ഐ.വി ശശി ഒരുക്കിയ അവളുടെ രാവുകള്‍ റിലീസായി നാല്‍പത് വര്‍ഷം പിന്നിടുമ്പോള്‍ സിനിമയില്‍ അഭിനയിച്ചതില്‍ ഒരിക്കലും കുറ്റബോധം തോന്നിയിട്ടില്ലെന്ന് നടി സീമ. ആ ചിത്രം ചെയ്യുമ്പോള്‍ 19 വയസായിരുന്നെന്നും മുന്‍നിര നായികമാര്‍ നിരസിച്ച റോളാണ് തനിക്ക് കിട്ടിയതെന്നും സീമ പറഞ്ഞു. ഒരു പ്രമുഖ മാഗസിന് നല്‍കിയ അഭിമുഖത്തിലാണ് സീമ അവളുടെ രാവുകളെക്കുറിച്ച് പറയുന്നത്.

ഇപ്പോഴും ആളുകള്‍ തന്നെ തേടി വരുന്നത് അവളുടെ രാവുകളിലെ രാജി എന്ന കഥാപാത്രത്തിന്റെ കരുത്ത് കൊണ്ടാണെന്നും സീമ വ്യക്തമാക്കുന്നു. ഒരിക്കലും വള്‍ഗറാകില്ലെന്ന് ചിത്രത്തിന്റെ സംവിധായകനും സീമയുടെ ഭര്‍ത്താവുമായ ഐവി ശശി ഉറപ്പു നല്‍കിയിരുന്നു. അതു താന്‍ പൂര്‍ണമായും വിശ്വസിക്കുകയായിരുന്നെന്ന് സീമ വ്യക്തമാക്കി.

ഒരിക്കല്‍ നടി ശ്രീദേവിയെ കാണാന്‍ ഞാന്‍ ഹൈദരാബാദില്‍ പോയി. അവിടെ സെറ്റില്‍ വച്ച് രണ്ടാം നായികയായ ശാന്തിയെ ശ്രീദേവി എനിക്കു പരിചയപ്പെടുത്തി. ഇത് മലയാളത്തിലെ പെരിയ ഡയറക്ടര്‍. ഇനക്ക് മലയാളം ഫിലിമില്‍ റോള്‍ തറുവാറ്. പെട്ടെന്നായിരുന്നു ശാന്തിയുടെ മറുപടി. ഒന്നു പോ അമ്മാ. നിറയെപ്പേര് അപ്പടി ശൊല്ലിയിരിക്ക്. പിന്നീട് ഉദയാ സ്റ്റുഡിയോയില്‍ വച്ച് ഒരു നൃത്തരംഗം ചിത്രീകരിക്കുമ്പോള്‍ ഞാന്‍ ശാന്തിയെ കണ്ടു.

അവള്‍ മാത്രം ചെരുപ്പിട്ട് നൃത്തം ചെയ്യുകയായിരുന്നു. ഇങ്ങനെയൊരു കുരുത്തംകെട്ട പെണ്ണിനെ എന്തിനു കൊണ്ടുവന്നു? ഞാന്‍ ദേഷ്യപ്പെട്ടു. എന്തിനാണ് എപ്പോഴും ഭരിക്കാന്‍ വരുന്നതെന്ന് അവള്‍ തിരിച്ചും ചൂടായി. ആ നിഷ്‌കളങ്കതയും നേരെ വാ നേരെ പോ പ്രകൃതവും എനിക്ക് ഇഷ്ടമായി. അങ്ങനെയൊരു പെണ്‍കുട്ടിയെ ജീവിതത്തില്‍ ആദ്യമായി കാണുകയായിരുന്നു.

‘ഇതാ ഇവിടെ വരെ’യുടെ സെറ്റിലും ഞാന്‍ ശാന്തിയെ കണ്ടു. ആ പടത്തിലെ ഡാന്‍സ് ട്രൂപ്പിലെ അംഗമായിരുന്നു അവള്‍. തുടര്‍ന്ന് ഈ മനോഹര തീരം എന്ന സിനിമയിലും നൃത്തക്കാരിയായി അവള്‍ പ്രത്യക്ഷപ്പെട്ടു. ‘അവളുടെ രാവുകളില്‍’ ഞാന്‍ ശാന്തിയെ സീമ എന്ന നായികയാക്കി. ഈ പടത്തിന്റെ ചിത്രീകരണത്തിനിടെയാണ് ഞാന്‍ ശാന്തിയെ പ്രേമിച്ചു തുടങ്ങിയത്. ചിത്രീകരണ സമയത്ത് നിന്നെ എനിക്കിഷ്ടമാണെന്നു പറഞ്ഞ് പ്രണയത്തിലേക്കു പ്രവേശിക്കുകയല്ല,

പ്രണയം ഞങ്ങള്‍ക്കിടയില്‍ അറിയാതെ സംഭവിക്കുകയായിരുന്നു. സീമയിലെ നടിയെ കണ്ടെത്തിയ പോലെ ഒരു പ്രണയിനിയെ കൂടി കണ്ടെത്തുകയായിരുന്നു. മനസ്സില്‍ പ്രണയം നിറഞ്ഞപ്പോള്‍ അക്കാര്യം ആദ്യമായി അറിയിച്ചത് കമല്‍ഹാസനെയായിരുന്നു. ‘നന്നായി ശാന്തി നല്ല കുട്ടിയാണ്’ എന്നായിരുന്നു അവന്റെ പ്രതികരണം. പിന്നീട് സിനിമയിലെ പലരും ഈ പ്രണയത്തെക്കുറിച്ച് അറിഞ്ഞു. ജയന്‍, രജനീകാന്ത്, മധുസാര്‍, സോമന്‍, സുകുമാരന്‍…. എല്ലാവരും ഞങ്ങളുടെ സ്‌നേഹത്തെ പിന്തുണച്ചു.’

