ജൂണ്‍ 16 മുതല്‍ സ്വര്‍ണാഭരണങ്ങള്‍ക്ക് നിര്‍ബന്ധമാക്കിയ ഹാള്‍മാര്‍ക്കിംഗ് നടപടികള്‍ വന്‍ വിജയമാണെന്ന് കേന്ദ്ര സര്‍ക്കാര്‍. ഹാള്‍മാര്‍ക്കിംഗിനെതിരെ ദേശവ്യാപകമായി സ്വര്‍ണവ്യാപാരികള്‍ തിങ്കളാഴ്ച നടത്തുന്ന സമരം ഉപേക്ഷിക്കണമെന്നും കേന്ദ്രം ആവശ്യപ്പെട്ടിട്ടുണ്ട്.

ഹാള്‍മാര്‍ക്കിംഗിനൊപ്പം ഏര്‍പ്പെടുത്തിയ ഹാള്‍മാര്‍ക്കിംഗ് യുണീക്ക് ഐഡന്റിഫിക്കേഷന്‍ (എച്ച്.യു.ഐ.ഡി) മൂലം ആഭരണങ്ങള്‍ വില്‍ക്കാനാവാതെ വിപണി സ്തംഭിക്കുന്നുവെന്ന് ചൂണ്ടിക്കാട്ടി, പദ്ധതി നടപ്പാക്കുന്നത് രണ്ടുവര്‍ഷത്തേക്ക് നീട്ടിവയ്ക്കണമെന്ന് ഓള്‍ ഇന്ത്യ ജെം ആന്‍ഡ് ജുവലറി ഡൊമസ്റ്റിക് കൗണ്‍സില്‍ (ജി.ജെ.സി) ഉള്‍പ്പെടെയുള്ള സംഘടനകള്‍ ആവശ്യപ്പെട്ടിരുന്നു.

ഇത് പരിഗണിക്കപ്പെടാത്ത സാഹചര്യത്തിലാണ് ഇന്ന് ദേശ വ്യാപകമായി കടകളടച്ച് (കേരളത്തില്‍ ഒഴികെ) കരിദിനം ആചരിക്കുന്നത്. 256 ജില്ലകളിലാണ് കേന്ദ്രം ഹാള്‍മാര്‍ക്കിംഗ് നിര്‍ബന്ധമാക്കിയത്.

ഇതുവരെ 91,603 ജുവലറികള്‍ ഹാള്‍മാര്‍ക്കിംഗ് രജിസ്ട്രേഷന്‍ സ്വീകരിച്ചെന്നും ഒരുകോടിയിലേറെ ആഭരണങ്ങള്‍ ഹാള്‍മാര്‍ക്ക് ചെയ്തുവെന്നും ബ്യൂറോ ഒഫ് ഇന്ത്യന്‍ സ്റ്റാന്‍ഡേര്‍ഡ്സ് (ബി.ഐ.എസ്) ഡയറക്ടര്‍ ജനറല്‍ പ്രമോദ് കുമാര്‍ തിവാരി പറഞ്ഞു. ഹാള്‍മാര്‍ക്കിംഗിന്റെ വേഗതയും വര്‍ദ്ധിച്ചിട്ടുണ്ട്. ആഗസ്റ്റ് 20ന് മാത്രം 3.90 ലക്ഷം ആഭരണങ്ങള്‍ ഹാള്‍മാര്‍ക്ക് ചെയ്തു.

വൈകാതെ പ്രതിവര്‍ഷം 10 കോടി ആഭരണങ്ങള്‍ ഹാള്‍മാര്‍ക്ക് ചെയ്യാനാകും. ജുവലറികളുടെയും ആഭരണങ്ങളുടെയും നീക്കങ്ങള്‍ എച്ച്.യു.ഐ.ഡി ഉപയോഗിച്ച് ബി.ഐ.എസ് നിരീക്ഷിക്കുന്നുവെന്ന വാദം അടിസ്ഥാനരഹിതമാണെന്നും അത്തരം രേഖകള്‍ അപ്ലോഡ് ചെയ്യാന്‍ ജുവലറികളോട് ആവശ്യപ്പെട്ടിട്ടില്ലെന്നും അദ്ദേഹം പറഞ്ഞു.