നീണ്ട ഇടവേളയ്ക്കുശേഷം കമ്യൂണിറ്റി ഷീല്‍ഡില്‍ കിരീടം നേടി ലിവര്‍പൂള്‍...പതിനാറു വര്‍ഷത്തെ ഇടവേളക്ക് ശേഷമാണ് കമ്യൂണിറ്റി ഷീല്‍ഡില്‍ ലിവര്‍പൂള്‍ കിരീടം നേടിയത്.

ശനിയാഴ്ച കിങ് പവര്‍ സ്റ്റേഡിയത്തില്‍ നടന്ന മത്സരത്തില്‍ പ്രീമിയര്‍ ലീഗ് ചാമ്പ്യന്മാരായ മാഞ്ചസ്റ്റര്‍ സിറ്റിയെ 3-1നാണ് തകര്‍ത്തത്. ട്രെന്റ് അലക്സാണ്ടര്‍ അര്‍നോള്‍ഡ്, മുഹമ്മദ് സലാഹ്, ഡാര്‍വിന്‍ നൂനെസ് എന്നിവരാണ് ലിവര്‍പൂളിനായി വല കുലുക്കിയത്.

ജൂലിയന്‍ അല്‍വാരസാണ് സിറ്റിയുടെ ആശ്വാസ ഗോള്‍ നേടിയത്. കമ്യൂണിറ്റി ഷീല്‍ഡ് കൂടി നേടിയതോടെ യു.കെയിലെ എല്ലാ ആഭ്യന്തര കിരീടങ്ങളും നേടിയ പരിശീലകനെന്ന നേട്ടം ലിവര്‍പൂളിന്റെ യുര്‍ഗന്‍ ക്ലോപ്പിന് സ്വന്തമായി. ട്രെന്റ് അലക്സാണ്ടറിലൂടെ 21ാം മിനിറ്റില്‍ റെഡ്സ് ആദ്യ ഗോള്‍ നേടി. തിരിച്ചടിക്കാനുളള സിറ്റിയുടെ ശ്രമങ്ങളൊന്നും ആദ്യ പകുതിയില്‍ ഫലം കണ്ടില്ല.

ഗോള്‍ നേടാനായി മികച്ച അവസരങ്ങള്‍ ലഭിച്ചെങ്കിലും മുന്നേറ്റ നിര പാഴാക്കി. രണ്ടാം പകുതിയില്‍ പകരകാരനായെത്തിയ ജൂലിയന്‍ അല്‍വാരസ് 70ാം മിനിറ്റില്‍ സിറ്റിക്കായി സമനില ഗോള്‍ നേടി.

മികച്ച മുന്നേറ്റങ്ങളോടെ സമനില നേടാന്‍ സിറ്റി ശ്രമിച്ചെങ്കിലും ലിവര്‍പൂളിന്റെ ശക്തമായ പ്രതിരോധം ഭേദിക്കാനായില്ല. 94ാം മിനിറ്റില്‍ ഡാര്‍വിന്‍ നൂനെസിന്റെ ഗോള്‍ കൂടി വന്നതോടെ സിറ്റിയുടെ പതനം പൂര്‍ത്തിയായി. 58 ശതമാനം ബാള്‍ പൊസിഷനോടെ മികച്ച മുന്നേറ്റങ്ങള്‍ നടത്തിയ സിറ്റി തൊടുത്ത 14 ഷോട്ടുകളില്‍ എട്ടെണ്ണം ടാര്‍ഗറ്റിലേക്കായിരുന്നു. മറുവശത്ത് 15 ഷോട്ടുകള്‍ എടുത്ത ലിവര്‍പൂള്‍ നാല് ഓണ്‍ ടാര്‍ഗറ്റ് ഷോട്ടില്‍ മൂന്നും ഗോളാക്കി മാറ്റുകയായിരുന്നു.