ലോക അത്ലറ്റിക് ചാമ്പ്യന്‍ഷിപ്പ് പുരുഷ ലോംഗ്ജംപില്‍ മലയാളി താരം മുരളി ശ്രീശങ്കറിന് മെഡലില്ല. 7.96 മീറ്റര്‍ ദൂരം പിന്നിട്ട ശ്രീശങ്കര്‍ ഏഴാമനായി. ആദ്യ ശ്രമത്തിലാണ് ശ്രീ 7.96 മീറ്റര്‍ ചാടിയത്. പിന്നീടുള്ള ചാട്ടങ്ങളില്‍ 7.89 മീ, 7.83 മീ. ദൂരമാണ് കണ്ടെത്താനായത്.

മലയാളി താരത്തിന്റെ ആറു ശ്രമങ്ങളില്‍ മൂന്നും ഫൗളായി. സീസണില്‍ സ്ഥിരതയാര്‍ന്ന പ്രകടനം കാഴ്ചവച്ച ശ്രീശങ്കര്‍, ഏപ്രിലില്‍ നടന്ന ഫെഡറേഷന്‍ കപ്പില്‍ 8.36 മീറ്റര്‍ പിന്നിട്ടിരുന്നു. ഇതിനുശേഷം ഗ്രീസില്‍ നടന്ന ചാമ്പ്യന്‍ഷിപ്പില്‍ 8.31 മീറ്ററും ഇന്റര്‍ സ്റ്റേറ്റ് ചാന്പ്യന്‍ഷിപ്പില്‍ 8.23 മീറ്ററും ശ്രീശങ്കര്‍ താണ്ടി. മെഡല്‍ ഉറപ്പായിരുന്ന ഈ പ്രകടനം ശ്രീശങ്കറിന് ആവര്‍ത്തിക്കാനായില്ല.

8.36 മീറ്റര്‍ ദൂരം ചാടിയ ചൈനയുടെ ജിയാന്‍ വാംഗ് സ്വര്‍ണം നേടി. അവസാന ശ്രമത്തിലാണ് വാംഗ് സ്വര്‍ണച്ചാട്ടം നടത്തിയത്. ഗ്രീസിന്റെ മില്‍റ്റിയാഡിസ് ടെന്റോഗ്ലോ 8.32 മീറ്റര്‍ ചാടി വെള്ളി കരസ്ഥമാക്കി. സ്വിറ്റ്‌സര്‍ലന്‍ഡിന്റെ സൈമണ്‍ ഇഹാമറിന്‍ (8.16 മീറ്റര്‍) വെങ്കലം കരസ്ഥമാക്കി.