കാബൂളില്‍ സ്‌കൂളിനു സമീപമുണ്ടായ ഗ്രനേഡ് ആക്രമണത്തില്‍ അമ്പതോളം കുട്ടികള്‍ക്കു പരുക്ക്. ഇന്ന് ഉച്ചയ്ക്കുശേഷമായിരുന്നു സ്‌ഫോടനമെന്ന് അഫ്ഗാന്‍ മാധ്യമങ്ങളാണ് സംഭവം റിപ്പോര്‍ട്ട് ചെയ്തത്. സംഭവത്തില്‍ ഉന്നതതല അന്വേഷണം ആരംഭിച്ചതായും കാബൂള്‍ പൊലീസ് വക്താവ് ഖാലിദ് സദ്രാന്‍ സ്ഥിരീകരിച്ചു. അഫ്ഗാനിസ്ഥാനിലെ കാബൂളിലെ ഷിയാ മുസ്‌ലിം വിഭാഗക്കാരായ ഹസാര വംശജര്‍ ഭൂരിപക്ഷമുള്ള പ്രദേശത്താണ് ആക്രമണം.

സ്‌കൂളിനു സമീപം കുട്ടികളെ ലക്ഷ്യമിട്ടുണ്ടായ ഹീനമായ ആക്രമണത്തെ അഫ്ഗാനിസ്ഥാനിലെ ഐക്യരാഷ്ട്രസംഘടനയുടെ പ്രത്യേക പ്രതിനിധി റിച്ചാര്‍ഡ് ബെന്നറ്റ് അപലപിച്ചു. ദാരുണ സംഭവത്തില്‍ സ്വതന്ത്രമായ അന്വേഷണം നടത്തി കുറ്റക്കാരെ നിയമത്തിനു മുന്നില്‍ കൊണ്ടുവരേണ്ടത് അടിയന്തര ആവശ്യമാണെന്ന് റിച്ചാര്‍ഡ് ബെന്നറ്റ് എക്‌സിലൂടെ ആവശ്യപ്പെട്ടു. ഹസാരകള്‍ കൂടുതലായി താമസിക്കുന്ന കാബൂളിന്റെ ഈ ഭാഗം വീണ്ടും ലക്ഷ്യം വയ്ക്കപ്പെടുന്നത് അങ്ങേയറ്റം അപലപനീയമാണെന്നും അദ്ദേഹം പറഞ്ഞു.