വൈദ്യുത കാറായ 'മോഡല്‍ 3' യുടെ ഉല്‍പാദനവും വിതരണവും ഈ മാസം ആരംഭിക്കാന്‍ കഴിയുമെന്ന പ്രതീക്ഷയില്‍ നിര്‍മാതാക്കള്‍. ആദ്യം ബുക്ക് ചെയ്ത 30 പേര്‍ക്ക് ഈ മാസം 28നു തന്നെ കാര്‍ കൈമാറാന്‍ കഴിയുമെന്നും അദ്ദേഹം പറഞ്ഞു. 35000 ഡോളര്‍(22.5 ലക്ഷം രൂപ) ആണ് ടെസ്‌ല മോഡല്‍ 3 യുടെ യുഎസ് വില. ഇന്ത്യയിലും ഒട്ടേറെപ്പേരാണ് ഈ കാര്‍ ബുക്ക് ചെയ്തു കാത്തിരിക്കുന്നത്.

ഇതിനായുള്ള എല്ലാ അനുമതികളും ലഭിച്ചതായും ആദ്യം നിശ്ചയിച്ചതിനേക്കാള്‍ രണ്ടാഴ്ച മുന്‍പു നിര്‍മാണം ആരംഭിക്കാന്‍ കഴിയുമെന്നും ടെസ്‌ല കമ്പനി മേധാവി എലന്‍ മസ്‌ക് പറഞ്ഞു. ഓഗസ്റ്റ് മാസത്തില്‍ 100 കാറുകള്‍ സെപ്റ്റംബറില്‍ 1500 കാറുകള്‍ എന്നിങ്ങനെയാകും ഉല്‍പാദിപ്പിക്കപ്പെടുന്ന കാറുകളുടെ എണ്ണം. ഡിസംബര്‍ ആകുമ്പോഴേക്കും അത് മാസം 20000 കാറിലെത്തും. 2018 ആകുന്നതോടെ ആഴ്ചയില്‍ 10000 കാര്‍ നിര്‍മിക്കാനാണ് കമ്പനി ലക്ഷ്യമിടുന്നതെന്നും റിപ്പോര്‍ട്ടുകള്‍ പറയുന്നു.

ആദ്യത്തെ പ്രഖ്യാപനമനുസരിച്ച് കാര്‍ വിപണിയിലെത്തിക്കുന്നതിനുള്ള ശേഷി കമ്പനിക്കുണ്ടോ എന്ന ആശങ്ക വ്യാപകമായിരുന്നു. നേരത്തേയുള്ള രണ്ടു മോഡലുകള്‍ക്കും ഇത്തരം പ്രശ്‌നങ്ങള്‍ നേരിട്ടിരുന്നതാണ് വിപണിയിലെ ഈ ആശങ്കയ്ക്കു കാരണം. എന്നാല്‍ ഇന്നലത്തെ പ്രഖ്യാപനത്തോടെ കമ്പനിയുടെ ഉപയോക്താക്കളും ഓഹരിയുടമകളും ആവേശത്തിലായിരിക്കുകയാണ്. മോഡല്‍ 3 സെഡാന്‍ ഒരു തവണ ഫുള്‍ ചാര്‍ജ് ചെയ്താല്‍ 346 കിലോമീറ്റര്‍ ഓടുമെന്നും കമ്പനി അറിയിച്ചു.