സിനിമാസമരം നിര്ത്തില്ല; ചര്ച്ചകള് വിഫലം
സിനിമാസമരം രണ്ടാഴ്ച പിന്നിട്ടിട്ടും പ്രശ്നപരിഹാരം ഉടന് ഉണ്ടാകില്ല. തിയേറ്റര് ഉടമകളില് ഒരുവിഭാഗം നിര്മ്മാതാക്കളുമായി വ്യാഴാഴ്ച നടത്തിയ ചര്ച്ചയും ഫലം കണ്ടില്ല. ഫിലിം എക്സിബിറ്റേഴ്സ് ഫേഡറേഷന് പ്രസിഡന്റ് ലിബര്ട്ടി ബഷീറിനെ ഒഴിവാക്കിയാണ് ചില തിയേറ്റര് ഉടമകള് നിര്മ്മാതാക്കളുമായി കൂടിക്കാഴ്ച നടത്തിയത്.
തിയേറ്റര് വിഹിതം വര്ധിപ്പിച്ച് ഒരു ഒത്തുതീര്പ്പിനും തയാറല്ലെന്ന് നിര്മ്മാതാക്കള് വ്യക്തമാക്കി. ലിബര്ട്ടി ബഷീറിന്റെ പിടിവാശിയാണ് ഇപ്പോഴത്തെ പ്രശ്നങ്ങള്ക്ക് കാരണമെന്ന് നിര്മ്മാതാവ് ആന്റോ ജോസഫ് പറഞ്ഞു. 40 ശതമാനം എന്ന തിയേറ്റര് വിഹിതത്തില് വര്ധന അംഗീകരിക്കുന്ന പ്രശ്നമില്ല.
പഴയ 60: 40 അനുപാതം തുടരുന്നപക്ഷമല്ലാതെ ഒരു സിനിമയും റിലീസ് ചെയ്യുന്ന പ്രശ്നമുദിക്കുന്നില്ല. ഇക്കാര്യത്തില് നിര്മ്മാതാക്കളും വിതരണക്കാരും ഒറ്റക്കെട്ടാണ്. മലയാള സിനിമയുടെ പ്രധാന വിപണികളില് ഒന്നായ ക്രിസ്മസ് അവധിക്കാലത്ത് പുതിയ ചിത്രങ്ങള് റിലീസ് ചെയ്യാനാകാതെ വന് നഷ് ടമാണ് നിര്മ്മാതാക്കള് സഹിച്ചതെന്നും വിഹിതം വര്ധിപ്പിച്ച് നല്കുന്ന പ്രശ്നമുദിക്കുന്നില്ലെന്നും ആന്റോ ജോസഫ് പറഞ്ഞു. സിനിമ സമരം ഒത്തുതീര്പ്പിലേക്ക് എന്ന തരത്തില് വരുന്ന വാര്ത്തകള് ശരിയല്ലെന്നും അദ്ദേഹം പറഞ്ഞു
എത്രകാലം സമരം നീണ്ടുപോയാലും തിയേറ്റര് വിഹിതം വര്ധിപ്പിച്ച് നല്കി മലയാള സിനിമ റിലീസ് ചെയ്യുന്ന വിഷം ഉദിക്കുന്നില്ലെന്ന് നിര്മ്മാതാവ് ജി.സുരേഷ്കുമാറും പറഞ്ഞു. വസ്തുത എല്ലാവര്ക്കും അറിയാവുന്നതാണ്. വര്ഷങ്ങളായി തുടരുന്ന അനുപാതം വര്ധിപ്പിക്കുന്നത് അംഗീകരിക്കാന് കഴിയില്ലെന്നും അദ്ദേഹം പറഞ്ഞു.
50 ശതമാനം വിഹിതം എന്ന ഡിമാന്ഡ് തിയേറ്റര് ഉടമകള് മുന്നോട്ടുവയ്ക്കുകയും ഇപ്പോഴത്തെ 60:40 അനുപാതത്തില് മാറ്റം വരുത്താന് തയാറല്ലെന്ന് നിര്മ്മാതാക്കളും വിതരണക്കാരും നിലപാടെടുക്കുകയും ചെയ്തതോടെയാണ് ഏറെക്കാലത്തിന് ശേഷം മലയാള സിനിമ വീണ്ടും സമരത്തിലേക്ക് നീങ്ങിയത്. മികച്ച കളക്ഷന് ലഭിക്കേണ്ട ക്രിസ്മസ് കാലത്ത് ഒരു പുതിയ മലയാള സിനിമ പോലും തിയേറ്ററിലെത്തിയില്ല.
വിഹിതം വര്ധിപ്പിച്ചില്ലെങ്കില് പുതിയ റിലീസുകള് പ്രദര്ശിപ്പിക്കില്ലെന്ന് തിയേറ്റര് ഉടമകള് നിലപാട് എടുത്തു. അതോടെ റിലീസ് മാറ്റിവെച്ചു. അന്യഭാഷ ചിത്രങ്ങള് പ്രദര്ശിപ്പിച്ച് തിയേറ്ററുകള് ഓടിക്കുമെന്നായി. അതിനെ തുടര്ന്ന് ഡിസംബര് 30 ഓടെ പ്രദര്ശനം തുടര്ന്ന് വന്ന പുലിമുരുകന്, കട്ടപ്പനയിലെ ഋതിക് റോഷന് തുടങ്ങിയ ചിത്രങ്ങള് വിതരണക്കാരും നിര്മ്മാതാക്കളും സംയുക്തമായി ചേര്ന്ന് പിന്വലിച്ചു.
ക്രിസ്മസ് റിലീസായി നിശ്ചയിച്ചിരുന്ന ഫുക്രി, മുന്തിരിവള്ളികള് തളിര്ക്കുമ്ബോള്, ജോമോന്റെ സുവിശേഷങ്ങള്, എസ്ര എന്നീ ചിത്രങ്ങളുടെ റിലീസാണ് സമരത്തെ തുടര്ന്ന് മാറ്റിവെക്കേണ്ടി വന്നത്
അന്യഭാഷാ ചിത്രങ്ങള്ക്ക് പ്രേക്ഷകര് കുറഞ്ഞതോടെ പല തിയേറ്ററുകളും അടച്ചിട്ടിരിക്കുകയാണ്.
https://www.facebook.com/Malayalivartha
