മോഹന്‍ലാല്‍ ജീത്തു ജോസഫ് ചിത്രം 'ദൃശ്യം 3'യുടെ തെലുങ്ക് പതിപ്പിന്റെ ഒടിടി റിലീസ് മദ്രാസ് ഹൈക്കോടതി താല്‍ക്കാലികമായി തടഞ്ഞു. ഒടിടി റിലീസിന് കൃത്യം ഒരു ദിവസം ബാക്കിനില്‍ക്കെയാണ് കോടതിയുടെ ഇടക്കാല ഉത്തരവ്. സിനിമാ നിര്‍മ്മാണ കമ്പനിയായ രാജ്കുമാര്‍ തിയറ്റേഴ്‌സ് പ്രൈവറ്റ് ലിമിറ്റഡ് നല്‍കിയ ഹര്‍ജിയിലാണ് ഹൈക്കോടതി നടപടി.

2013ല്‍ പുറത്തിറങ്ങിയ 'ദൃശ്യം ഒന്നിന്റെ വന്‍ വിജയത്തിന് പിന്നാലെ ചിത്രത്തിന്റെ തെലുങ്ക് റീമേക്ക് അവകാശം സ്വന്തമാക്കിയത് രാജ്കുമാര്‍ തിയറ്റേഴ്‌സിന്റെ ഉടമ രാജ്കുമാര്‍ സേതുപതിയായിരുന്നു. കമല്‍ഹാസന്റെ നിര്‍ദ്ദേശപ്രകാരം വെങ്കിടേഷിനെ നായകനാക്കി ശ്രീപ്രിയ സംവിധാനം ചെയ്ത 'ദൃശ്യം' (2014) തെലുങ്ക് പതിപ്പ് ആ വര്‍ഷത്തെ ഏറ്റവും വലിയ കളക്ഷന്‍ നേടിയ ചിത്രങ്ങളിലൊന്നായി മാറി.

പിന്നീട് 2021ല്‍ 'ദൃശ്യം 2' വന്നപ്പോള്‍ അതിന്റെ തെലുങ്ക് പതിപ്പ് ആന്റണി പെരുമ്പാവൂരിന്റെ ആശീര്‍വാദ് സിനിമാസ്, സുരേഷ് പ്രൊഡക്ഷന്‍സ്, രാജ്കുമാര്‍ തിയറ്റേഴ്‌സ് എന്നിവര്‍ ചേര്‍ന്നായിരുന്നു നിര്‍മ്മിച്ചത്. മുന്‍കാല കരാറുകള്‍ പ്രകാരം ദൃശ്യം ഫ്രാഞ്ചൈസിയുടെ തെലുങ്ക് ഭാഷയിലുള്ള റീമേക്ക് വിതരണ അവകാശങ്ങള്‍ തങ്ങള്‍ക്ക് മാത്രമാണുള്ളതെന്നാണ് രാജ്കുമാര്‍ തിയറ്റേഴ്‌സിന്റെ വാദം. 'ദൃശ്യം 3'ന് പ്രത്യേകമായി തെലുങ്ക് റീമേക്ക് നിര്‍മ്മിച്ചിട്ടില്ലെങ്കില്‍ പോലും അതിന്റെ തെലുങ്ക് പതിപ്പ് തങ്ങളുടെ അനുമതിയില്ലാതെ ഒടിടിയിലൂടെ പുറത്തുവിടുന്നത് പകര്‍പ്പവകാശ ലംഘനമാണെന്ന് കമ്പനി ചൂണ്ടിക്കാണിക്കുന്നു.

തങ്ങളുടെ അനുമതിയില്ലാതെ ലോകത്ത് ഒരിടത്തും 'ദൃശ്യം 3' തെലുങ്ക് പതിപ്പ് റിലീസ് ചെയ്യരുതെന്ന് ആവശ്യപ്പെട്ട് ആശീര്‍വാദ് സിനിമാസിന്റെ ആന്റണി പെരുമ്പാവൂര്‍, സംവിധായകന്‍ ജീത്തു ജോസഫ്, പനോരമ സ്റ്റുഡിയോസ്, പെന്‍ സ്റ്റുഡിയോസ് എന്നിവര്‍ക്കെതിരെയാണ് രാജ്കുമാര്‍ തിയറ്റേഴ്‌സ് കോടതിയെ സമീപിച്ചത്.