ശനിയാഴ്ച തുടക്കമിട്ട ആമസോണിന്റെ ഗ്രേറ്റ് ഇന്ത്യന്‍ സെയില്‍, ഫഌപ്പ്കാര്‍ട്ടിന്റെ ബിഗ് ബില്ല്യണ്‍ ഡേയ്‌സ് മേളക്ക് വന്‍ ജന പങ്കാളിത്തമെന്ന് കമ്പനികളുടെ അവകാശവാദം. വലിയ ഓഫറുകളാണ് ഈ ദിനങ്ങളില്‍ ഓണ്‍ലൈന്‍ ഷോപ്പിംഗ് ഭീമന്മാര്‍ ഒരുക്കുന്നത്. സ്മാര്‍ട്ട്‌ഫോണുകള്‍, ലാപ്‌ടോപ്പ്, ടിവി, ഹെഡ്‌ഫോണ്‍ എന്നിവയ്ക്ക് വലിയ വിലക്കുറവ് വാഗ്ദാനം ചെയ്യപ്പെടുന്നു. 750 കോടി രൂപയുടെ പ്രീമിയം സ്മാര്‍ട്ട്‌ഫോണുകള്‍ 36 മണിക്കൂറിനുള്ളില്‍ വിറ്റതായി ആമസോണും കഴിഞ്ഞ വര്‍ഷത്തെ ഉത്സവ വില്‍പ്പനയുടെ ഉദ്ഘാടന ദിവസം നടന്ന വില്‍പ്പനയുടെ ഇരട്ടി ഇത്തവണ ആദ്യ ദിവസമുണ്ടായെന്ന് ഫഌപ്പ്കാര്‍ട്ടും പറയുന്നു. ഒക്ടോബര്‍ 4 വരെയാണ് മേള. 

തുടക്കം മുതലുള്ള സൂചനകളനുസരിച്ച് ഇന്ത്യ സാക്ഷ്യം വഹിച്ച ഏറ്റവും വലിയ ഉത്സവ സീസണാണിതെന്ന് ഫഌപ്കാര്‍ട്ടും തങ്ങളുടെ ഏറ്റവും വലിയ ഓപ്പണിംഗ് ഡേ വില്‍പ്പനയാണ് നടന്നതെന്ന് ആമസോണും അവകാശപ്പെടുന്നു. പുതിയ ഉപഭോക്താക്കളില്‍ 91 ശതമാനവും ടയര്‍ 2, 3 പട്ടണങ്ങളില്‍ നിന്നുള്ളവരാണെന്നും ഫാഷന്‍, സ്മാര്‍ട്ട്‌ഫോണ്‍ വിഭാഗങ്ങള്‍ ഈ ഉപഭോക്താക്കളുടെ മികച്ച ഷോപ്പിംഗ് വിഭാഗങ്ങളായി മാറുകയാണ് കഴിഞ്ഞ വര്‍ഷം സമാരംഭിച്ച ഹിന്ദി ഇന്റര്‍ഫേസിലൂടെ ധാരാളം ഉപഭോക്താക്കള്‍ തങ്ങളുടെ പ്ലാറ്റ്‌ഫോമിലേക്ക് വരുന്നുണ്ടെന്ന് അമസോണ്‍ പറയുന്നു. പ്രീമിയം ബ്രാന്‍ഡുകളായ വണ്‍പ്ലസ്, സാംസങ്, ആപ്പിള്‍ എന്നിവയിലൂടെ 36 മണിക്കൂറിനുള്ളില്‍ 750 കോടി രൂപ കവിയുന്ന വിറ്റുവരവോടെ റെക്കോര്‍ഡ് എണ്ണം ഉപഭോക്താക്കളെയാണ് നേടാനായത്. വലിയ ഉപകരണങ്ങളും ടി വികളും 36 മണിക്കൂറിനുള്ളില്‍ വന്‍ തോതില്‍ വില്‍പ്പന നടത്താനായി. ഇത് ശരാശരി ബിസിനസ്സ് ദിവസങ്ങളുടേതിന്റെ 10 മടങ്ങണ്.

ഫാഷന്‍, ബ്യൂട്ടി, പ്രൈവറ്റ് ലേബലുകള്‍, ഫര്‍ണിച്ചര്‍ തുടങ്ങിയ വിഭാഗങ്ങളിലായി ഫഌപ്കാര്‍ട്ട് കഴിഞ്ഞ വര്‍ഷത്തെ ഒന്നാം ദിവസത്തെ അപേക്ഷിച്ച് ഉയര്‍ന്ന വില്‍പ്പനയാണ് നേടിയത്. അടുത്ത ദിവസങ്ങളിലെ മൊബൈല്‍, ഇലക്ട്രോണിക്‌സ് വില്‍പ്പനയിലൂടെ മൊത്തത്തിലുള്ള വില്‍പ്പന കൂടുതല്‍ ശക്തമാകുമെന്നും ഫഌപ്കാര്‍ട്ട് പറയുന്നു.

അതേസമയം, വന്‍ ബിസിനസാണ് നടക്കുന്നതെന്ന് പറയുമ്പോഴും മൊത്തം വിറ്റുവരവിനെക്കുറിച്ച് ഇരു കമ്പനികളും കൃത്യമായ കണക്കുകള്‍ പുറത്തുവിടാത്തതെന്തെന്ന് വിപണി നിരീക്ഷകര്‍ ചോദിച്ചുതുടങ്ങിയിട്ടുണ്ട്. ഉപഭോക്തൃ ഡിമാന്‍ഡ് ഉയര്‍ന്നുവരുന്നതായുള്ള സൂചനകള്‍ ഇതുവരെ പൊതുവിപണിയില്‍ നിന്നു ലഭിക്കുന്നില്ലെന്നും സാമ്പത്തിക വിദഗ്ധരും ചൂണ്ടിക്കാട്ടുന്നു. ഇതിനിടെയാണ് ഉത്സവ സീസണില്‍ 5 ബില്യണ്‍ ഡോളറിന്റെ കച്ചവടം നടത്താനുള്ള ഇ കൊമേഴ്‌സ് കമ്പനികളുടെ അവകാശവാദമുയരുന്നത്. എന്നാല്‍ ഉത്സവ വില്‍പ്പന വേളയല്‍ ഇകൊമേഴ്‌സ് പോര്‍ട്ടലുകള്‍ ചരക്കിന്റെ യഥാര്‍ത്ഥ വിപണി വിലയേക്കാള്‍ കിഴിവുള്ള വിലയ്ക്ക് മാത്രമാണ് ജി എസ് ടി ചുമത്തുന്നത്. ഇത് സര്‍ക്കാരിന് വലിയ നഷ്ടമുണ്ടാക്കുന്നുവെന്ന് വ്യാപാരികളുടെ സംഘടന ആരോപിക്കുന്നു.