നഗരത്തില്‍ തലേന്ന് പെയ്ത മഴയില്‍ തണുത്തു കിടക്കുന്ന വെളുപ്പാന്‍ കാലം. വെള്ളയുടുപ്പും വെള്ളിക്കരയുള്ള മുണ്ടുമുടുത്ത് ഒരൊത്ത പുരുഷന്‍ സൈക്കിളില്‍ സ്റ്റാച്യുവിലെ മാധവരായരുടെ പ്രതിമ ചുറ്റി എം.ജി റോഡിലൂടെ വടക്കോട്ട് പോകുന്നു. സി.വി. രാമന്‍ പിള്ളയുടെ ചരിത്രനോവലുകളില്‍ നിന്നൊക്കെ ഇറങ്ങിവന്ന ഒരു കഥാപാത്രത്തെപ്പോലെ തോന്നിപ്പിക്കുന്ന രൂപം. മലയാളികള്‍ക്ക് മറക്കാനാവാത്ത പരശതം കഥാപാത്രങ്ങളെ അവതരിപ്പിച്ച ഇനിയും അവതരിപ്പിക്കാനിരിക്കുന്ന പ്രിയതാരം മോഹന്‍ലാല്‍ ആണത്.

വെളുപ്പിന് 4.30 ആയതിനാല്‍ അധികമാരും നടനെ തിരിച്ചറിയുന്നില്ല. ഹ്രസ്വമെങ്കിലും ഈ യാത്രയ്ക്ക് ഒരു ലക്ഷ്യമുണ്ട്. അടുത്തുള്ള ഇന്ത്യന്‍ കോഫി ഹൗസ് വരെ പോകണം. പണ്ട് കോഫി ഹൗസ് യാത്ര മോഹന്‍ലാലിന് നിത്യവും ഉള്ള ഒരു സൈക്കിള്‍യജ്ഞമായിരുന്നു. സൈക്കിളിലും ബസിലും സ്‌കൂട്ടറിലും മറ്റുമായി അവര്‍ ഒരുകൂട്ടം കൂട്ടുകാര്‍ അവിടെ കൂട്ടം കൂടിയിരുന്നാണ് പകല്‍ സ്വപ്നങ്ങള്‍ കണ്ടിരുന്നത്.

പഴയകാല ജീവിത വഴിയിലൂടെ തിരുവനന്തപുരം സെക്രട്ടേറിയറ്റിന് മുന്നില്‍ സൈക്കിളോടിച്ചപ്പോള്‍ ദീര്‍ഘനാളായി മോഹന്‍ലാലിന്റെ മനസില്‍ അടക്കി വച്ച ഒരാഗ്രഹമാണ് നടപ്പിലായത്. തിരുവനന്തപുരത്തെ ഷൂട്ടിംഗിനുശേഷം എറണാകുളത്തേക്ക് വിമാനത്തില്‍ തിരിച്ചുപോകുന്നതിന് അല്പം മുമ്പാണ് നഗരത്തിലൂടെ സൈക്കിളോടിച്ചത്. 4.30ന് മാധവരായര്‍ പ്രതിമയെ ഒന്ന് വലം വച്ച് പഴയ കോഫി ഹൗസ് വരെ സൈക്കിളില്‍ മെല്ലെ യാത്ര ചെയ്തു. അതിരാവിലെ നടക്കാനിറങ്ങിയവരും പത്രവിതരണക്കാരും അപ്രതീക്ഷിതമായി മോഹന്‍ലാലിനെ കണ്ട് അദ്ഭുതപ്പെട്ടു നിന്നു. അവര്‍ക്കൊക്കെ ചെറിയ ചിരി നല്‍കി അദ്ദേഹം മുന്നോട്ട് ചവിട്ടി. കോഫി ഹൗസിന് മുന്നില്‍ കുറച്ച് സമയം ചെലവഴിച്ചു.

അന്നത്തെ കുസൃതികള്‍ കൂടെയുണ്ടായിരുന്ന സുഹൃത്ത് എം.ബി. സനല്‍കുമാറുമായി പങ്കുവച്ചു. അന്ന് സ്വന്തം സ്‌കൂട്ടറിലും ചിലപ്പോള്‍ കൂട്ടുകാരുടെ സൈക്കിളിന്റെ പിറകിലും മുന്‍പിലുമായാണ് വീട്ടിലേക്ക് പാതിരാത്രിയില്‍ തിരിച്ചുപോകുന്നത്. റോഡില്‍ ഒച്ചയും ബഹളവുമുണ്ടാക്കി ആഘോഷത്തോടെയാണ് തിരിച്ചു പോക്കെന്ന് പറഞ്ഞ് ലാല്‍ ചിരിച്ചു. പിന്നെ കോഫി ഹൗസിന് മുന്നിലൂടെ സൈക്കിള്‍ തള്ളിക്കൊണ്ട് നടന്നു.

5 മണിക്ക് പിരിഞ്ഞു. മോഹന്‍ലാലിന് നഗരത്തിലൂടെ സൈക്കിള്‍ ചവിട്ടണമെന്ന് ഏതോ ഒരു സുഹൃദ് സംഗമത്തില്‍ പറഞ്ഞതിന്റെ ഓര്‍മ്മകള്‍ വച്ചാണ് സനല്‍കുമാര്‍ ഈ ഒരു ദൗത്യം ഏറ്റെടുത്തത്. കുറേ ദിവസങ്ങളായി ബി. ഉണ്ണിക്കൃഷ്ണന്‍ സംവിധാനം ചെയ്യുന്ന സിനിമയുടെ ചിത്രീകരണം ഇവിടെ നടക്കുകയായിരുന്നു. കുറച്ച് വര്‍ഷം മുന്‍പ് മറ്റൊരു സിനിമയുടെ ചിത്രീകരണവുമായി ബന്ധപ്പെട്ട് തിരുവനന്തപുരത്ത് ലാല്‍ എത്തിയപ്പോള്‍ ഈ ആഗ്രഹം നടപ്പിലാക്കാന്‍ പറ്റിയിരുന്നില്ല. ഇപ്രാവശ്യം സഫലമായി ആ യാത്ര.