ജയറാമിനെ നായകനാക്കി മണിയന്‍പിള്ള രാജു നിര്‍മിച്ച പഞ്ചവര്‍ണതത്ത എന്ന ചിത്രം റിലീസാകും മുമ്പ് ഒന്നേകാല്‍ക്കോടി ലാഭമായി, തിയേറ്റര്‍ കളക്ഷനും മോശമല്ല
പരാജയത്തിന്റെ പടുകുഴിയിലായിരുന്ന ജയറാമിനെ നായകനാക്കി സിനിമയെടുക്കുക, അത് ഹിറ്റാക്കുക മാത്രമല്ല സിനിമ ഇറങ്ങും മുമ്പ് ഒരു കോടിയോളം രൂപ ലാഭം ഉണ്ടാക്കുക. ഇതൊക്കെ മണിയന്‍പിള്ള രാജുവിന് മാത്രം കഴിയുന്ന കാര്യമാണ്. മണിയന്‍പിള്ള കിടന്നാല്‍ കാല്‍പ്പണവുമായേ പൊങ്ങൂ എന്നാണ് മലയാളസിനിമയിലെ ചൊല്ല്. മമ്മൂട്ടിയെ നായകനാക്കി എടുത്ത അനശ്വരം മുതല്‍ പഞ്ചവര്‍ണത്തത്ത വരെ 11 സിനിമകള്‍ ഇതില്‍ പരാജയപ്പെട്ട ചിത്രങ്ങളുണ്ടെങ്കിലും മണിയന്‍പിളളയ്ക്ക് ഒരു രൂപ പോലും നഷ്ടം സംഭവിച്ചിട്ടില്ല. അതാണ് മണിയന്‍ പിള്ള മാജിക്ക്. ദൈവമേ കൈതൊഴാം എന്ന ജയറാം ചിത്രം ഒരാഴ്ച പോലും തിയേറ്ററുകളില്‍ ഓടിയില്ല. ആ സമയത്താണ് പഞ്ചവര്‍ണത്തത്തയില്‍ തലമൊട്ടയടിച്ച്, മീശവടിച്ച് ജയറാമിനെ നായകനാക്കി മണിയന്‍പിള്ള പടംപിടിച്ചത്. സംവിധായകന്‍ നവാഗതനായ രമേഷ് പിഷാരടിയും.
മൂന്നരക്കോടി രൂപ പോലും മുതല്‍മുടക്കില്ലാത്ത ചിത്രം സാറ്റലൈറ്റ്, ഓവര്‍സീസ്, അന്യഭാഷാ ഇടപാടുകളിലൂടെ നാലരക്കോടി കിട്ടി. തിയേറ്റര്‍ കളക്ഷനും മോശമല്ല. ജയറാമിനെ നായകനാക്കിയപ്പോള്‍ തുല്യമായ മറ്റൊരു വേഷം കുഞ്ചാക്കോബോബന് നല്‍കി. അങ്ങനെ നല്ലതുക സാറ്റലൈറ്റ് അവകാശം കിട്ടി. കഥ തെരഞ്ഞെടുക്കുന്നതിനൊപ്പം ആര്‍ട്ടിസ്റ്റുകളെയും മറ്റും തീരുമാനിക്കുന്നതില്‍ മണിയന്‍പിള്ളയ്ക്കുള്ള ബുദ്ധി സുഹൃത്തും നിര്‍മാതാവുമായ സുരേഷ്‌കുമാറിന് പോലുമില്ല. പണ്ട് മോഹന്‍ലാലിനെ നായകനാക്കി നിര്‍മിച്ച വെള്ളാനകളുടെ നാട് വിതരണം ചെയ്ത തരംഗിണി ശശിയും ഏയ് ഓട്ടോയുടെ അവകാശം വാങ്ങിയ പി.കെ.ആര്‍ പിള്ളയോ ഇന്ന് സിനിമയിലില്ലെന്നും ഓര്‍ക്കണം. നല്ല ലാഭത്തിലാണ് ഏയ് ഓട്ടോ വിറ്റതെങ്കിലും അതിലും വലിയ ലാഭം പി.കെ.ആറിന് ലഭിച്ചു.
പഞ്ചസാര കട്ട് വിറ്റാണ് കുട്ടിക്കാലത്ത് മണിയന്‍പിള്ള രാജു സിനിമ കണ്ടിരുന്നത്. വീട്ടിലേക്ക് സാധനം വാങ്ങിയിരുന്ന പറ്റ് കടയില്‍ നിന്ന് അഞ്ച് കിലോ പഞ്ചസാരവരെ ഒരു മാസം വാങ്ങി മറിച്ച് വിറ്റു. ഒരുതവണ അച്ഛന്‍ പറ്റ് ബുക്ക് നോക്കിയപ്പോള്‍ ഒരുമാസം വീട്ടില്‍ 110 കിലോ പഞ്ചസാര വാങ്ങിയിരിക്കുന്നു. ' ടീ... ഈ വീട്ടില്‍ ഒരു മാസം എത്ര കിലോ പഞ്ചസാര വേണം' അച്ഛന്‍ അമ്മയോട് ചോദിച്ചു. ' രണ്ട് കിലോ' അമ്മയുടെ മറുപടി. അതോടെ അച്ഛന്‍ വീടിന് പരിസരത്തുള്ള എല്ലാ കടകളിലും നിര്‍ദ്ദേശം നല്‍കി, മേലാല്‍ മണിയന്‍പിള്ളക്ക് കടം കൊടുക്കരുത്. അതുകൊണ്ടൊന്നും സിനിമാ കാണല്‍ അവസാനിച്ചില്ല. മറ്റ് പല മാര്‍ഗങ്ങളിലൂടെ വീട്ടില്‍ തന്നെ മോഷണം നടത്തി പല സിനിമകളും പലവട്ടം കണ്ടു. കുഞ്ഞുന്നാളിലേ ഇത്തരത്തില്‍ സിനിമ കണ്ടാണ് മണിയന്‍പിള്ള നല്ലൊരു നടനും നിര്‍മാതാവും ആയത്.
https://www.facebook.com/Malayalivartha