സീമയാണു വിവാഹം കഴിക്കാമെന്ന് ആദ്യം പറയുന്നത്. ആറാട്ട് എന്ന സിനിമയുടെ ഷൂട്ടിങ്. ബീച്ചില്‍ ചെരുപ്പിടാതെ നടന്ന സീമയുടെ കാലില്‍ വിഷക്കല്ല് കൊണ്ടു മുറിഞ്ഞു. കാര്യമാക്കിയില്ലെങ്കിലും പിന്നീട് മുറിവ് പഴുത്തു. ഇതോടെ സീമ ആശുപത്രിയിലായി. ഇതെന്നെ വല്ലാതെ അസ്വസ്ഥനാക്കി. എനിക്ക് വിവാഹം ആലോചിക്കുന്ന സമയമായിരുന്നു. ഒരു ദിവസം അമ്മ ചോദിച്ചു. സീമയെ ആലോചിച്ചാലോ എന്ന്. ഞാന്‍ അമ്പരന്ന് പോയി. അന്ന് ആശുപത്രിയില്‍ നിന്ന് മടങ്ങിയെത്തി ഒന്നു മയങ്ങിയപ്പോള്‍ ഉറക്കത്തില്‍ ‘സീമ സീമ’ എന്നു ഞാന്‍ വിളിച്ചത്രേ. ‘എന്നെ കല്ല്യാണ് കഴിക്കുന്നെങ്കില്‍ ഇപ്പോള്‍ വേണ’മെന്ന് സീമയും വാശിയില്‍. പിന്നെ വൈകിയില്ല.

1980 ആഗസ്ത് 29. ചെന്നൈയിലെ മാങ്കോട് ദേവീക്ഷേത്രത്തില്‍ വച്ചായിരുന്നു വിവാഹം. ഒരു സഹോദരനെ പോലെ എല്ലാം നോക്കി നടത്തിയത് ജയനാണ്. വിവാഹം കഴിഞ്ഞ് മൂന്നാം നാള്‍ ഞങ്ങള്‍ രണ്ടുപേരും സിനിമയിലെ തിരക്കിലേക്കു പോയി. ഞങ്ങള്‍ പരിചയപ്പെട്ടതു മുതല്‍ ഉടക്കാണ്. അന്ന് നായികമാര്‍ അടക്കം എല്ലാവര്‍ക്കും സംവിധായകനെ വലിയ പേടിയായാണ്. എനിക്ക് ആരെയും കൂസാത്ത പ്രകൃതവും. ചോപ്ര മാസ്റ്ററുടെ ട്രെയിനിങ്ങാണത്. സംവിധായകനാണെങ്കില്‍ പോലും പേരുവിളിച്ചാലേ നോക്കാവൂ എന്നാണ് അദ്ദേഹം നിര്‍ദേശിച്ചിരിക്കുന്നത്.

‘ഡീ’ എന്നോ മറ്റോ വിളിച്ചാല്‍ നോക്കില്ല. ഭയങ്കര നര്‍ത്തകി ആണെന്നൊരു അഹങ്കാരവും എനിക്കുണ്ടായിരുന്നു. ‘ഈ മനോഹര തീര’ത്തിന്റെ സെറ്റില്‍ വെച്ച് ശശിയേട്ടന്‍ എന്നെ കൈ ഞൊടിച്ചു വിളിച്ചു ഞാന്‍ നോക്കിയില്ല. ഒടുവില്‍ പേരു വിളിച്ചപ്പോള്‍ ഞാന്‍ നോക്കി. നീ എന്താണ് വിളിച്ചിട്ടു മൈന്‍ഡ് ചെയ്യാതിരുന്നതെന്ന് ചോദിച്ചപ്പോള്‍ ഞാന്‍ ദേഷ്യപ്പെട്ടു. ‘കൈ ഞൊടിച്ച് വിളിക്കാന്‍ ഞാന്‍ പട്ടിയൊന്നും അല്ല’. ‘ നീ വല്ല്യ വായാടിയാണല്ലോ’ എന്ന് പറഞ്ഞ് അദ്ദേഹം പോയി.

ശശിയേട്ടന്‍ എന്നോട് പ്രണയാഭ്യര്‍ത്ഥന നടത്തിയിട്ടില്ല. എന്നെ വലിയ നടിയാക്കാന്‍ ആഗ്രഹമുണ്ടെന്ന് തോന്നിയിട്ടുണ്ട്. മറ്റ് നായികമാരോടില്ലാത്ത എന്തോ ഒരു പ്രത്യേകത എന്നോടുണ്ട് എന്നും ആ ധൈര്യത്തിലാണ് വിവാഹം ചെയ്യണമെന്ന് ആവശ്യപ്പെട്ടത്. അപ്പോള്‍ വിവാഹം നടന്നില്ലെങ്കില്‍ പിന്നെ 32 വയസ്സ് കഴിയുമെന്ന് ആരോ അമ്മയെ പേടിപ്പിച്ചിരുന്നു. വിവാഹാലോചന മുറുകിയപ്പോഴാണ് അദ്ദേഹത്തോട് ഇക്കാര്യം ആവശ്യപ്പെട്ടത്. ഈ വായാടിപ്പെണ്ണിനെ ഭാര്യയാക്കേണ്ടി വരുമെന്ന് ശശിയേട്ടന്‍ ഒരിക്കലും വിചാരിച്ചു കാണില്ല.