സംസ്ഥാന സ്‌കൂള്‍ കായികമേളയില്‍ പങ്കെടുക്കുന്നതിനു രണ്ട് സ്‌കൂളുകളെ വിലക്കിയ തീരുമാനം പിന്‍വലിച്ച് സംസ്ഥാന സര്‍ക്കാര്‍
സംസ്ഥാന സ്‌കൂള്‍ കായികമേളയില്‍ പങ്കെടുക്കുന്നതിനു രണ്ട് സ്‌കൂളുകളെ വിലക്കിയ തീരുമാനം പിന്‍വലിച്ച് സംസ്ഥാന സര്‍ക്കാര്‍ .
തിരുനാവായ നാവാമുകുന്ദ സ്‌കൂളിനും കോതമംഗലം മാര്‍ ബേസില്‍ സ്‌കൂളിനുമാണ് അടുത്ത വര്‍ഷത്തെ കായികമേളയില്‍ വിലക്ക് ഏര്‍പ്പെടുത്തിയത്.
ഈ തീരുമാനമാണ് പിന്‍വലിച്ചത്. ഇതിനെതിരെ വ്യാപക പ്രതിഷേധമുയര്‍ന്നിരുന്നു. വിദ്യാഭ്യാസ മന്ത്രി വി ശിവന്‍കുട്ടി നിയമസഭയിലാണ് ഇക്കാര്യം പറഞ്ഞത്.കുട്ടികളുടെ അവസരം നഷ്ടമാകുമെന്ന വിലയിരുത്തലിലാണ് വിലക്ക് പിന്‍വലിച്ചത്.
വിലക്കാനുള്ള തീരുമാനം പിന്‍വലിക്കണമെന്നു ആവശ്യപ്പെട്ട് വിദ്യാഭ്യാസ മന്ത്രിയ്ക്ക് രേഖാമൂലം നിരവധി പേര്‍ പരാതി നല്‍കിയിരുന്നു. മാത്രമല്ല പ്രതിഷേധിച്ചതില്‍ സ്‌കൂളുകള്‍ ഖേദം പ്രകടിപ്പിക്കുകയും ചെയ്തു.
വിലക്കേര്‍പ്പെടുത്തി പൊതു വിദ്യാഭ്യസ ഡയറക്ടര്‍ ഇറക്കിയ ഉത്തരവ് റദ്ദാക്കും. വിലക്ക് നീക്കിയുള്ള പുതിയ ഉത്തരവ് ഒരാഴ്ചയ്ക്കുള്ളില്‍ തന്നെ പുറത്തിറക്കും.നവംബറില്‍ എറണാകുളത്തു നടന്ന കായികമേളയുടെ സമാപന വേദിയില്‍ പ്രതിഷേധിച്ചതിനാണ് മാര്‍ ബേസില്‍, നാവാമുകുന്ദ സ്‌കൂളുകള്‍ക്ക് വിലക്ക് ഏര്‍പ്പെടുത്തിയത്. കായിക മേളയില്‍ തിരുവനന്തപുരം ജിവിരാജ സ്പോര്‍ട്സ് സ്‌കൂളിനു രണ്ടാം സ്ഥാനം നല്‍കിയതിനെതിരെ രണ്ട് സ്‌കൂളുകളും പ്രതിഷേധവുമായി രംഗത്തെത്തിയിരുന്നു. പിന്നാലെയാണ് വിലക്കാനുള്ള തീരുമാനമായത്.
https://www.facebook.com/Malayalivartha
