ഇന്ത്യ അഫ്ഗാനിസ്ഥാന്‍ ടി20 പരമ്പരയ്ക്ക് ഇന്ന് തുടക്കമാവും... മലയാളിതാരം സഞ്ജു സാംസണ്‍ ഇലവനിലെത്താന്‍ സാധ്യത
ഇന്ത്യ അഫ്ഗാനിസ്ഥാന്‍ ടി20 പരമ്പരയ്ക്ക് ഇന്ന് തുടക്കമാവും. മൊഹാലിയിലെ ഐഎസ് ബിന്ദ്ര സ്‌റ്റേഡിയത്തില്‍ വൈകിട്ട് ഏഴ് മണിക്കാണ് മത്സരം. 14 മാസത്തെ ഇടവേളയ്ക്ക് ശേഷം ടി20 ടീമിലേക്ക് തിരിച്ചെത്തിയ ക്യാപ്റ്റന്‍ രോഹിത് ശര്‍മ്മയും വിരാട് കോലിയും ലോകകപ്പിലും ഇന്ത്യന്‍ നിരയിലുണ്ടാവുമെന്ന് ഏറക്കുറെ ഉറപ്പായി.
വ്യക്തിപരമായ കാരണങ്ങളാല്‍ കോലി ഇന്ന് കളിക്കുന്നില്ല. രോഹിത്ത് വിട്ടുനിന്നപ്പോള്‍ ഇന്ത്യയെ നയിച്ച ഹാര്‍ദിക് പണ്ഡ്യയും സൂര്യകുമാര്‍ യാദവും പരിക്കേറ്റ് പുറത്താണ്. കെ എല്‍ രാഹുല്‍ രവീന്ദ്ര ജഡേജ, ഇഷാന്‍ കിഷന്‍ എന്നിവരും ടീമിലില്ല. രോഹിത്തിനൊപ്പം യശസ്വീ ജയ്‌സ്വാള്‍ ഓപ്പണാറായെത്തും. വിക്കറ്റ് കീപ്പറായി ജിതേഷ് ശര്‍മ്മ ടീമിലുണ്ടെങ്കിലും മലയാളിതാരം സഞ്ജു സാംസണ്‍ ഇലവനിലെത്താനാണ് സാധ്യത.
തിലക് വര്‍മ്മ, റിങ്കു സിംഗ് എന്നിവര്‍ക്ക് ലോകകപ്പ് ടീമില്‍ സ്ഥാനം ഉറപ്പിക്കാനുള്ള അവസരം കൂടിയാണ് അഫ്ഗാനെതിരായ പരമ്പര. ജസ്പ്രീത് ബുമ്ര, മുഹമ്മദ് സിറാജ് എന്നിവര്‍ക്ക് വിശ്രമം നല്‍കിയതിനാല്‍ പേസ് നിരയിലുള്ളത് അര്‍ഷ്ദീപ്, ആവേശ് ഖാന്, മുകേഷ് കുമാര്‍ എന്നിവ!ര്‍. വാഷിംഗ്ടണ്‍ സുന്ദര്‍, അക്‌സര്‍ പട്ടേല്‍, രവി ബിഷ്‌ണോയ്, കുല്‍ദീപ് യാദവ് എന്നിവരാണ് സ്പിന്നര്‍മാര്‍.
ഇന്ത്യ വേദിയായ ഏകദിന ലോകകപ്പിലെ മികച്ച പ്രകടനത്തിന്റെ ആത്മ വിശ്വാസവുമായാണ് അഫ്ഗാനിസ്ഥാന്‍ ഇറങ്ങുന്നത്. പരിക്കില്‍ നിന്ന് മുക്തനായ റാഷിദ് ഖാന് ടീമില്‍ തിരിച്ചെത്തിയെങ്കിലും പരമ്പരയില്‍ കളിക്കില്ല. ശക്തമായ മഞ്ഞുവീഴ്ചയുള്ളതിനാല്‍ ടോസ് നേടുന്നവര്‍ ബൌളിംഗ് തെരഞ്ഞെടുത്തേക്കും.
https://www.facebook.com/Malayalivartha
