പ്രണയിക്കുന്നവര്‍ക്ക് ഒരിക്കലും മറക്കാനാവില്ലാത്ത ചിത്രമാണ് സുഖമോ ദേവിയും അതിലെ ലാലിന്റെ കഥാപാത്രവും. അതിലെ പാട്ടുകള്‍ അത്രത്തോളം മികച്ചതും ആയിരുന്നു. മോഹന്‍ലാലിന്റെ സണ്ണി എന്ന കഥാപാത്രം പാട്ടുകാരനും കായിക താരവുമായിരുന്നു. സണ്ണിയുടെ മരണം എല്ലാ പ്രേക്ഷകരെയും വേദനിപ്പിച്ചിട്ടുണ്ട്. ആ രംഗം ഷൂട്ട് ചെയ്തുകൊണ്ടിരിക്കുമ്പോള്‍ അസാധാരണമായ ഒരു സംഭവമുണ്ടായി. മോഹന്‍ലാല്‍ കഥാപാത്രമായി ശവപ്പെട്ടിയില്‍ കിടക്കുകയാണ്. ആ രംഗം കണ്ടുകൊണ്ട് നില്‍ക്കുന്നതിനിടെ സംവിധായകന്‍ വേണുനാഗവള്ളി കണ്ണീര്‍ പൊഴിക്കുന്നുണ്ടായിരുന്നു. അതിന്റെ കാരണം യഥാര്‍ത്ഥത്തില്‍ ലാല്‍ അവതരിപ്പിച്ച സിനിമയിലെ സണ്ണി എന്ന കഥാപാത്രം വേണുവിന്റെ ഉറ്റസുഹൃത്തായിരുന്നു. 

അതില്‍ ശങ്കര്‍ അവതരിപ്പിച്ച കഥാപാത്രം വേണുനാഗവള്ളിയും. സുഹൃത്തിന്റെ വേര്‍പിരിയല്‍ വേണുവിന് ഒട്ടും സഹിക്കാവുന്നതായിരുന്നില്ല. അത് സിനിമയില്‍ പുനവതരിപ്പിക്കപ്പെട്ടതിന്റെ വിങ്ങലിലായിരുന്നു അദ്ദേഹം. പെട്ടെന്ന് ആ മുറിയുടെ കതകുതുറന്ന് രണ്ടുപേര്‍ അവിടേയ്ക്ക് വന്നു. ഒരു സ്ത്രീയും ഒരു പുരുഷനും. അവര്‍ ലാല്‍ കിടന്നിരുന്ന ശവമഞ്ചത്തിലേക്ക് ഒന്ന് നോക്കിയതേയുള്ളൂ. പെട്ടെന്ന് ഈറനണിഞ്ഞ് പുറത്തേക്ക് പോയി. അത് യഥാര്‍ത്ഥസണ്ണിയുടെ സഹോദരനും സണ്ണി സ്‌നേഹിച്ചിരുന്ന പെണ്‍കുട്ടിയുമായിരുന്നു. സണ്ണിയുടെ മരണശേഷം ആ പെണ്‍കുട്ടിയെ(സിനിമയില്‍ ഗീത അവതരിപ്പിച്ച കഥാപാത്രം താര) വിവാഹം കഴിച്ചത് സണ്ണിയുടെ സഹോദരനായിരുന്നു(സിനിമയില്‍ ആ വേഷം ചെയ്തത് കെ.പി.എ.സി. സണ്ണിയും). 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha