കുടല്‍ പുണ്ണിനുള്ള ചികിത്സയ്ക്ക് ഔഷധമായി ഉപയോഗിക്കുന്ന കല്ലടി കൊമ്പന്‍ എന്ന ഈ സസ്യം ഇനി അറിയപ്പെടുക സെറോപീജിയ അരിയിട്ടപാറന്‍സിസ് എന്ന ശാസ്ത്രീയ നാമത്തിലായിരിക്കും. കാസര്‍കോട് ചീമേനി അരിയിട്ടപാറയില്‍ കണ്ടെത്തിയ സസ്യത്തിന് നാടിന്റെ പേരു ചേര്‍ത്ത് സെറോപീജിയ അരിയിട്ടപാറന്‍സിസ് എന്ന ശാസ്ത്രീയ നാമം നല്‍കി. മനോഹരമായ പൂക്കളുള്ളതാണ് വംശനാശ ഭീഷണി നേരിടുന്ന ഈ ചെടി. ഇതിനു സമാനമായ പൂക്കളുള്ള സസ്യങ്ങള്‍ ലോകത്ത് അത്യപൂര്‍വ്വമാണെന്നാണ് സസ്യ ശാസ്ത്രജ്ഞരുടെ കണ്ടെത്തല്‍.

സസ്യ ശാസ്ത്രം മേധാവി ഡോ.ജോമി അഗസ്റ്റിന്‍ (പാല സെന്റ് തോമസ് കോളജ് ), അധ്യാപകരായ പി.ബിജു ( കാസര്‍കോട് ഗവ.കോളജ്), ഡോ.ഇ.ജെ.ജോസ് കുട്ടി (തലശ്ശേരി ബ്രണ്ണന്‍ കോളജ്), ശാരത് കാംബ്ലെ (കോലാപുര്‍ സര്‍വകലാശാല ) , പീറ്റര്‍ ബ്രയന്‍സ് (ദക്ഷിണാഫ്രിക്കയിലെ കെയ്പ് ടൗണ്‍ ബോളസ് സര്‍വകലാശാല ) എന്നിവര്‍ ആണ് പഠന ഗവേഷണത്തിലൂടെ ഈ സസ്യത്തെ ശാസ്ത്ര ലോകത്തിനു പരിചയപ്പെടുത്തിയത്. ചീമേനി വെളിച്ചംതോട്ടെ കൊയ്യോന്‍ ശ്രീധരനാണ് ഔഷധ ഗുണം ഉള്ള ഈ സസ്യത്തെ പഠന സംഘത്തിനു പരിചയപ്പെടുത്തിയത്.

കാസര്‍കോട് പെരിയയില്‍ നിന്നു 2014-ല്‍ മഹാരാഷ്ട്ര കോലാപുര്‍ സര്‍വകലാശാല ഗവേഷണ സംഘം വംശനാശ ഭീഷണി നേരിടുന്ന ഇതിനു തുല്യമായ 2 സസ്യങ്ങളെ കണ്ടെത്തിയിരുന്നു. സെറോപീജിയ കോലാറെന്‍സിസ് , സെറോപീജിയ വാര്‍തക്കി എന്നീ ശാസ്ത്രീയ നാമങ്ങളില്‍ ആണ് ഇത് അറിയപ്പെടുന്നത്. ഇതിന്റെ കിഴങ്ങുകള്‍ പച്ചയായും ചുട്ടും കഴിക്കാറുണ്ടെന്നും സൂര്യ പ്രകാശം കാണിക്കാതെ മാത്രമേ കഴിക്കാവൂ എന്നാണ് പഴയ തലമുറ പറയുന്നതെന്നുമാണ് പെരിയ ആയംപാറയിലെ ജൈവ കര്‍ഷകന്‍ ഗോപിനാഥന്റെ സാക്ഷ്യപ്പെടുത്തല്‍.

മഴക്കാലത്ത് പാറയിടുക്കില്‍ ആണ് ചീമേനി അരിയിട്ട പാറയില്‍ കല്ലടക്കൊമ്പന്‍ വളരുന്നത്. വേനല്‍ എത്തുന്നതോടെ കിഴങ്ങ് മാത്രം ശേഷിക്കും. ചെടി നശിക്കും. ജൂണ്‍-ജൂലൈ മാസങ്ങളിലാണ് ഏതാനും ചെടികള്‍ ഇവിടെ തളിര്‍ക്കുക. മറ്റെവിടെയും ഇതിനെ കാണാനാവില്ലെന്നു കഴിഞ്ഞ 30 വര്‍ഷമായി ഔഷധ സസ്യങ്ങളുമായി ചങ്ങാത്തവും വ്യാപാരവുമുള്ള വെളിച്ചംതോട് കയ്യോന്‍ ശ്രീധരന്‍ പറയുന്നു.

അമ്മ പരേതയായ ഉര്‍വാടി പ്രധാന പാരമ്പര്യ ചികിത്സക ആയിരുന്നു. അവരില്‍ നിന്നാണ് 12 വയസ്സു മുതല്‍ ഔഷധ സസ്യങ്ങളെ പരിചയപ്പെടാന്‍ കഴിഞ്ഞത്. ഏകനായകം, കരിങ്കുറുഞ്ഞി, കുറുന്തോട്ടി തുടങ്ങിയവയെല്ലാം പയ്യന്നൂര്‍, തൃക്കരിപ്പുര്‍ തുടങ്ങിയ സ്ഥലങ്ങളിലെ പ്രധാന ആയുര്‍വേദ സ്ഥാപനങ്ങളില്‍ നല്‍കുന്നുണ്ട്.