ലോക അത്ലറ്റിക്സ് ചാമ്പ്യന്‍ഷിപ്പില്‍ ഓസ്ട്രേലിയക്കായി ചരിത്രമെഴുതി വനിതാ ഹൈജമ്പ് താരം എലെനര്‍ പാറ്റേഴ്സണ്‍....
ലോക അത്ലറ്റിക്സ് ചാമ്പ്യന്‍ഷിപ്പില്‍ ഓസ്ട്രേലിയക്കായി ചരിത്രമെഴുതി വനിതാ ഹൈജമ്പ് താരം എലെനര്‍ പാറ്റേഴ്സണ്‍. 2.02 മീറ്റര്‍ മറികടന്ന് പാറ്റേഴ്സണ്‍ സ്വര്‍ണ മെഡല്‍ സ്വന്തമാക്കിയപ്പോള്‍ അത് ലോക ചാമ്പ്യന്‍ഷിപ്പില്‍ ഓസ്ട്രേലിയയുടെ ആദ്യ ഹൈജമ്പ് മെഡലായി.
ഇരുപത്തിയാറുകാരിയായ താരത്തിന്റെ കരിയറിലെ മികച്ച വ്യക്തിഗത പ്രകടനം കൂടിയാണിത്. 1.98 മീറ്റര്‍ ഉയരം മൂന്നാം ശ്രമത്തില്‍ മാത്രം മറികടന്ന താരം കരിയറില്‍ ആദ്യമായി രണ്ടു മീറ്റര്‍ രണ്ടാമത്തെ ശ്രമത്തിലാണ് മറികടന്നത്.
പിന്നാലെ എല്ലാവരേയും ഞെട്ടിച്ചുകൊണ്ട് 2.02 മീറ്റര്‍ ഉയരം ആദ്യ ശ്രമത്തില്‍ തന്നെ മറികടന്ന പാറ്റേഴ്സണ്‍ ചരിത്രം രചിക്കുകയായിരുന്നു.
ലോക ചാമ്പ്യന്‍ഷിപ്പില്‍ സ്വര്‍ണ മെഡല്‍ നേടുന്ന പത്താമത്തെ ഓസ്ട്രേലിയന്‍ താരം കൂടിയാണ് പാറ്റേഴ്സണ്‍.
ഇതോടെ അതുവരെ തകര്‍പ്പന്‍ പ്രകടനം കാഴ്ചവെച്ച യുക്രൈന്റെ യാരോസ്ലാവ മഹുചിക് വെള്ളി മെഡലില്‍ ഒതുങ്ങി. 1.98 മീറ്റര്‍ വരെ ആദ്യ ശ്രമത്തില്‍ തന്നെ മറികടന്ന മഹുചിക്, രണ്ടു മീറ്റര്‍ രണ്ടാം ശ്രമത്തില്‍ തന്നെ മറികടന്നു. എന്നാല്‍ ആദ്യ ശ്രമത്തില്‍ തന്നെ 2.02 മീറ്റര്‍ മറികടക്കാനാകാതിരുന്നതോടെയാണ് താരം വെള്ളി മെഡലില്‍ ഒതുങ്ങിപ്പോയത്. 2.04 മീറ്റര്‍ മറികടക്കാന്‍ മൂന്നു ശ്രമങ്ങളിലും പാറ്റേഴ്സണും മഹുചികിനും സാധിച്ചില്ല. രണ്ടു മീറ്റര്‍ മറികടന്ന ഇറ്റലിയുടെ എലെന വല്ലോര്‍ടിഗാര വെങ്കലം നേടി.
"
https://www.facebook.com/Malayalivartha
