ഏഷ്യ കപ്പില്‍ ഓഗസ്റ്റ് 28ന് പാക്കിസ്ഥാനെതിരെ ആദ്യ മത്സരത്തിന് ഒരുങ്ങുന്ന ഇന്ത്യയ്ക്ക് കനത്ത തിരിച്ചടി. ഇന്ത്യന്‍ ക്രിക്കറ്റ് ടീമിന്റെ മുഖ്യ പരിശീലകന്‍ രാഹുല്‍ ദ്രാവിഡിന് കോവിഡ് സ്ഥിരീകരിച്ചു.

ട്വന്റി20 ലോകകപ്പിനു മുന്‍പ് ഇന്ത്യ കളിക്കുന്ന പ്രധാന ടൂര്‍ണമെന്റായ എഷ്യ കപ്പില്‍ ദ്രാവിഡ് ടീമിനൊപ്പം ഉണ്ടാകില്ലെന്നാണു പുറത്തു വരുന്ന റിപ്പോര്‍ട്ടുകള്‍. ഇന്ത്യയുടെ വെസ്റ്റിന്‍ഡീസ് പര്യടനത്തിനു ശേഷം വിശ്രമത്തിലായിരുന്നു ദ്രാവിഡ്.

സിംബാബ്വെ പര്യടനത്തില്‍ മുന്‍ ഇന്ത്യന്‍ താരം വി.വി.എസ്. ലക്ഷ്മണനായിരുന്നു ടീമിന്റെ മുഖ്യ പരിശീലകന്‍. ആരോഗ്യ പ്രശ്നങ്ങളെ തുടര്‍ന്ന് ദ്രാവിഡ് എഷ്യ കപ്പില്‍ നിന്ന് പിന്‍മാറിയാല്‍ വി.വി.എസ്. ലക്ഷ്മണന്‍ ടീമിനൊപ്പം ചേരാനാണ് സാധ്യത.

രോഹിത് ശര്‍മ നായകനായ 15 അംഗ ടീമിനെയാണ് ബിസിസിഐ എഷ്യ കപ്പിനായി പ്രഖ്യാപിച്ചത്. മുതിര്‍ന്ന താരം വിരാട് കോലി മടങ്ങിയെത്തിയാണ് ഹൈലൈറ്റ്. വൈസ് ക്യാപ്റ്റനായി കെ.എല്‍.രാഹുലും ടീമില്‍ തിരിച്ചെത്തി.



ഋഷഭ് പന്ത്, ദിനേഷ് കാര്‍ത്തിക് എന്നിവരാണ് വിക്കറ്റ് കീപ്പര്‍മാര്‍. ഇഷാന്‍ കിഷനെയും മലയാളി താരം സഞ്ജു സാംസണെയും പരിഗണിച്ചില്ല. പരുക്കിനെ തുടര്‍ന്നു പേസര്‍മാരായ ജസ്പ്രീത് ബുമ്ര, ഹര്‍ഷല്‍ പട്ടേല്‍ എന്നിവരെയും ഒഴിവാക്കിയിരുന്നു. ഭുവനേശ്വര്‍ കുമാര്‍, അര്‍ഷ്ദീപ് സിങ്, ആവേഷ് ഖാന്‍ എന്നിവരാണ് പേസ് വിഭാഗത്തിനു നേതൃത്വം നല്‍കുന്നത്. ആര്‍.അശ്വിന്‍, യുസ്വേന്ദ്ര ചെഹല്‍, രവി ബിഷ്‌ണോയ് എന്നിവരാണ് സ്പിന്നര്‍മാര്‍.

മധ്യനിര ബാറ്റര്‍മാരായി സൂര്യകുമാര്‍ യാദവും ദീപക് ഹൂഡയുമുണ്ട്. ഓള്‍റൗണ്ടര്‍മാരായി ഹാര്‍ദ്ദിക് പാണ്ഡ്യ, രവീന്ദ്ര ജഡേജ എന്നിവരാണുള്ളത്. ശ്രേയസ് അയ്യര്‍, അക്ഷര്‍ പട്ടേല്‍, ദീപക് ചെഹര്‍ എന്നിവരെ സ്റ്റാന്‍ബൈ താരങ്ങളായും ടീമിലുള്‍പ്പെടുത്തി.

ട്വന്റി20 ലോകകപ്പിനു മുന്നോടിയായി ട്വന്റി20 ഫോര്‍മാറ്റിലാണ് ഈ വര്‍ഷം ഏഷ്യാകപ്പ് നടക്കുന്നത്.