ടെസ്റ്റ് ക്രിക്കറ്റില്‍ അതിവേഗം 150 വിക്കറ്റ് നേട്ടം കൈവരിക്കുന്ന ഇന്ത്യന്‍ താരമായി പേസര്‍ ജസ്പ്രീത് ബുംറ. വിശാഖപട്ടണത്ത് ഇംഗ്ലണ്ടിനെതിരായ രണ്ടാം ടെസ്റ്റിന്റെ രണ്ടാം ദിനം ഇംഗ്ലണ്ട് നായകന്‍ ബെന്‍ സ്‌റ്റോക്‌സിനെ പുറത്താക്കിയാണ് 30കാരനായ ബുംറ റെക്കോഡ് ബുക്കില്‍ ഇടംപിടിച്ചത്.

50ാം ഓവറിലെ രണ്ടാം പന്തില്‍ 47 റണ്‍സെടുത്ത സ്‌റ്റോക്‌സിനെ താരം ക്ലീന്‍ ബൗള്‍ഡാക്കുകയായിരുന്നു. 34 ടെസ്റ്റുകളിലാണ് 150 വിക്കറ്റ് നേട്ടം സ്വന്തമാക്കിയത്. ഇന്ത്യന്‍ ടെസ്റ്റ് ക്രിക്കറ്റ് ചരിത്രത്തില്‍ 35ല്‍ കുറവ് മത്സരങ്ങള്‍ കളിച്ച് ഈ നേട്ടത്തിലെത്തുന്ന ആദ്യ ഇന്ത്യന്‍ താരം കൂടിയാണ് ബുംറ.

എറിഞ്ഞ പന്തുകള്‍ നോക്കുമ്പോള്‍, 6781 ബാളുകളിലാണ് താരം നേട്ടത്തിലെത്തിയത്. 7661 ബാളുകളില്‍ 150 വിക്കറ്റ് നേടിയ ഉമേഷ് യാദവാണ് രണ്ടാമത്. മുഹമ്മദ് ഷമിയും (7755 ബാളുകളില്‍) കപില്‍ ദേവുമാണ് (8378 ബാളുകളില്‍) യഥാക്രമം മൂന്നും നാലും സ്ഥാനങ്ങളിലാണ്.


2018ല്‍ ദക്ഷിണാഫ്രിക്കക്കെതിരെയാണ് ബുംറ ടെസ്റ്റ് അരങ്ങേറ്റം കുറിച്ചത്. 34 ടെസ്റ്റുകളില്‍ 64 ഇന്നിങ്‌സുകളില്‍നിന്നായി താരത്തിന്റെ വിക്കറ്റ് നേട്ടം 152 ആയി. ബുംറയുടെ മാജിക്ക് ബൗളിങ്ങാണ് രണ്ടാം ടെസ്റ്റിലെ ഒന്നാം ഇന്നിങ്‌സില്‍ ഇംഗ്ലണ്ട് ബാറ്റിങ്ങിന്റെ നട്ടെല്ലൊടിച്ചത്. 15.5 ഓവറില്‍ 45 റണ്‍സ് മാത്രം വഴങ്ങി ആറു വിക്കറ്റുകളാണ് താരം വീഴ്ത്തിയത്. അഞ്ച് മെയ്ഡന്‍ ഓവറുകളും എറിഞ്ഞു. മത്സരത്തില്‍ ഒലീ പോപ്പിനെ ക്ലീന്‍ ബൗള്‍ഡാക്കിയ ബുംറയുടെ യോര്‍ക്കര്‍ കണ്ട് അദ്ഭുതപ്പെട്ടിരിക്കുകയാണ് ക്രിക്കറ്റ് ലോകം. 55 പന്തില്‍ 23 റണ്‍സെടുത്ത് നില്‍ക്കെയാണ് ബുംറയുടെ അത്യുജ്വല ഇന്‍സ്വിങ് യോര്‍ക്കറില്‍ പോപ്പ് ക്ലീന്‍ ബൗള്‍ഡാകുന്നത്.