മോഹന്‍ലാലിനെ വിമര്‍ശിച്ച് ചുളുവില്‍ സ്റ്റാര്‍ ആയ കെആര്‍കെ ഒടുവില്‍ കളംമാറ്റി. മോഹന്‍ലാലിനെ ഛോട്ടാ ഭീം എന്നു വിളിച്ചു പരിഹസിച്ച ബോളിവുഡ് താരം കമാല്‍ ആര്‍ ഖാന്‍ മാപ്പു പറഞ്ഞു. പൊങ്കാലയുമായി മലയാളികള്‍ രംഗത്തെത്തിയതോടെയാണ് പരിഹാസം പിന്‍വലിച്ച് മാപ്പു പറയുന്നതായി കമാല്‍ ആര്‍ ഖാന്‍ പറഞ്ഞു. ട്വിറ്ററിലാണ് കെആര്‍കെയുടെ ഖേദപ്രകടനം. മോഹന്‍ലാലിന്റെ താരമൂല്യം അറിയില്ലായിരുന്നെന്നും അദ്ദേഹം വലിയ നടനാണെന്നും കെആര്‍കെ ട്വിറ്ററില്‍ കുറിച്ചു.
കെആര്‍കെയുടെ ഖേദപ്രകടനം ഇങ്ങനെ; മോഹന്‍ലാല്‍ സര്‍, നിങ്ങളെ ഛോട്ടാ ഭീം എന്നു വിളിച്ചതിനു മാപ്പ്. കാരണം എനിക്കു നിങ്ങളെ അത്ര കണ്ട് അറിയില്ലായിരുന്നു. ഇപ്പോള്‍ ഞാന്‍ അങ്ങയുടെ താരമൂല്യം മനസ്സിലാക്കുന്നു. മലയാള സിനിമയിലെ ഒരു സൂപ്പര്‍ താരമാണെന്നും മനസ്സിലാക്കുന്നു.
കഴിഞ്ഞയാഴ്ചയാണ് മോഹന്‍ലാലിനെ ഛോട്ടാ ഭീം എന്നു വിളിച്ച് പരിഹസിച്ച് കെആര്‍കെ രംഗത്തെത്തിയത്. മോഹന്‍ലാല്‍ ഛോട്ടാ ഭീമിനെ പോലെയാണ് ഇരിക്കുന്നതെന്നും മഹാഭാരതത്തിലെ ഭീമനായി വെറുതെ നിര്‍മാതാവിന്റെ കാശ് കളയേണ്ടെന്നുമായിരുന്നു പരിഹാസം. എന്നാല്‍, ഇതിനു പിന്നാലെ തന്നെ പൊങ്കാലയുമായി മലയാളികള്‍ ട്വിറ്ററിലും ഫേസ്ബുക്കിലും നിറഞ്ഞാടി. വിമര്‍ശനങ്ങള്‍ നാടെങ്ങും ഉയര്‍ന്നു.
എന്നിട്ടും മതിയാകാതെ കെആര്‍കെ മലയാളികളെ ആകമാനം പരിഹസിച്ചും രംഗത്തെത്തി. മലയാളികള്‍ ഊളകളാണെന്നും മോഹന്‍ലാല്‍ ഫാന്‍സിനു വിവരമില്ലെന്നും പറഞ്ഞ് കെആര്‍കെ രംഗത്തെത്തി. കെആര്‍കെയുടെ പരിഹാസത്തിനെതിരെ തമിഴ് നടന്‍ സൂര്യയും രംഗത്തെത്തിയിരുന്നു.
കെആര്‍കെയുടെ പരിഹാസം ഇങ്ങനെയായിരുന്നു. മോഹന്‍ലാല്‍ സര്‍, കാഴ്ചയില്‍ ഛോട്ടാഭീമിനെ പോലെയാണ് നിങ്ങള്‍. ആ നിലയ്ക്ക് നിങ്ങളെങ്ങനെ മഹാഭാരത്തിലെ ഭീമന്റെ കഥപാത്രം അവതരിപ്പിക്കും. ബിര്‍ ഷെട്ടി എന്തിനാണ് പണം പാഴാക്കുന്നത്.
എംടി വാസുദേവന്‍ നായരുടെ രണ്ടാമൂഴത്തിന്റെ ചലച്ചിത്രാവിഷ്‌കാരമാണ് മഹാഭാരതം. പരസ്യ സംവിധായകനായ വിആര്‍ ശ്രീകുമാര്‍ സംവിധാനം ചെയ്യുന്ന ചിത്രം വ്യവസായി ഡോ. ബിആര്‍ ഷെട്ടിയാണ് നിര്‍മിക്കുന്നത്. ആയിരം കോടിയാണ് ചിത്രത്തിന്റെ ബജറ്റ്. മലയാളത്തിന് പുറമെ ഹിന്ദി, ഇംഗ്ലീഷ്, തമിഴ്, തെലുങ്ക് ഭാഷകളിലും ചിത്രം റിലീസ് ചെയ്യും.
രണ്ട് ഭാഗങ്ങളിലായാണ് ചിത്രം ഒരുക്കുന്നത്. ആദ്യഭാഗത്തിന്റെ ചിത്രീകരണം അടുത്ത വര്‍ഷം സെപ്തംബറില്‍ ആരംഭിക്കും. 2020ല്‍ റിലീസ് ചെയ്യും. ആദ്യഭാഗം പുറത്തിറങ്ങി 90 ദിവസത്തിനുള്ളില്‍ രണ്ടാംഭാഗവുമെത്തുമെന്നാണ് അണിയറപ്രവര്‍ത്തകര്‍ അറിയിച്ചത്.