കഥാപാത്രങ്ങളുടെ വ്യത്യസ്തതയിൂടെ പ്രേക്ഷകരെ ഞെട്ടിക്കുന്ന പൃഥ്വിരാജ് പാവാടയിലും നിരാശരാക്കിയില്ല. നല്ല കഥയുടെ പിന്‍ബലമുള്ള കാമ്പുള്ള ചിത്രമാണ് പാവാട. പ്രമേയത്തില്‍ വ്യത്യസ്തത പുലര്‍ത്തുന്ന പാവാട പൃഥ്വിരാജിന്റെ വിജയവഴിയില്‍ വിള്ളല്‍ വീഴ്ത്തില്ലെന്നുറപ്പിക്കാം.
പ്രത്യക്ഷത്തില്‍ ഒരു ബന്ധവുമില്ലാത്ത രണ്ടു മദ്യപാനികള്‍. പാവാട ബാബുവും (അനൂപ് മേനോന്‍) പാമ്പ് ജോയിയും (പൃഥ്വിരാജ്). ഇവര്‍ യാദൃശ്ചികമായി കണ്ടു മുട്ടുന്നതും പിന്നീട് അവര്‍ തമ്മിലുള്ള ബന്ധം അവര്‍ തന്നെ മനസ്സിലാക്കുന്നതും തുടര്‍ന്നുണ്ടാകുന്ന സംഭവവികാസങ്ങളുമാണ് ചിത്രത്തിന്റെ പ്രമേയം.
സിനിമയുടെ തുടക്കം തന്നെ വ്യത്യസ്തമാണ് ഒപ്പം ആകര്‍ഷണീയവുമാണ്. കഥാപാത്രങ്ങളെയും അവരുടെ പശ്ചാത്തലത്തെയും പ്രേക്ഷകന് പരിചയപ്പെടുത്തുന്നതാണ് അദ്യ പകുതി. അതിന് മേമ്പൊടിയായി നര്‍മരംഗങ്ങളുടെ സാന്നിധ്യമുണ്ടെങ്കിലും എടുത്തു പറയേണ്ടവയൊന്നുമില്ല. ആദ്യ പകുതി അല്‍പം വലിച്ചു നീട്ടി \'വല്യപാവാട\' ആക്കിയിട്ടുമുണ്ട്.
എന്നാല്‍ രണ്ടാം പകുതിയിലേക്ക് എത്തുമ്പോള്‍ സിനിമയുടെ സ്വഭാവം തന്നെ മാറുന്നു. കഥയ്ക്കും കഥാപാത്രങ്ങള്‍ക്കും ഗൗരവസ്വഭാവം കൈവരുന്നതോടെ ചിത്രം കൂടുതല്‍ ആസ്വാദ്യകരമാകുന്നു. തങ്ങളുടെ ജീവിതത്തെ തളര്‍ത്തിയ ഒരു പ്രതിസന്ധി വര്‍ഷങ്ങള്‍ക്കു ശേഷം വീണ്ടും എത്തുന്നുവെന്നറിഞ്ഞ് അത് തടയാന്‍ ഇതിലെ കഥാപാത്രങ്ങള്‍ നടത്തുന്ന ശ്രമങ്ങള്‍ പ്രേക്ഷകനെ പിടിച്ചിരുത്തും. അതൊക്കെ വളരെ റിയലിസ്റ്റിക്കായി ദൃശ്യവത്കരിക്കാ സംവിധായകനും തിരക്കഥാകൃത്തിനും കഴിഞ്ഞിട്ടുമുണ്ട്.
അഭിനയനിരയിലേക്കെത്തിയാല്‍ പൃഥ്വിരാജിന്റെ കിരീടത്തിലെ മറ്റൊരു പൊന്‍തൂവലാകും പാമ്പ് ജോയ്. ആദ്യ പകുതിയിലെ നര്‍മരംഗങ്ങളിലും മറ്റും ചെറിയൊരു അസ്വാഭാവികത അനുഭവപ്പെടുമെങ്കിലും രണ്ടാം പകുതി പൃഥ്വിരാജ് എന്ന നടന്റെ ഡെപ്ത് മനസ്സിലാക്കി കൊടുക്കുന്നതാണ്. വികാരനിര്‍ഭരമായ രംഗങ്ങള്‍ അദ്ദേഹം അനായാസം കൈകാര്യം ചെയ്തു. പൃഥ്വിക്കൊപ്പം അനൂപ് മേനോനും മികച്ച പ്രകടനം കാഴ്ച വച്ചു.
എടുത്തു പറയേണ്ടത് നേടുമുടി വേണു, സിദ്ദിഖ് എന്നീ പഴയ തലമുറയിലെ താരങ്ങളെക്കുറിച്ചാണ്. വളരെ ലാഘവത്തോടെ, തന്മയത്തതോടെ ഇരുവരും തങ്ങളുടെ കഥാപാത്രങ്ങളെ ആവിഷ്‌കരിച്ചു. മിയ, രഞ്ജി പണിക്കര്‍, ആശ ശരത്, ചെമ്പന്‍ വിനോദ്, ഷാജോണ്‍, സുധീര്‍ കരമന തുടങ്ങിയ താരങ്ങളും തങ്ങളുടെ കഥാപാത്രങ്ങള്‍ മികച്ചതാക്കി.
ഛായാഗ്രഹണവും സംഗീതവും ഒക്കെ സിനിമയ്ക്ക് ഇണങ്ങുന്നതായിരുന്നു. മേക്കപ്പ് കൈകാര്യം ചെയ്തവര്‍ പൃഥ്വിയുള്‍പ്പടെയുള്ള കുടിയന്മാരെ ഒരുക്കിയത് കുറച്ചകൂടി നന്നാക്കാമായിരുന്നു. കണ്ണുകള്‍ വല്ലാതെ ചുവപ്പിച്ച് ചുറ്റും കറുപ്പിച്ചപ്പോള്‍ കണ്ടിരിക്കുന്നവര്‍ക്ക് അരോചകമായി തോന്നിയാല്‍ അത്ഭുതപ്പെടാനില്ല. ടിപ്പിക്കല്‍ മദ്യപാനികളുടെ രൂപം ഇങ്ങനെയാണെന്ന് ഊട്ടിയുറപ്പിക്കുന്നതായി മേക്കപ്പ്.
കഥയും തിരക്കഥയും ഒരുക്കിയ ബിപിന്‍ ചന്ദ്രന്‍ അഭിനന്ദനം അര്‍ഹിക്കുന്നു. കഥ തന്നെയാണ് ഈ സിനിമയുടെ കരുത്തും. അച്ഛാ ദിന്‍ എന്ന ചിത്രത്തിന് ശേഷം മാര്‍ത്താണ്ഡന്‍ എന്ന സംവിധായകന്‍ നടത്തിയ ശക്തമായ തിരിച്ചുവരവു കൂടിയാണ് പാവാട.
മികച്ച കഥ, വികാരനിര്‍ഭരമായ രംഗങ്ങള്‍, ചെറിയ സസ്‌പെന്‍സുകള്‍, ആരും പ്രതീക്ഷിക്കാത്ത ഒരു ഗസ്റ്റ് റോള്‍ എല്ലാം കൂടി ചേരുമ്പോള്‍ പാവാട പ്രേക്ഷകനെ രസിപ്പിക്കുന്നതാകും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha