തെരഞ്ഞെടുപ്പിന്റെ ആദ്യഘട്ടത്തില്‍തന്നെ പരിസ്ഥിതി പ്രശ്‌നങ്ങളുടെ പേരില്‍ കോടതി വിധിയിലൂടെ ഔട്ടായ ഫ്‌ളക്‌സിനു പകരക്കാരനായി ബോഹര്‍ എത്തുന്നു. ചിത്രങ്ങളും അക്ഷരങ്ങളും മികവോടെ പ്രദര്‍ശിപ്പിക്കാന്‍ കഴിയുന്നതിനൊപ്പം പരിസ്ഥിതി സൗഹൃദക്കാരന്‍ എന്നതാണു ബോഹറിന്റെ പ്രത്യേകത. ഉപയോഗശേഷം വലിച്ചെറിഞ്ഞാലും മണ്ണില്‍ ലയിച്ച് അലിഞ്ഞുചേരാന്‍ 'ജൈവ'നായ ബോഹറിനാകും. കത്തിച്ചാല്‍ നിമിഷംകൊണ്ടു ചാരമാകും.

ബോഹറിനെ സ്വാഗതം ചെയ്തു പ്രിന്റിംഗ് മേഖലയും മുന്നോട്ടു വന്നതോടെ വരുംദിനങ്ങളില്‍ പാതയോരങ്ങളില്‍ ബോഹര്‍ ബോര്‍ഡുകളും ബാനറുകളും നിറയും.

രണ്ടു പേപ്പറുകള്‍ കൂട്ടിച്ചേര്‍ത്താണ് ഈ ജൈവ ബാനര്‍ നിര്‍മിക്കുന്നത്. കൂട്ടിച്ചേര്‍ക്കുന്ന പേപ്പറുകള്‍ക്കിടയില്‍ നൂലുകള്‍ പ്രത്യേക അനുപാതത്തില്‍ നിരനിരയായി നിരത്തും. തുടര്‍ന്ന് ചോളം, കപ്പ എന്നിവയില്‍നിന്നു വേര്‍തിരിച്ചെടുത്ത പോളി ലാക്ടിക് ആസിഡ് യന്ത്രസഹായത്തോടെ പ്രത്യേക അളവില്‍ പേപ്പറിനു പുറത്തു പുരട്ടും.

ഫ്‌ളക്‌സ് പോലെതന്നെ വെയിലും മഴയും കൊണ്ടാലും നശിക്കില്ലെന്നു മാത്രമല്ല, ഏതു കാലാവസ്ഥയിലും മിന്നിത്തിളങ്ങാനും ബോഹറിനു കഴിയും. ഈ ഉത്പന്നത്തിനു ശുചിത്വമിഷന്റേയും മലിനീകരണ നിയന്ത്രണ ബോര്‍ഡിന്റേയും അംഗീകാരം ഇതിനോടകം ലഭിച്ചു കഴിഞ്ഞു. കോയമ്പത്തൂരില്‍നിന്നാണ് ഇതു സംസ്ഥാനത്തേക്ക് എത്തുക.

ഫ്‌ളക്‌സ് പ്രിന്റിംഗില്‍നിന്നു താരതമ്യേന ചെലവ് കൂടുതലാണു ബോഹറിന്. ചതുരശ്രയടിക്കു 12 രൂപ ഫ്‌ളക്‌സിന് ചെലവാകുമ്പോള്‍ ബോഹര്‍ പ്രിന്റ് ചെയ്യുന്നതിന് 20 മുതല്‍ 22 രൂപവരെയാണു ചെലവ്.

കോടതി വിധിയുടെ പശ്ചാത്തലത്തിലും, മണ്ണില്‍ അലിഞ്ഞു ചേരുമെന്നതിനാലും ബോഹറിനെ ജനങ്ങള്‍ സ്വീകരിക്കുമെന്നാണു പ്രതീക്ഷയെന്നു ഫ്‌ളക്‌സ് പ്രിന്റിംഗ് വ്യാപാരികള്‍ പറഞ്ഞു.

പരിസ്ഥിതി സൗഹൃദ വസ്തുക്കള്‍ കൊണ്ടുള്ള ബോര്‍ഡുകള്‍ മാത്രമേ ഉപയോഗിക്കാവൂ എന്നും അജൈവ ഉത്പന്നങ്ങള്‍ ഉപയോഗിക്കരുതെന്നും കഴിഞ്ഞ ദിവസം ഹൈക്കോടതി ഉത്തരവ് പുറപ്പെടുവിച്ചിരുന്നു. ഗുരുതരമായ പരിസ്ഥിതി പ്രശ്‌നങ്ങളുണ്ടാക്കുന്ന പോളിവിനൈല്‍ ക്ലോറൈഡ് ഫ്‌ളക്‌സുകള്‍ നിരോധിക്കണമെന്ന ആവശ്യത്തെത്തുടര്‍ന്നായിരുന്നു കോടതി ഉത്തരവ്.