ഫ്രൈഡേ ഫിലിം ഹൗസിന്റെ ഉടമസ്ഥ തര്‍ക്കം അടിപിടിയില്‍ എത്തിയിരിക്കെ വിശദീകരണവുമായി വിജയ്ബാബു രംഗത്ത്. താന്‍ മര്‍ദിച്ചതായി കാണിച്ച് സാന്ദ്രാ തോമസ് നല്‍കിയ പരാതി കള്ളക്കേസാണെന്നും താനുമായി തര്‍ക്കത്തിലുള്ള ബിസിനസ് പ്രോപ്പര്‍ട്ടി സ്വന്തമാക്കാനാണ് ഏറ്റവും വിശ്വസിച്ച സുഹൃത്തും ഭര്‍ത്താവും ചേര്‍ന്ന് ശ്രമിക്കുന്നതെന്നും ആണ് വിജയ്ബാബു ഫേസ്ബുക്കിലൂടെ ആരോപിക്കുന്നത്. എന്തുവില കൊടുത്തും നിരപരാധിത്വം തെളിയിക്കുമെന്നും വിജയ്ബാബു പറയുന്നു.

ഫ്രൈഡേ ഫിലിം ഹൗസ് വിജയ്ബാബു ചെയര്‍മാനായും സാന്ദ്രാ തോമസ് മാനേജിംഗ് ഡയറക്റ്ററായും പത്തോളം ചിത്രങ്ങളാണ് നിര്‍മിച്ചിട്ടുള്ളത്. അടുത്ത സുഹൃത്തുക്കളായിരുന്നു ഇരുവരും. സാന്ദ്ര വിവാഹ ശേഷം തന്റെ ഓഹരികള്‍ നേടി പിന്‍മാറാന്‍ ശ്രമിച്ചതാണ് പ്രശ്‌നങ്ങളുടെ തുടക്കമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

ഏതാനും മാസങ്ങളായി ഇരുവര്‍ക്കുമിടയില്‍ ഇതു സംബന്ധിച്ച് അസ്വാരസ്യങ്ങളും വാക്കു തര്‍ക്കങ്ങളും ഉണ്ടായിരുന്നു. ഫ്രൈഡേ ഫിലിം ഹൗസ് ഇപ്പോള്‍ നിര്‍മിക്കുന്ന അങ്കമാലി ഡയറീസിന്റെ ലൊക്കേഷനില്‍ വെച്ചും ഇരുവരും തമ്മിലുള്ള വാക്കേറ്റം പതിവായിരുന്നത്രേ. ഇന്നലെ ഓഫിസില്‍ ചര്‍ച്ച നടക്കുന്നതിനിടെ കുപിതനായ വിജയ് ബാബു കസേരയോടെ തന്നെ ചവിട്ടിവീഴ്ത്തുകയായിരുന്നുവെന്നാണ് സാന്ദ്ര പൊലീസിന് നല്‍കിയിരിക്കുന്ന മൊഴി. തുടര്‍ന്ന് വിജയ് ബാബുവും കൂട്ടാളികളും ഷൂസിട്ട കാലു കൊണ്ട് പലതവണ ചവിട്ടിയെന്നും പറയുന്നു.

ശരീരമാസകലം വേദനയുമായി ഇന്നലെ കൊച്ചിയിലെ സ്വകാര്യ ആശുപത്രിയിലെത്തിയ സാന്ദ്ര ആദ്യം ആശുപത്രിയിലെ ഡോക്റ്റര്‍മാരോടാണ് ഇക്കാര്യം അറിയിച്ചത്. പിന്നീട് ആശുപത്രി അധികൃതര്‍ പൊലീസിനെ അറിയിക്കുകയായിരുന്നു. ചവിട്ടേറ്റ ഭാഗത്ത് നീര്‍ക്കെട്ട് രൂപപ്പെട്ടിട്ടുണ്ടെന്നും ആശുപത്രി വൃത്തങ്ങള്‍ വെളിപ്പെടുത്തുന്നു.