കഴിഞ്ഞ വര്‍ഷത്തെ ഏറ്റവും വലിയ വിജയങ്ങളില്‍ ഒന്നായിരുന്നു ആദിത്യ ധര്‍ സംവിധാനം ചെയ്ത് നടന്‍ രണ്‍വീര്‍ സിംഗ് പ്രധാന വേഷത്തിലെത്തിയ 'ധുരന്ധര്‍'. 1300 കോടിയോളം ആഗോള ബോക്‌സ് ഓഫീസ് കളക്ഷന്‍ നേടിയ ചിത്രത്തിന്റെ രണ്ടാം ഭാഗം മാര്‍ച്ച് 19 ന് തിയേറ്ററുകളില്‍ എത്തുകയാണ്. ഇപ്പോഴിതാ 'ധുരന്ധര്‍ 2' പ്രിവ്യു ഷോകള്‍ക്ക് മാത്രമായി 2 ദിവസം കൊണ്ട് 12 കോടിയുടെ ടിക്കറ്റുകളാണ് വിറ്റുപോയത് എന്നാണ് സാക്‌നില്‍ക് റിപ്പോര്‍ട്ട് ചെയ്യുന്നത്.

രണ്‍വീര്‍ സിംഗ് ജസ്‌കിരത് സിംഗ് രംഗിയായും ഹംസയായും തന്റെ ഇരട്ട അവതാരങ്ങളില്‍ എത്തുന്ന ചിത്രം, ചരിത്രത്തില്‍ അജ്ഞാതരായ കഥാപാത്രങ്ങളുടെ ജീവിതത്തില്‍ നടക്കുന്ന വമ്പന്‍ സംഘര്‍ഷങ്ങളുടെ കഥയാണ് പറയുന്നത്. ആദിത്യ ധര്‍ ഒരുക്കിയ ചിത്രത്തിന്റെ ആദ്യ ഭാഗം ഇന്ത്യയിലും അന്താരാഷ്ട്രതലത്തിലും, പ്രത്യേകിച്ച് വടക്കേ അമേരിക്ക, കാനഡ, യുകെ, ഓസ്‌ട്രേലിയ എന്നിവിടങ്ങളില്‍ റെക്കോര്‍ഡ് ബോക്‌സ് ഓഫീസ് പ്രകടനമാണ് നടത്തിയത്. സിനിമാ വ്യവസായവും എക്‌സിബിറ്റര്‍മാരും, രണ്ടാം ഭാഗമായ ധുരന്ധര്‍ പ്രതികാരത്തില്‍ വമ്പന്‍ പ്രതീക്ഷയാണ് പുലര്‍ത്തുന്നത്. ചിത്രത്തിന്റെ മഹാവിജയത്തില്‍ സിനിമാ വ്യവസായം ഒന്നടങ്കം പന്തയം വെക്കുന്നതോടെ, ചിത്രത്തെ കുറിച്ചുള്ള പ്രതീക്ഷകള്‍ ഒരിക്കല്‍ കൂടി വാനോളം ഉയരുകയാണ്.

ബി62 സ്റ്റുഡിയോ നിര്‍മ്മിച്ച് ജിയോ സ്റ്റുഡിയോ അവതരിപ്പിക്കുന്ന ഈ ആദിത്യ ധര്‍ ചിത്രം, ഹിന്ദി, തമിഴ്, തെലുങ്ക്, മലയാളം, കന്നഡ എന്നീ അഞ്ച് ഭാഷകളില്‍ ആണ് റിലീസ് ചെയ്യാന്‍ പോകുന്നത്. 2026 മാര്‍ച്ച് 19ന് ചിത്രം ആഗോളതലത്തില്‍ തിയേറ്ററുകളില്‍ എത്തും. ഗുഡി പഡ്വയുടെയും ഉഗാദിയുടെയും അവസരത്തിലും ഈദിന് മുന്നോടിയായും പുറത്തിറങ്ങുന്ന ചിത്രം രചിച്ചതും സംവിധായകന്‍ ആദിത്യ ധര്‍ തന്നെയാണ്. ജ്യോതി ദേശ്പാണ്ഡെയും ലോകേഷ് ധറും ആദിത്യ ധറും ചേര്‍ന്നാണ് ഈ മെഗാ മാസ്സ് ആക്ഷന്‍ സ്‌പൈ ത്രില്ലര്‍ നിര്‍മ്മിച്ചിരിക്കുന്നത്. പിആര്‍ഒ – ശബരി.