറ്റസ് സദ്ധുവിന്റെ ബോളിങ് മികവിനു മുന്നില്‍ ഓസീസ് ബാറ്റിങ് നിര തകര്‍ന്നടിഞ്ഞു.

49 റണ്‍സ് നേടിയ ഫോബി ലിച്ഫീല്‍ഡാണ് ഓസീസിന്റെ ടോപ് സ്‌കോറര്‍. 4 ഓവറില്‍ 17 റണ്‍സ് വഴങ്ങി നാലു മുന്‍നിര വിക്കറ്റുകള്‍ പിഴുത സദ്ധുവാണ് കളിയിലെ താരം. മറുപടി ബാറ്റിങ്ങില്‍ ഇന്ത്യന്‍ വനിതകള്‍ തുടക്കം മുതല്‍ തകര്‍ത്തടിച്ചു.

ആദ്യ വിക്കറ്റില്‍ സ്മൃതി മന്ഥനയും (54) ഷഫാലി വര്‍മയും (64*) ചേര്‍ന്ന് 15.2 ഓവറില്‍ 131 റണ്‍സ് നേടി. സ്മൃതി മന്ഥന പുറത്തായതിനു പിന്നാലെയെത്തിയ ജെമീമ റോഡ്രിഗസ് (6*) ഷഫാലിക്ക് പിന്തുണ നല്‍കി ഉറച്ചു നിന്നതോടെ ഇന്ത്യ 17.4 ഓവറില്‍ വിജയലക്ഷ്യത്തിലെത്തി. സ്‌കോര്‍: ഓസ്‌ട്രേലിയ 19.2 ഓവറില്‍ 141ന് പുറത്ത്, ഇന്ത്യ 7.4 ഓവറില്‍ 1ന് 145. ജയത്തോടെ ഇന്ത്യ പരമ്പരയില്‍ 1-0ന് മുന്നിലെത്തി. മൂന്നു മത്സര പരമ്പരയിലെ രണ്ടാം മത്സരം നാളെ നടക്കും.