നീറ്റും ജെ.ഇ.ഇയും ഇനി മുതല്‍ വര്‍ഷത്തില്‍ രണ്ടു തവണ, കമ്പ്യൂട്ടര്‍ അടിസ്ഥാനമാക്കിയുള്ള പരീക്ഷയായതിനാല്‍ വിദ്യാര്‍ഥികള്‍ക്ക് വീട്ടില്‍ നിന്നോ അംഗീകൃത കമ്പ്യൂട്ടര്‍ സെന്ററുകളില്‍ നിന്നോ സൗജന്യമായി പരീക്ഷകള്‍ക്കു വേണ്ട തയ്യാറെടുപ്പുകള്‍ നടത്താം, സിലബസ്, ചോദ്യങ്ങളുടെ മാതൃക, ഭാഷാ, ഫീസ് എന്നിവയില്‍ മാറ്റമുണ്ടാകില്ല
സി.ബി.എസ്.ഇ നിലവില്‍ നടത്തി വരുന്ന നീറ്റ്, ജെ.ഇ.ഇ (മെയ്ന്‍) പരീക്ഷകളും നെറ്റ് എന്‍ട്രന്‍സ് പരീക്ഷയും ഇനി മുതല്‍ ദേശീയ ടെസ്റ്റിങ് ഏജന്‍സി (എന്‍.എ.ടി) നടത്തുമെന്ന് കേന്ദ്ര മാനവവിഭവശേഷി മന്ത്രി പ്രകാശ് ജാവദേക്കര്‍. ഇനി മുതല്‍ എല്ലാ പരീക്ഷകളും കമ്പ്യൂട്ടര്‍ അടിസ്ഥാനമാക്കിയായിരിക്കുമെന്നും മന്ത്രി പറഞ്ഞു.
ഡല്‍ഹിയില്‍ നടത്തിയ വാര്‍ത്താ സമ്മേളനത്തിലാണ് യോഗ്യതാ പരീക്ഷകള്‍ പുതിയ ഏജന്‍സിയുടെ കീഴില്‍ നടത്താനുള്ള തീരുമാനം ജാവദേക്കര്‍ അറിയിച്ചത്. നെറ്റ് പരീക്ഷ (നാഷണല്‍ എലിജിബിലിറ്റി ടെസ്റ്റ്) ഡിസംബര്‍ മാസവും ജെ.ഇ.ഇ പരീക്ഷ (ജോയിന്റ് എന്‍ട്രന്‍സ് എക്‌സാം) ജനുവരി, ഏപ്രില്‍ മാസങ്ങളിലും നീറ്റ് പരീക്ഷ (നാഷണല്‍ എലിജിബിലിറ്റി എന്‍ട്രന്‍സ് ടെസ്റ്റ്) ഫെബ്രുവരി, മെയ് മാസങ്ങളിലായിരിക്കും ഇനി നടത്തുക.
വര്‍ഷം രണ്ടുതവണ വിദ്യാര്‍ഥികള്‍ക്ക് നീറ്റ് പരീക്ഷയെഴുതാം. ഇതില്‍ മികച്ച മാര്‍ക്കുകള്‍ നേടുന്നവര്‍ക്കായിരിക്കും അഡ്മിഷന്‍. ജെ.ഇ.ഇ പരീക്ഷയും സമാന രീതിയില്‍ ആയിരിക്കും. ഒരു തവണ മാത്രം പരീക്ഷ എഴുതിയവരെ അയോഗ്യരാക്കില്ല. കമ്പ്യൂട്ടര്‍ അടിസ്ഥാനമാക്കിയുള്ള പരീക്ഷയായതിനാല്‍ വിദ്യാര്‍ഥികള്‍ക്ക് വീട്ടില്‍ നിന്നോ അംഗീകൃത കമ്പ്യൂട്ടര്‍ സെന്ററുകളില്‍ നിന്നോ സൗജന്യമായി പരീക്ഷകള്‍ക്കു വേണ്ട തയ്യാറെടുപ്പുകള്‍ നടത്താം.
സിലബസ്, ചോദ്യങ്ങളുടെ മാതൃക, ഭാഷാ, ഫീസ് എന്നിവയില്‍ മാറ്റമുണ്ടാകില്ല. നാല് മുതല്‍ അഞ്ച് ദിവസങ്ങളിലായായിരിക്കും പരീക്ഷകള്‍ നടത്തുകയെന്നും മന്ത്രി അറിയിച്ചു. ഗ്രാമീണ മേഖലയിലെ കുട്ടികള്‍ക്ക് പരീക്ഷാ പരിശീലനത്തിനായി പ്രത്യേക പരീക്ഷാ പരിശീലന കേന്ദ്രങ്ങള്‍ ദേശീയ ടെസ്റ്റിങ് ഏജന്‍സി സ്ഥാപിക്കും.
സ്‌കൂളുകളിലെയും എന്‍ജിനീയറിങ് കോളജുകളിലെയും കമ്പ്യൂട്ടര്‍ സെന്ററുകളെയും പരിശീല കേന്ദ്രങ്ങളായി കണ്ടെത്തും. ഇവിടെ ആഗസ്റ്റ് മൂന്നാം വാരം മുതല്‍ ശനി, ഞായര്‍ ദിവസങ്ങളില്‍ സൗജന്യമായി കുട്ടികള്‍ക്ക് പരിശീലനം നേടാവുന്നതാണ്. അന്താരാഷ്ട്ര നിലവാരത്തിലേക്ക് പരീക്ഷകളെ ഉയര്‍ത്തുവാനാണ് പുതിയ ഏജന്‍സിയെ ഏല്‍പ്പിച്ചത്. പരീക്ഷാ നടത്തിപ്പില്‍ ഉണ്ടാകുന്ന ക്രമക്കേടുകളും കുംഭകോണവും തട്ടിപ്പുകളും പുതിയ സംവിധാനത്തിലൂടെ തടയാന്‍ സാധിക്കുമെന്ന് ജാവദേക്കര്‍ വ്യക്തമാക്കി.
https://www.facebook.com/Malayalivartha
