രണ്ടു പേരും ഒരേ നാട്ടുകാര്‍, പരിചയക്കാര്‍ ഒരേ ഫീല്‍ഡില്‍ ജോലി ചെയ്യുന്നവര്‍, എന്നാല്‍ ഒരുമിച്ച് ഒരു സിനിമയില്‍ അഭിനയിക്കാന്‍ കഴിഞ്ഞത് തെലുങ്കിലെത്തിയപ്പോഴാണെന്നു മാത്രം. മറ്റാരുടെയും കാര്യമല്ല നമ്മുടെ പെരുമ്പാവൂരുകാരന്‍ ജയറാമിന്റെയും ആശാ ശരത്തിന്റെയും കാര്യമാണ് പറഞ്ഞത്. രണ്ടു പേരും പണ്ട് മുതലേ പരിചയക്കാരാണെങ്കിലും ഇത് വരെ മലയാള സിനിമയില്‍ ഒരുമിച്ച് ഒരു സിനിമയില്‍ അഭിനയിക്കാന്‍ രണ്ടു പേര്‍ക്കും കഴിഞ്ഞിട്ടില്ല.

നൃത്ത രംഗത്ത് സജീവമായിരുന്ന ആശാ ശരത് ഇപ്പോള്‍ മലയാളത്തില്‍ അത്യാവശ്യം തിരക്കുള്ള നടിയായി മാറിയിരിക്കുകയാണ്. നേരത്തെ ആശാ ശരത് പ്രീഡിഗ്രിക്കു പഠിക്കുമ്പോള്‍ സൈക്കിളെടുത്ത് പുറകെ നടക്കുകയായിരുന്നു പണി എന്ന് ജയറാം ഒരു സ്റ്റേജ് ഷോയില്‍ പറഞ്ഞിരുന്നു. എന്നാല്‍ ജയറാം അന്ന് പറഞ്ഞതില്‍ വാസ്തവമില്ലെന്ന് ആശ ശരത് പറയുന്നത്.

'അടുത്തടുത്ത വീടുകളാണ് എന്റെയും ജയറാമേട്ടന്റെയും. അദ്ദേഹത്തിന്റെ അനിയത്തി മഞ്ജുവും ഞാനും ക്ലാസ്‌മേറ്റ്‌സാണ്. ഞാന്‍ സ്‌കൂളില്‍ പഠിക്കുമ്പോഴേ ജയറാമേട്ടന്‍ സിനിമയില്‍ നായകനായി. പ്രീഡിഗ്രിക്ക് പഠിക്കുമ്പോള്‍ കോളജ് ഡേ ഉദ്ഘാടനത്തിന് ജയറാമേട്ടനെ വിളിച്ചുകൊണ്ടു പോയിട്ടുണ്ട്. 'കമലദളത്തില്‍ ഒരു റോളുണ്ട്, പോയി അഭിനയിക്കൂ' എന്നു പറഞ്ഞത് ജയറാമേട്ടനായിരുന്നു. അന്ന് അതിനു പറ്റിയില്ല... എന്റെ പിന്നാലെ സൈക്കിളെടുത്ത് കറങ്ങുമായിരുന്നു എന്നൊക്കെ പറഞ്ഞത് വെറും നുണയാ...'' ആശ ശരത് ഒരു ദേശീയ മാധ്യമത്തിന് നല്‍കിയ അഭിമുഖത്തില്‍ പറഞ്ഞു.

തന്റെ ആദ്യ തെലുങ്ക് ചിത്രമായ 'ഭാഗ്മതി' എന്ന ചിത്രത്തിലാണ് ജയറാമിനൊപ്പം അഭിനയിക്കാന്‍ അവസരം ലഭിച്ചതെന്നും ആശാ ശരത് പറയുന്നു. ഒരു വിവാഹ സല്‍ക്കാര ചടങ്ങിനിടയില്‍ ജയറാം രസകരമായി ഈ സംഭവം പറഞ്ഞതും ആശാ ശരത് ഓര്‍ക്കുന്നു, 'അങ്ങനെ വന്നുവന്ന് അങ്ങ് തെലുങ്കില്‍ പോകേണ്ടി വന്നു, ആശയോടൊപ്പം ഒരു പടം ചെയ്യാന്‍'.. സിനിമയില്‍ വന്നതിനു ശേഷം ഒരുപാടു നാളുകള്‍ക്കു ശേഷമാണു രണ്ടു പേരും ഒന്നിക്കുന്നതെന്നും ആശാ ശരത് പറഞ്ഞു.