ആദ്യ ട്വന്റിയില്‍ നേടിയ ജയം തുടരാന്‍ ഇന്ത്യന്‍ പെണ്‍കൊടികള്‍ ഇന്നിറങ്ങുന്നു. ട്വന്റി20 പരമ്പരയിലെ രണ്ടാം മത്സരം ജയിച്ച് പരമ്പര സ്വന്തമാക്കലാണ് ആതിഥേയര്‍ക്കു മുന്നിലുള്ള ലക്ഷ്യം.


നേരത്തെ ഏകദിന പരമ്പരയില്‍ 30ന് തോല്‍വി വഴങ്ങിയ ക്ഷീണവുമായി കുട്ടിക്രിക്കറ്റിലെ ആദ്യ അങ്കത്തിനിറങ്ങിയ ടീം ഒമ്പതു വിക്കറ്റിന് കളി ജയിച്ചിരുന്നു. ടോസ് നേടി ഫീല്‍ഡിങ് തെരഞ്ഞെടുത്ത ടീം ടിറ്റസ് സാധു നയിച്ച പ്രകടനവുമായി എതിരാളികളെ 141 റണ്‍സിന് എറിഞ്ഞിട്ടു. താരതമ്യേന ചെറിയ ടോട്ടല്‍ ലക്ഷ്യമിട്ടിറങ്ങിയ ഇന്ത്യ ഷെഫാലി വര്‍മസ്മൃതി വര്‍മ കൂട്ടുകെട്ടില്‍ അനായാസ ജയം ഉറപ്പിക്കുകയായിരുന്നു.


സ്മൃതി 54 റണ്‍സെടുത്ത് മടങ്ങിയപ്പോള്‍ 64 റണ്‍സുമായി ഷെഫാലി പുറത്താകാതെ നിന്നു. ആസ്‌ട്രേലിയക്കെതിരെ ഇന്ത്യയുടെ ഏറ്റവും മികച്ച ഓപണിങ് കൂട്ടുകെട്ട് പടുത്തുയര്‍ത്തിയാണ് ഇരുവരും ചേര്‍ന്ന് ടീമിനെ ജയത്തിനരികെയെത്തിച്ചത്.

19കാരിയായ സാധു 17 റണ്‍സ് മാത്രം വഴങ്ങി നാലു വിക്കറ്റുകള്‍ വീഴ്ത്തി. ദീപ്തി ശര്‍മ, ശ്രേയങ്ക പാട്ടീല്‍ എന്നിവര്‍ രണ്ടുവീതം വിക്കറ്റെടുത്ത് മികച്ച കൂട്ടുനല്‍കി. മറുവശത്ത്, ഓസീസ് നിരയില്‍ ഫീബ് ലിച്ച്ഫീല്‍ഡ് 49 റണ്‍സെടുത്ത് ഓസീസ് നിരയില്‍ കരുത്തുകാട്ടുകയും ചെയ്തു. കാര്യമായ മാറ്റങ്ങളില്ലാതെയാകും ആതിഥേയര്‍ ഇന്ന് ഇറങ്ങുക.