വിവാഹം ജീവിതം എന്നത് പവിത്രമായ ഒന്നാണ്. അതിന്റെ പവിത്രത അളക്കാന്‍ ആര്‍ക്കും കഴിയില്ല എന്നുതന്നെ പറയാം. പരസ്പര സ്‌നേഹത്തിന്റെയും സൗഹൃദത്തിന്റെയും വിശ്വാസത്തിന്റെയും ഒത്തുകൂടല്‍ തന്നെയാണ് കുടുംബം. എന്നാല്‍ ഈ സ്‌നേഹവും കരുതലും ഒന്നും അല്ലാതെ മറ്റെന്തിനെങ്കിലും വേണ്ടി പോകുന്ന ചില മാന്യന്മാരും മഹതികളും ഇന്ന് നമ്മുടെ നാട്ടില്‍ ഉണ്ട്.

ഇത്തരക്കാര്‍ക്ക് കുടുംബ ബന്ധത്തിന്റെ വില എന്തെന്നും ഭാര്യഭതൃബന്ധം എന്തെന്നും തിരിച്ചറിയില്ല. ഇവര്‍ തേടി പോകുന്ന സുഖസൗകര്യങ്ങള്‍ക്ക് തടസ്സാമാകുന്നവരെ യാതൊരു ദാക്ഷ്യണ്യവുമില്ലാതെ കൊല്ലുന്ന കാഴ്ച. അത്തരത്തിലൊരു ഹ്രസ്വ ചിത്രം ബാങ്ക് ഉദ്യോഗസ്ഥനായ അഭിലാഷ് പുരുഷോത്തമന്‍ കഥയെഴുതി നിര്‍മ്മിച്ചിട്ടുണ്ട്.

ഈ ഹ്രസ്വ ചിത്രം നിരവധി ഹ്രസ്വ ചലച്ചിത്ര മേളകളില്‍ പ്രദര്‍ശിപ്പിക്കുകയും പുരസ്‌കാരങ്ങള്‍ നേടുകയും ചെയ്തിട്ടുണ്ട്. വിവാഹം കഴിഞ്ഞ് കുടുംബജീവിതം നയിക്കുന്ന രണ്ട് പേര്‍ തമ്മിലുള്ള അവിഹിത ബന്ധവും ഒന്നിച്ചു ജീവിക്കാന്‍ ഇരുവരും തങ്ങളുടെ ജീവിത പങ്കാളികളെ രാത്രിയില്‍ കൊലപ്പെടുത്തുന്നതുമാണ് 'ബെറ്റര്‍ ഹാഫി'ന്റെ പ്രമേയം.

ഒരു വര്‍ഷം മുമ്പ് നിര്‍മ്മിച്ച ഈ ഹ്രസ്വ ചിത്രം കേരളത്തിലും മറ്റ് പലസ്ഥലങ്ങളിലും നടന്നിട്ടുള്ള കുറ്റകൃത്യങ്ങളെ പശ്ചാത്തലമാക്കിയാണ്. 'ദി ബെറ്റര്‍ ഹാഫ്' എന്ന ഹ്രസ്വ ചിത്രത്തില്‍ ചലച്ചിത്ര താരങ്ങളായ പ്രിയങ്ക നായരും അനീഷ് റഹ്മാനുമാണ് കേന്ദ്ര കഥാപാത്രങ്ങള്‍. സംഗീത സംവിധായകനായ മിഥുന്‍ മുരളിയാണ് പശ്ചാത്തല സംഗീതം. പ്രശാന്ത് ദീപു, ലിജു എന്നിവര്‍ ചേര്‍ന്ന് ക്യാമറ ചെയ്ത ചിത്രത്തിന്റെ എഡിറ്റിംഗ് മിഥുനും, എഫ്ഫക്‌റ്‌സ് വിപിനും ഡിസൈനിങ് ഷൈനും ചെയ്തിരിക്കുന്നു.