ന്യൂസിലന്‍ഡിനെതിരായ ടെസ്റ്റ് ക്രിക്കറ്റ് പരമ്പര ഓസ്‌ട്രേലിയയ്ക്ക്. ഏകദിനംപോലെ ആവേശകരമായ രണ്ടാംടെസ്റ്റില്‍ മൂന്നു വിക്കറ്റിനാണ് ജയം. ആദ്യ ടെസ്റ്റ് 172 റണ്ണിന് ജയിച്ചിരുന്നു. സ്‌കോര്‍: ന്യൂസിലന്‍ഡ് 162, 372; ഓസ്‌ട്രേലിയ 256, 281/7.

വിക്കറ്റ്കീപ്പര്‍ അലക്‌സ് കാരിയുടെ തകര്‍പ്പന്‍ പ്രകടനമാണ് ഒരുദിവസം ബാക്കിയിരിക്കെ ഓസീസിന് വിജയത്തിലേക്ക് നയിച്ചത്. പുറത്താകാതെ നിന്ന കീപ്പര്‍, 15 ഫോറടിച്ച് 123 പന്തില്‍ 98 റണ്ണുമായി കളിയിലെ താരമായി. 102 പന്തില്‍ 80 റണ്ണടിച്ച മിച്ചല്‍ മാര്‍ഷ് മികച്ച പിന്തുണ നല്‍കി.

10 ഫോറും ഒരു സിക്‌സറുമാണ് മാര്‍ഷിന്റെ സമ്പാദ്യം. ഇരുവരും ചേര്‍ന്ന് ആറാംവിക്കറ്റില്‍ എടുത്ത 140 റണ്‍ വിജയത്തില്‍ നിര്‍ണായകമായി. ക്യാപ്റ്റന്‍ പാറ്റ് കമ്മിന്‍സ് 44 പന്തില്‍ 32 റണ്ണുമായി അലക്‌സിന്റെ വിജയക്കൂട്ടായി. ഇവര്‍ 61 റണ്‍ കൂട്ടിച്ചേര്‍ത്തു. നാലാംദിനം ബാറ്റിങ്ങിന് ഇറങ്ങുമ്പോള്‍ ഓസീസിന് ജയിക്കാന്‍ 202 റണ്‍കൂടി വേണ്ടിയിരുന്നു.

279 റണ്‍ വിജയലക്ഷ്യവുമായി ഇറങ്ങി 77 റണ്‍ എടുക്കുന്നതിനിടെ നാലു വിക്കറ്റ് നഷ്ടവുമായാണ് മൂന്നാംദിവസം കളി അവസാനിപ്പിച്ചത്. ട്രാവിസ് ഹെഡാണ് (18) ആദ്യം വീണത്. മാര്‍ഷിന് കൂട്ടായി അലക്‌സ് എത്തിയതോടെ വിജയപ്രതീക്ഷയായി.

എന്നാല്‍, മാര്‍ഷിനെയും റണ്ണെടുക്കും മുമ്പ് സ്റ്റാര്‍ക്കിനെയും വീഴ്ത്തി കിവീസ് കളി പിടിച്ചെന്ന് കരുതിയതാണ്. എന്നാല്‍, അലക്‌സിനൊപ്പം ചേര്‍ന്ന കമ്മിന്‍സിനെ പിരിക്കാന്‍ കഴിഞ്ഞില്ല. ന്യൂസിലന്‍ഡിനായി ബെന്‍ സിയേര്‍സ് നാലു വിക്കറ്റെടുത്തു. രണ്ടു ടെസ്റ്റില്‍ 17 വിക്കറ്റെടുത്ത പേസര്‍ മാറ്റ് ഹെന്റിയാണ് പരമ്പരയിലെ താരം.