കേന്ദ്ര സര്‍ക്കാര്‍ ഇന്ധനവിലയില്‍ കുറവ് വരുത്തിയെങ്കിലും സംസ്ഥാനത്ത് പെട്രോള്‍ വിലയില്‍ ആനുപാതികമായ കുറവുണ്ടായില്ല... കേരളത്തില്‍ കുറച്ചത് 9 രൂപ 48 പൈസ മാത്രം....

പെട്രോളിന് എട്ട് രൂപ കേന്ദ്രം കുറച്ചപ്പോള്‍ 2 രൂപ 41 പൈസ കൂടി സംസ്ഥാനത്തും കുറഞ്ഞു. ഇതനുസരിച്ച് പെട്രോളിന് 10 രൂപ 41 പൈസ കുറയേണ്ടതായിരുന്നുവെങ്കിലും സംസ്ഥാനത്ത് 9 രൂപ 48 പൈസ മാത്രമേ കുറഞ്ഞുള്ളൂ. ഇതേ ചൊല്ലിയാണ് വിവാദം ഉയര്‍ന്നിരിക്കുന്നത്.

എണ്ണകമ്പനികള്‍ അടിസ്ഥാന വിലകൂട്ടിയതാണ് നിരക്കിലെ വ്യത്യാസത്തിന് കാരണമെന്നാണ് കേരളത്തിന്റെ വിശദീകരണം. 115 രൂപ 20 പൈസയായിരുന്നു ശനിയാഴ്ച കൊച്ചിയിലെ പെട്രോള്‍ നിരക്ക്. ഇതിനുപിന്നാലെ കേന്ദ്രം കുറച്ചതും സംസ്ഥാനം വേണ്ടെന്ന് വച്ചതുമായ കണക്ക് നോക്കുമ്പോള്‍ 104 രൂപ 79 പൈസക്ക് ഒരു ലിറ്റര്‍ പെട്രോള്‍ കിട്ടേണ്ടതായിരുന്നു. എന്നാല്‍ കൊച്ചിയിലെ പമ്പുകളില്‍ ഇപ്പോള്‍ 105 രൂപ 70 പൈസയാണ് പെട്രോളിന് ശരാശരി നിരക്ക്.

പെട്രോള്‍ വിലയില്‍ കേരളത്തില്‍ നടപ്പിലായത് ആനുപാതിക കുറവാണോ അതോ കേരളം കുറച്ചത് തന്നെയാണോ എന്നതില്‍ തര്‍ക്കം തുടരുന്നതിനിടെയാണ് നിരക്കിലെ വ്യത്യാസവും ശ്രദ്ധേയമാകുന്നത്. 93 പൈസയുടെ വര്‍ദ്ധനവാണ് വന്നത്. അതുകൊണ്ട് കേന്ദ്രം എട്ട് രൂപ കുറച്ചപ്പോഴും ജനങ്ങള്‍ക്ക് ഏഴ് രൂപയുടെ ഇളവേ ലഭിച്ചുള്ളൂ എന്നും സംസ്ഥാനം വിശദീകരിക്കുന്നു.

അതേസമയം ഡീസല്‍ നിരക്കില്‍ ഈ വ്യത്യാസമില്ല. കേന്ദ്രം കുറച്ച 6 രൂപക്കൊപ്പം, കുറച്ചെന്ന് കേരളം അവകാശപ്പെടുന്ന 1 രൂപ 36 പൈസ കൂടി കുറഞ്ഞതോടെ ഡീസല്‍ വിലയില്‍ 7 രൂപ 36 പൈസയുടെ വ്യതിയാനമുണ്ടായിട്ടുണ്ട്.