രഥോത്സവം, അനിയന്‍ബാവ ചേട്ടന്‍ ബാവ തുടങ്ങിയ നിരവധി സിനിമകളിലൂടെ മലയാളികള്‍ക്ക് സുപരിചിതയായ നടിയാണ് കസ്തൂരി. തമിഴിലും തെലുങ്കിലും അടക്കം നായികയായി തിളങ്ങി തന്റേതായ ഇടം ഒരുക്കിയ കസ്തൂരി ഒരുപാട് പ്രയാസങ്ങളും ബുദ്ധിമുട്ടുകളും തുടക്കകാലത്ത് നേരിട്ടിട്ടുണ്ട്. അധ്വാനിച്ച് രക്ഷപെട്ടയാളാണ് താനെന്ന് കസ്തൂരി പറയുന്നു. ചതിക്കപ്പെട്ട് സിനിമയുടെ വെള്ളിവെളിച്ചത്തില്‍ നിന്ന് അകന്നവരും ഏറെയാണ്. എന്തിനും വഴങ്ങി സിനിമയില്‍ രക്ഷപെടാന്‍ കാത്ത് നില്‍ക്കുന്നവരാണ് ഏറെയുള്ളതെന്ന് കസ്തൂരി പറയുന്നു. അതില്‍ സ്ത്രീ-പുരുഷ വ്യത്യാസമില്ല. 

സിനിമ പഠിക്കാനെത്തുന്ന കുട്ടികള്‍ക്ക് നല്ല ഭാവി ഉറപ്പുകൊടുത്ത് പീഡിപ്പിക്കുന്നവരുമുണ്ടെന്ന് കസ്തൂരി പറയുന്നു. പണ്ട് കാലത്ത് നല്ല നിര്‍മാതാക്കളായിരുന്നു ഉണ്ടായിരുന്നത്. അവരാരും ഒരു നടിയെയും കിടക്കറയിലേക്ക് ക്ഷണിച്ചിരുന്നില്ല. അങ്ങനെയുള്ളവര്‍ക്ക് നല്ല നിര്‍മാതാവാകാനും പറ്റില്ല. ഇപ്പോള്‍ അതില്‍ നിന്ന് വ്യത്യസ്തരായ കുറേ നിര്‍മാതാക്കള്‍ ഇറങ്ങിയിട്ടുണ്ട്. അവരാണ് ഇന്‍ഡസ്ട്രിയുടെ ശാപം. ഒരു നിര്‍മാതാവ് പല കാര്യങ്ങളും ചെയ്ത് തരാമെന്ന് ഉറപ്പ് നല്‍കി. എന്നിട്ട് ഹോട്ടലിലേക്ക് ക്ഷണിച്ചു. അപ്പൂപ്പന്റെ പ്രായമുള്ളത് കൊണ്ട് മാന്യത വിട്ട് സംസാരിച്ചില്ലെന്നും കസ്തൂരി പറഞ്ഞു. 

ഇതിനേക്കാളൊക്കെ തന്നെ വേദനിപ്പിച്ചത് മറ്റൊരു സംഭവമാണെന്നാണ് കസ്തൂരി ഓര്‍മിക്കുന്നു. താന്‍ സിനിമയില്‍ എത്തിയ കാലത്ത് ഗുരുവായി കണ്ട ഒരു സംവിധായകനുണ്ടായിരുന്നു. ഗുരു എന്നാണ് കസ്തൂരി അദ്ദേഹത്തെ വിളിച്ചിരുന്നത്. ഒരിക്കല്‍ അദ്ദേഹം കസ്തൂരിയോട് ഗുരുദക്ഷിണ ചോദിച്ചു. ഗുരുദക്ഷിണ പലവിധമുണ്ടല്ലോ, എന്താണ് അദ്ദേഹം ഉദ്ദേശിക്കുന്നതെന്ന് കസ്തൂരിക്ക് ആദ്യം മനസിലായില്ല. പിന്നീടാണ് അറിഞ്ഞത് തന്റെ ഉടല്‍ ഗുരുവിന് സമ്മാനിക്കണം, അതാണ് ആഗ്രഹമെന്ന്. അതിന് താരം കുറിക്ക് കൊള്ളുന്ന മറുപടി നല്‍കി. പിന്നീടിതുവരെ ഗുരു മിണ്ടിയിട്ടില്ല.