ടെസ്റ്റ് ക്രിക്കറ്റില് ഇംഗ്ലണ്ടിനെതിരെ ഏറ്റവും കൂടുതല് വിക്കറ്റുകള് നേടിയ ഇന്ത്യക്കാരന് എന്ന റെക്കോഡ് സ്വന്തമാക്കി അശ്വിന്
രണ്ടാം ടെസ്റ്റില്, ഇന്ത്യന് ബോളര്മാരുടെ മിന്നുന്ന പ്രകടനത്തിനാണ് ക്രിക്കറ്റ് ആരാധകര് സാക്ഷിയായത്. മത്സരത്തില് 9 വിക്കറ്റു നേടിയ ജസ്പ്രീത് ബുമ്ര കളിയിലെ താരമായപ്പോള് രണ്ടാം ഇന്നിങ്സില് സ്പിന്നര്മാരുടെ പ്രകടനവും നിര്ണായകമായി.
ഇന്ത്യയുടെ 106 റണ്സ് വിജയത്തില് മൂന്നു മുന്നിര വിക്കറ്റുകള് പിഴുത സ്പിന്നര് ആര്.അശ്വിന്റെ ബോളിങ് പ്രകടനം എടുത്തുപറയേണ്ടതാണ്. ബെന് ഡക്കറ്റ്, ഒലി പോപ്പ്, ജോ റൂട്ട് എന്നിവരുടെ വിക്കറ്റാണ് അശ്വിന് പിഴുതത്.മത്സരത്തിനിടെ ശ്രദ്ധേയമായ മറ്റൊരു റെക്കോര്ഡു കൂടി അശ്വിന് മറികടന്നു.
ടെസ്റ്റ് ക്രിക്കറ്റില് ഇംഗ്ലണ്ടിനെതിരെ ഏറ്റവും കൂടുതല് വിക്കറ്റുകള് നേടിയ ഇന്ത്യക്കാരന് എന്ന റെക്കോഡാണ് അശ്വിന് സ്വന്തമാക്കിയത്. ഇന്ത്യയുടെ മുന് ലെഗ് സ്പിന്നര് ബി.എസ്.ചന്ദ്രശേഖറിന്റെ പേരിലുള്ള റെക്കോഡാണ് അശ്വിന് മറികടന്നത്.
ടെസ്റ്റില് ഇംഗ്ലണ്ടിനെതിരെ 95 വിക്കറ്റാണ് ചന്ദ്രശേഖര് നേടിയിട്ടുള്ളത്. ഒലി പോപ്പ് അശ്വിന്റെ 96ാമത്തെ ഇംഗ്ലിഷ് വിക്കറ്റ് ആയിരുന്നു. പിന്നാലെ ജോ റൂട്ടിനെ കൂടി അശ്വിന് പുറത്താക്കി. അനില് കുംബ്ലെയാണ് (92) ഈ പട്ടികയിലെ മൂന്നാമന്.
അതേസമയം, ഇന്ന് അവസാനിച്ച ടെസ്റ്റില് നാലു വിക്കറ്റ് നേടിയിരുന്നെങ്കില് കുംബ്ലെയ്ക്കു ശേഷം ടെസ്റ്റില് 500 വിക്കറ്റ് നേടുന്ന രണ്ടാമത്തെ ഇന്ത്യന് താരമെന്ന നേട്ടം അശ്വിന് സ്വന്തമാക്കാമായിരുന്നു. എന്നാല് മൂന്നു വിക്കറ്റില് ഒതുങ്ങിയതോടെ ആകെ ടെസ്റ്റ് വിക്കറ്റുകള് 499 ആയി. ടെസ്റ്റില് 500നു മുകളില് വിക്കറ്റ് നേടിയിട്ടുള്ള താരങ്ങളാണ് മുത്തയ്യ മുരളീധരന് (ശ്രീലങ്ക), ഗ്ലെന് മഗ്രോ, ഷെയ്ന് വോണ്, നേഥന് ലയോണ് (ഓസ്ട്രേലിയ), കോട്നി വാല്ഷ് (വെസ്റ്റ്ഇന്ഡീസ്), സ്റ്റുവര്ട്ട് ബ്രോഡ്, ജയിംസ് ആന്ഡേഴ്സന് (ഇംഗ്ലണ്ട്) .
"
https://www.facebook.com/Malayalivartha