കേരള ബ്ലാസ്‌റ്റേഴ്‌സിനെ വീഴ്ത്തി ഈസ്റ്റ് ബംഗാള്‍...
കേരള ബ്ലാസ്‌റ്റേഴ്‌സിനെ വീഴ്ത്തി ഈസ്റ്റ് ബംഗാള്‍. ഐഎസ്എല്‍ ഫുട്‌ബോളിലെ ആവേശപ്പോരാട്ടത്തില്‍ ഏകപക്ഷീയമായ ഒരു ഗോളിനാണ് ഈസ്റ്റ് ബംഗാളിന്റെ വിജയം. മത്സരത്തിന്റെ 77–ാം മിനിറ്റിലാണ് ക്ലെയ്റ്റന്‍ സില്‍വയിലൂടെ ബ്ലാസ്‌റ്റേഴ്‌സിന്റെ ഹൃദയം തകര്‍ത്ത് ഈസ്റ്റ് ബംഗാള്‍ വിജയഗോള്‍ നേടിയത്. സീസണില്‍ സില്‍വയുടെ 10–ാം ഗോളാണിത്. ആദ്യപകുതിയില്‍ ഈസ്റ്റ് ബംഗാളിന്റെ മലയാളി താരം വി.പി.സുഹൈര്‍ നേടിയ ഗോള്‍ ഓഫ്‌സൈഡായതിനെ തുടര്‍ന്ന് റഫറി അനുവദിച്ചിരുന്നില്ല.
ജയിച്ചെങ്കിലും 16 കളികളില്‍നിന്ന് 15 പോയിന്റുമായി ഈസ്റ്റ് ബംഗാള്‍ ഒന്‍പതാം സ്ഥാനത്തു തന്നെ തുടരുന്നു. തുടര്‍ച്ചയായ നാലു തോല്‍വികള്‍ക്കു ശേഷമാണ് ഈസ്റ്റ് ബംഗാള്‍ വിജയവഴിയില്‍ തിരിച്ചെത്തിയത്. ബ്ലാസ്‌റ്റേഴ്‌സ് ആകട്ടെ, കഴിഞ്ഞ മത്സരത്തില്‍ നോര്‍ത്ത് ഈസ്റ്റ് യുണൈറ്റഡിനെ തോല്‍പ്പിച്ചിരുന്നു. ഇത്തവണ തോറ്റെങ്കിലും ബ്ലാസ്‌റ്റേഴ്‌സ് 16 കളികളില്‍നിന്ന് 28 പോയിന്റുമായി മൂന്നാം സ്ഥാനം നിലനിര്‍ത്തി.
ഇരു ടീമുകളും ഒപ്പത്തിനൊപ്പം പൊരുതിയ രണ്ടാം പകുതിയില്‍ കേരള ബ്ലാസ്‌റ്റേഴ്‌സിന്റെ പ്രതിരോധപ്പിഴവില്‍ നിന്നാണ് ഈസ്റ്റ് ബംഗാള്‍ ലീഡ് നേടിയത്. ബ്ലാസ്‌റ്റേഴ്‌സ് പ്രതിരോധത്തില്‍നിന്ന് റാഞ്ചിയെടുത്ത പന്തുമായി ഇടതുവിങ്ങിലൂടെ ഈസ്റ്റ് ബംഗാള്‍ താരം നവോരം സിങ്ങിന്റെ മുന്നേറ്റം. ഒന്നാം പോസ്റ്റിന് തൊട്ടരികില്‍വച്ച് നവോരം സിങ് തൊടുത്ത ഷോട്ട് ബ്ലാസ്‌റ്റേഴ്‌സ് പ്രതിരോധത്തിലെ വിക്ടര്‍ മോംഗിലിന്റെ ദേഹത്തുതട്ടി ഗതിമാറി പോസ്റ്റിലേക്കു വന്നെങ്കിലും ഗോള്‍കീപ്പര്‍ കരണ്‍ജിത് സിങ് തടുത്തു.
പന്ത് കരണ്‍ജിത്തിന് കയ്യിലൊതുക്കാനാകാതെ പോയത് വിനയായി. വീണ്ടും പോസ്റ്റിന് സമാന്തരമായി നീങ്ങിയ പന്ത് ബ്ലാസ്‌റ്റേഴ്‌സിന്റെ പുതിയ താരം ഡാനിഷ് ഫാറൂഖ് തട്ടിയകറ്റാന്‍ ശ്രമിച്ചെങ്കിലും ക്ലെയ്റ്റന്‍ സില്‍വയുടെ കാലില്‍ത്തട്ടി പന്ത് വലയില്‍. സ്‌കോര്‍ 1–0.
മത്സരത്തിന്റെ 42–ാം മിനിറ്റില്‍ നവോരം സിങ്ങിന്റെ പാസില്‍നിന്ന് സുഹൈര്‍ നേടിയ ഗോളാണ്, താരം ഓഫ്‌സൈഡായതിനെ തുടര്‍ന്ന് റഫറി നിഷേധിച്ചത്. ഇതിനു പുറമെ, ആദ്യപകുതിയുടെ അവസാന നിമിഷങ്ങളില്‍ പകരക്കാരന്‍ ഗോള്‍കീപ്പര്‍ കരണ്‍ജിത് സിങ്ങിന്റെ മികച്ച സേവുകളും ബ്ലാസ്‌റ്റേഴ്‌സിന് തുണയായി. ആദ്യപകുതിയുടെ ഇന്‍ജറി ടൈമില്‍ ക്ലെയ്റ്റന്‍ സില്‍വയുടെ രണ്ടു ഗോള്‍ശ്രമങ്ങളാണ് കരണ്‍ജിത് സിങ് അവിശ്വസനീയമായി തടുത്തിട്ടത്. ഇതിനു പിന്നാലെ ലഭിച്ച കോര്‍ണറില്‍നിന്ന് വന്ന പന്തില്‍ തലവച്ച വി.പി. സുഹൈറിന്റെ ഹെഡര്‍ നേരിയ വ്യത്യാസത്തില്‍ പുറത്തു പോയതും ബ്ലാസ്‌റ്റേഴ്‌സിന് തുണയായി. രണ്ടാം പകുതിയില്‍ ബ്ലാസ്‌റ്റേഴ്‌സ് താരം ജിയാന്നുവിന്റെ ഗോളെന്നുറപ്പിച്ച ഷോട്ട് ഈസ്റ്റ് ബംഗാള്‍ ഗോള്‍കീപ്പര്‍ കമല്‍ജിത്തും അവിശ്വസനീയമായി രക്ഷപ്പെടുത്തി.
https://www.facebook.com/Malayalivartha
