മമ്മൂട്ടി ആരാധകര്‍ക്കും വിവാദങ്ങളില്‍ ഉലയുന്ന മലയാള സിനിമയ്ക്കും ആശ്വാസമായി മറ്റൊരു ബോക്‌സ് ഓഫീസ് വിജയംകൂടി. അബ്രഹാമിന്റെ സന്തതികള്‍ 45 ദിവസം കൊണ്ട് 50 കോടി കളക്ഷന്‍ നേടിയിരിക്കുകയാണ്. പുലിമുരുകന് ശേഷം ഏറ്റവും കൂടുതല്‍ കളക്ഷന്‍ നേടുന്ന മലയാള ചിത്രം എന്നാണ് നിര്‍മാതാക്കളായ ഗുഡ്‌വില്‍ എന്റര്‍ടെയിന്‍മെന്റ്‌സ് ഫെയിസ്ബുക്കിലൂടെ അറിയിച്ചിരിക്കുന്നത്. മമ്മൂട്ടി, മോഹന്‍ലാല്‍ ഫാന്‍സുകാര്‍ കളക്ഷനെ ചൊല്ലി കലഹിക്കാതിരിക്കാന്‍, പ്രൊഡ്യൂസേഴ്‌സ് അസോസിയേഷന്റെ നിര്‍ദ്ദേശപ്രകാരമാണ് കളക്ഷന്‍ പുറത്ത് വിടാത്തതെന്നും പോസ്റ്റില്‍ പറയുന്നു. ഇതേ തുടര്‍ന്ന് തിയേറ്റര്‍ അധികൃതരുമായി അണിയറയിലുള്ള ചിലരുമായും മലയാളിവാര്‍ത്ത നടത്തിയ അന്വേഷണത്തിലാണ് കളക്ഷന്‍ റിപ്പോര്‍ട്ട് ലഭിച്ചത്. 

തിരുവനന്തപുരം കൈരളി തിയേറ്റര്‍ ഉള്‍പ്പെടെയുള്ള സര്‍ക്കാര്‍ തിയേറ്ററികളില്‍ നിന്ന് 25 ദിവസം കൊണ്ട് നിര്‍മാതാവിന് 65 ലക്ഷം രൂപ ഷെയര്‍ ലഭിച്ചിരുന്നു. ഇത് സര്‍ക്കാര്‍ തിയേറ്ററുകളില്‍ നിന്ന് ഒരു നിര്‍മാതാവിന് ലഭിക്കുന്ന റെക്കോഡ് ഷെയറാണ്. ആലപ്പുഴയിലെ കൈരളി തിയേറ്ററില്‍ റെഗുലര്‍ ഷോയ്ക്ക് പുറമേ സ്‌പെഷ്യല്‍ ഷോയും കളിച്ചിരുന്നെന്ന് കെ.എസ്.എഫ്.ഡി.സി വൃത്തങ്ങള്‍ പറയുന്നു. പതിനൊന്നരക്കോടി മുടക്കി നിര്‍മിച്ച ചിത്രം ആദ്യ മൂന്ന് ദിവസം എട്ടരക്കോടി കളക്ട് ചെയ്തിരുന്നു. സാധാരണ മമ്മൂട്ടി ചിത്രങ്ങള്‍ക്ക് 50 ലക്ഷമാണ് ഓവര്‍സീസ് കിട്ടുന്നത്. ഈ ചിത്രം ഹിറ്റായതിനാല്‍ അത് ചിലപ്പോള്‍ 60 ലക്ഷം വരെയാകും. സൂര്യാടി.വിയാണ് സാറ്റലൈറ്റ് അവകാശം വാങ്ങിയത്. അതിലൂടെ ഏതാണ്ട് അഞ്ച് കോടിയോളം ലഭിച്ചിരിക്കും.

2016ലെ റമസാനോട് അനുബന്ധിച്ച് റിലീസായ കസബയും മികച്ച ഇനീഷ്യല്‍ കളക്ഷന്‍ നേടിയിരുന്നു. ആ ചിത്രത്തിന്റെ നിര്‍മാതാവായ ജോബി ജോര്‍ജ്ജും മമ്മൂട്ടിയും വീണ്ടും ഒന്നിച്ച സിനിമയാണ് അബ്രഹാമിന്റെ സന്തതികള്‍. ഗ്രേറ്റ്ഫാദറിന്റെ സംവിധായകന്‍ ഹനീഫ് അദേനി തിരക്കഥയെഴുതി എന്ന പ്രത്യേകതയുമുണ്ട്. നോണ്‍ ലീനിയര്‍ എഡിറ്റിംഗ് നടത്തിയ ചിത്രം മികച്ച ത്രില്ലറാണ്. അതില്‍ ക്രൈമും അന്വേഷണവും കബളിപ്പിക്കലും എല്ലാം കടന്ന് വരുന്നു. സാധാരണ ത്രില്ലര്‍ സിനിമകളില്‍ നിന്ന് വ്യത്യസ്തമായി ഇതൊരു നിയോനോര്‍ (നല്ലതും ചീത്തയും) ഗണത്തില്‍ പെടുത്താവുന്ന സിനിമയാണ്. ഇതിലെ നായകനായ ഡെറിക് എബ്രഹാം എന്ന ഐ.പി.എസ് ഉദ്യോഗസ്ഥന്‍ ചെയ്യുന്ന പല കാര്യങ്ങളും നിയമവിരുദ്ധമാണ്, എന്നാല്‍ ധാര്‍മികവും. നിയമത്തിന്റെ കണ്ണിലൂടെ കാണുമ്പോള്‍ കുറ്റവും ധാര്‍മികതയുടെ കുഴലിലൂടെ നോക്കുമ്പോള്‍ ന്യായവും ആകുന്ന കാര്യങ്ങള്‍. വിജയ്‌സേതുപതിയും മാധവനും അഭിനയിച്ച വിക്രംവേദയും ഇതേ പ്രമേയമാണ് പറഞ്ഞത്.

20 വര്‍ഷമായി ജോഷി ഉള്‍പ്പെടെയുള്ള പ്രമുഖസംവിധായകരുടെ അസോസിയേറ്റായി പ്രവര്‍ത്തിച്ച ഷാജി പാടൂരിന്റെ ആദ്യസിനിമയാണ് അബ്രഹാമിന്റെ സന്തതികള്‍. ഷാജിക്ക് സിനിമയോടുള്ള പാഷനും ജോലി ചെയ്യുന്നതിലുളള ആത്മാര്‍ത്ഥതയും കണ്ട് പത്ത് വര്‍ഷം മുമ്ബ് മമ്മൂട്ടി ഓപ്പണ്‍ഡേറ്റ് കൊടുത്തതാണ്. എന്നാല്‍ ഇഷ്ടപ്പെട്ട കഥ കിട്ടാത്തതിനാല്‍ ഷാജി കാത്തിരിക്കുകയായിരുന്നു. കഥ അവതരിപ്പിക്കുന്നതില്‍ തഴക്കവും പഴക്കവും പുതുമയും ഷാജി കാട്ടിത്തരുന്നു.