ഒടുവില്‍ സത്യം പുറത്തുവരുന്നു. സുരേഷ്‌ഗോപിയെ എന്‍.എസ്.എസ് ആസ്ഥാനത്ത് നിന്ന് ഇറക്കി വിടാനിടയായ സാഹചര്യത്തിലേക്ക് നയിച്ചത് നവ്യാനായരുടെ ബന്ധുവാണെന്ന് അറിയുന്നു. സുരേഷ്‌ഗോപി മന്നം സമാധിയില്‍ പുഷ്പാര്‍ച്ചന നടത്തിയ ശേഷം കാറില്‍ കയറി മടങ്ങാന്‍ ഒരുങ്ങുമ്പോള്‍ ഇയാള്‍ നിര്‍ബന്ധിച്ച് കൂട്ടികൊണ്ട് പോവുകയായിരുന്നു. വന്നിട്ട് മണിയണ്ണനെ (സുകുമാരന്‍ നായരെ) കണ്ടിട്ട് പോകാതിരുന്നാല്‍ മോശമാണ്. വി.എം സുധീരനും മറ്റും വന്നിട്ട് കണ്ടിട്ട് പോകാഞ്ഞത് വിവാദമായിരുന്നെന്നും ഇയാള്‍ സുരേഷ് ഗോപിയോട് പറഞ്ഞു. തുടര്‍ന്നാണ് താരം ഹാളില്‍ പ്രവേശിച്ചത്.
പ്രതിനിധി സഭാംഗം സുരേഷ് ഗോപിയെ വിളിച്ച് കൊണ്ടുവന്നതിനാല്‍ സെക്യൂരിറ്റി പോലും തടഞ്ഞില്ലെന്ന് ദൃക്‌സാക്ഷികള്‍ പറയുന്നു. എനിക്ക് പരിചയമുള്ള ഒരാളാണ് കൂട്ടിക്കൊണ്ട് പോയതെന്ന് സുരേഷ്‌ഗോപി സംഭവ ദിവസം പറഞ്ഞിരുന്നു. നവ്യയുടെ കല്യാണത്തിന് പോയപ്പോഴും ഷൂട്ടിംഗ് ലൊക്കേഷനുകളില്‍ കണ്ടും ഉള്ള പരിചയമായിരുന്നു അത്. എന്നാല്‍ കാര്യങ്ങള്‍ കൈ വിട്ട് പോയതോടെ ഇയാള്‍ മുങ്ങുകയായിരുന്നു. പിന്നീട് സുകുമാരന്‍ നായര്‍ ഇയാളെ ശാസിച്ചെന്നാണ് അറിയുന്നത്.
സുരേഷ്‌ഗോപിയെ ഇറക്കി വിട്ടതോടെ സുകുമാരന്‍ നായര്‍ക്കെതിരെ പ്രതിഷേധം വ്യാപകമായിട്ടുണ്ട്. പല കരയോഗങ്ങളും ജനറല്‍ സെക്രട്ടറിക്കെതിരെ പ്രമേയം പാസാക്കി.