സാല്‍ഗോക്കര്‍ സ്പോര്‍ട്സ് ക്ലബ്ബിന്റെ മുന്‍ സ്ട്രൈക്കറും സന്തോഷ് ട്രോഫി താരവുമായിരുന്ന സക്കറിയാസ് ഫെര്‍ണാണ്ടസ് (78) അന്തരിച്ചു. വാര്‍ധക്യ സഹജമായ അസുഖങ്ങളെ തുടര്‍ന്നായിരുന്നു അന്ത്യമുണ്ടായത്. 1970-ല്‍ ആദ്യമായി ഗോവ ആതിഥേയത്വം വഹിച്ച ബന്ധോഡ്കര്‍ ഗോള്‍ഡ് ട്രോഫി ടൂര്‍ണമെന്റില്‍ ബോംബെ ഗോവന്‍സിനെതിരേ സാല്‍ഗോക്കറിനായി വെറും ആറു മിനിറ്റുകള്‍ക്കിടെ ഹാട്രിക്ക് നേടി റെക്കോഡിട്ട താരമാണ്.


സക്കറിയയുടെ മികവില്‍ അന്ന് 6-0നാണ് സാല്‍ഗോക്കര്‍ ജയിച്ചു കയറിയത്. ഫൈനലില്‍ ജലന്ധര്‍ ആസ്ഥാനമായ ലീഡേഴ്സ് ക്ലബ്ബാണ് വിജയിച്ചതെങ്കിലും ടൂര്‍ണമെന്റിലുടനീളം സാല്‍ഗോക്കറിനെ മുന്നോട്ടുനയിച്ച സക്കറിയയുടെ പ്രകടനം ഏറെ ശ്രദ്ധ നേടിയിട്ടുണ്ടായിരുന്നു.

പഞ്ചാബ് പോലീസിനെതിരേ ക്വാര്‍ട്ടറിലും സെമിയില്‍ ഡെംപോ സ്പോര്‍ട്സ് ക്ലബ്ബിനെതിരേയും സക്കറിയയുടെ ഗോളുകളിലാണ് സാല്‍ഗോക്കര്‍ ജയിച്ചുകയറിയത്. ഗോവന്‍ ഫുട്ബോള്‍ കണ്ട ഏറ്റവും മികച്ച സ്ട്രൈക്കര്‍മാരില്‍ ഒരാളായിരുന്നു അദ്ദേഹം. ബിസിനസ് ആവശ്യത്തിനായി കുടുംബം കേരളത്തിലെത്തിയതോടെ സക്കറിയാസ് ഫെര്‍ണാണ്ടസ് കരിയറിലെ ആദ്യ നാളുകള്‍ ചെലവഴിച്ചത് കേരളത്തിലായിരുന്നു.

കണ്ണൂര്‍ ലക്കി സ്റ്റാറിലൂടെയായിരുന്നു തുടക്കം കുറിച്ചത്. പിന്നീട് 1965-ല്‍ സാല്‍ഗോക്കറിന്റെ ഓഫര്‍ സ്വീകരിച്ച് ക്ലബ്ബില്‍ ചേരുകയായിരുന്നു. ഐന്‍സാവോ കുട്ടീഞ്ഞ്യോ, വാസു റായ്തുര്‍കര്‍, അലിസാബ് സദേക്കര്‍, മാനുവല്‍ തുടങ്ങിയ ഇതിഹാസ താരങ്ങള്‍ നിറഞ്ഞ അന്നത്തെ ടീമില്‍ തനിക്കായി ഒരു ഇടം കണ്ടെത്തുക മാത്രമല്ല പരിചയസമ്പന്നരായ തന്റെ സഹതാരങ്ങളില്‍ നിന്ന് ആദരവ് പിടിച്ചുപറ്റാനും അദ്ദേഹത്തിന് കഴിഞ്ഞിരുന്നു.