പ്രളയബാധിതരുടെ ധനസഹായം; അറിഞ്ഞിരിക്കേണ്ട കാര്യങ്ങള്
സംസ്ഥാനത്തെ പ്രളയക്കെടുത്തിയില് പെട്ട് ദുരിതമനുഭവിക്കുന്നവര്ക്കുള്ള ധനസഹായം എത്രയും വേഗം ലഭ്യമാക്കാന് ദുരിതാശ്വാസ ക്യാമ്പുകളിലും മറ്റുസ്ഥലങ്ങളിലും കഴിഞ്ഞവരെക്കുറിച്ചുള്ള വിശദവിവരങ്ങള് ഉള്പ്പെടുത്തിക്കൊണ്ട് പ്രത്യേക ലിസ്റ്റ് തയാറാക്കുന്ന ജോലികള് സര്ക്കാര് ആരംഭിച്ചു കഴിഞ്ഞു. എന്നാല് ഈ സഹായം ലഭിക്കാന് എന്തൊക്കെ ചെയ്യണമെന്ന കാര്യത്തില് പല ദുരിതബാധിതര്ക്കും സംശയങ്ങളുണ്ട്. പ്രളയബാധിതര്ക്കുള്ള ധനസഹായം ലഭിക്കാന് നിങ്ങള് ഓഫീസുകളില് കയറി ഇറങ്ങേണ്ടതില്ല.
ദുരിത ബാധിതരുടെ വിവരങ്ങള് അന്വേഷിച്ച് ബൂത്ത് ലെവല് ഓഫീസര്മാര് (ബിഎല്ഒ) നിങ്ങളുടെ വീടുകളിലെത്തും. ഓരോ വാര്ഡിലേയും ജനപ്രതിനിധിക്കും ബന്ധപ്പെട്ട റവന്യു ഉദ്യോഗസ്ഥര്ക്കും ഒപ്പമായിരിക്കും ബിഎല്ഒമാര് വീടുകള് സന്ദര്ശിക്കുക. ബി എല് ഒമാര് ശേഖരിച്ച വിവരങ്ങള് വാര്ഡ് അംഗമോ വില്ലേജ് ഓഫീസറോ സാക്ഷ്യപ്പെടുത്തിയ ശേഷമായിരിക്കും അന്തിമ പട്ടിക തയ്യാറാക്കുക. ഇതിനായി ഇവര്ക്ക് പ്രത്യേകം പരിശീലനവും നല്കിയിട്ടുണ്ട്.
ബി എല് ഒമാര് നേരിട്ട് വീട്ടിലെത്തി ശേഖരിക്കുന്ന നാശനഷ്ടങ്ങളുടെ വിവരങ്ങളുടെ അടിസ്ഥാനത്തിലാണ് ധനസഹായം ലഭ്യമാക്കുക. രണ്ട് ദിവസം വെള്ളം കെട്ടി നിന്ന വീടുകളുടെ ഉടമസ്ഥര്ക്കാകും ധനസഹായം ലഭിക്കുന്നത്. ഇതിനായി പേര്, മേല്വിലാസം, വയസ്, ആണ്/പെണ്ണ്, കുട്ടികള്, കുടുംബനാഥയുടെ റേഷന് കാര്ഡ് നമ്പര്, ബാങ്ക് അക്കൗണ്ട് നമ്പര്, ഐ എഫ് എസ് സി കോഡ് സഹിതം, ആധാര് നമ്പര് എന്നിവ ഉള്പ്പെടെയുള്ള വിശദമായ വിവരങ്ങള് ശേഖരിക്കും. പതിനായിരം രൂപ അക്കൗണ്ടിലേക്ക് നല്കും.
എന്നാല് സന്ദര്ഭം മുതലെടുത്ത് ചിലര് സഹായവാഗ്ദാനം നല്കി വീടുകള് തോറും കയറിയിറങ്ങി ബാങ്ക് അക്കൗണ്ട് വിവരങ്ങളും മറ്റും കൈക്കലാക്കുന്നതായി വിവരം ലഭിച്ചിട്ടുണ്ട്. പ്രമുഖ രാഷ്ട്രീയ പാര്ട്ടികളുടെ പ്രാദേശിക നേതാക്കളും ഈ സംഘത്തിനൊപ്പമുണ്ട്. തങ്ങളുടെ ശ്രമഫലമായാണ് സര്ക്കാര് ധനസഹായം എത്തുന്നത് എന്ന് ജനങ്ങളെ ബോധ്യപ്പെടുത്താനുള്ള ശ്രമമാണോ ഇതെന്നും സംശയിക്കുന്നുണ്ട്. എന്നാല് ഇത്തരത്തില് വരുന്നവര്ക്ക് വിവരങ്ങള് നല്കരുതെന്ന് അധികൃതര് വ്യക്തമാക്കി.
https://www.facebook.com/Malayalivartha
