ശ്രീകുമാറിന്റെ പൊട്ടത്തരങ്ങള്‍ മറുപടി അര്‍ഹിക്കുന്നില്ല: പുഛിച്ചു തള്ളി ദിലീപ് ഫാന്‍സ് അസ്സോസ്സിയേഷന്‍
ഒടിയന്റെ പരാജയത്തിനു പിന്നില്‍ ദിലീപാണെന്ന തരത്തില്‍ സംവിധായകന്‍ ശ്രീകുമാര്‍ മേനോന്‍ നടത്തുന്ന പ്രചരണങ്ങള്‍ മറുപടി അര്‍ഹിക്കുന്നില്ലെന്ന് ദിലീപ് ഫാന്‍സ് അസ്സോസിയേഷന്‍. ഒടിയനെതിരെ സമൂഹ മാധ്യമങ്ങളിലൂടെ വരുന്ന മോശം അഭിപ്രായങ്ങള്‍ക്കെല്ലാം പിന്നില്‍ ദിലീപ് ഫാന്‍സ് ആണെന്നാണ് ശ്രീകുമാര്‍ മേനോന്റെ പ്രതികരണം. ശ്രീകുമാര്‍ മേനോന്റെ ഇത്തരം പൊട്ടത്തരങ്ങള്‍ മറുപടി അര്‍ഹിക്കുന്നില്ലെന്ന് ദിലീപ് ഫാന്‍സ് അസ്സോസ്സിയേഷന്‍ ചെയര്‍മാന്‍ റിയാസ് ഖാന്‍ പറഞ്ഞു. 'യാഥാര്‍ത്ഥ്യം എന്താണെന്ന് പ്രേക്ഷകര്‍ക്കറിയാം. അത്രയേ ഉള്ളൂ. ഇതൊന്നും വലിയ സംഭവമാക്കേണ്ട സംഭവമല്ല. അയാള്‍ പറയുന്ന പൊട്ടത്തരങ്ങള്‍ മറുപടി അര്‍ഹിക്കുന്നില്ല' റിയാസ് ഖാന്‍ ഒരു മാധ്യമത്തോട് പ്രതികരിച്ചു.
ഒടിയന്‍ പ്രദര്‍ശനത്തിനെത്തിയ ആദ്യ ദിനം മുതല്‍ വലിയ രീതിയിലുള്ള സൈബര്‍ ആക്രമണത്തിനാണ് സംവിധായകന്‍ ശ്രീകുമാര്‍ മേനോന്‍ വിധേയനായത്. ഒടിയന്‍ 200 കോടി നേടുമെന്നും മോഹന്‍ലാലിന് ഓസ്‌കാര്‍ ലഭിക്കുമെന്നുമുള്ള ശ്രീകുമാര്‍ മേനോന്റെ വാദങ്ങളാണ് ട്രോളായത്. ഇതിനു പിന്നില്‍ ദിലീപാണെന്നാണ് അദ്ദേഹത്തിന്റെ വാദം. ഇക്കാര്യം തിരുവനന്തപുരം പ്രസ് ക്ലബില്‍ നടത്തിയ മുഖാമുഖത്തില്‍ അദ്ദേഹം തുറന്നു പറയുകയും ചെയ്തു. ആക്രമണത്തിനു പിന്നില്‍ ആരാണെന്നു തെളിവ് ലഭിക്കാത്തതിനാല്‍ വ്യക്തിപരമായ ആരോപണം ഉന്നയിക്കുന്നില്ലെന്നും അകാരണമായി തന്നെ വിവാദങ്ങളിലേയ്ക്ക് വലിച്ചിഴയ്ക്കുന്നതിന്റെ കാരണങ്ങള്‍ എല്ലാവര്‍ക്കും അറിയാമെന്നുമായിരുന്നു ശ്രീകുമാര്‍ മേനോന്‍ പറഞ്ഞത്.
നടി മഞ്ജു വാരിയരെ താന്‍ സഹായിക്കാന്‍ തുടങ്ങിയപ്പോള്‍ മുതല്‍ ആരംഭിച്ച ആക്രമണത്തിന്റെ ഭാഗമാണ് 'ഒടിയന്‍' സിനിമയ്‌ക്കെതിരായുള്ള സൈബര്‍ ആക്രമണമെന്നും ഇതിനെതിരെ മഞ്ജു പ്രതികരിക്കണമെന്നും ശ്രീകുമാര്‍ മേനോന്‍ ആവശ്യപ്പെട്ടിരുന്നു. സിനിമാരംഗത്ത് ഞാന്‍ ആരുമല്ല. ആരുമായും ശത്രുതയില്ല, ആരുടെയും തിരക്കഥയും മോഷ്ടിച്ചില്ല. എന്നിട്ടും എനിക്കെതിരെ സിനിമയില്‍ നിന്നും വലിയ ശത്രുത ഉണ്ട്. സിനിമാരംഗത്ത് വരുന്നതിനുമുമ്പാണ് ഈ ശത്രുത ഉണ്ടായത്. അതിന്റെ കാരണങ്ങള്‍ നിങ്ങള്‍ക്ക് അറിയാം. ആ കാരണങ്ങള്‍ കൊണ്ടാണ് വിവാദങ്ങളിലേയ്ക്കും വെറുപ്പുകളിലേയ്ക്കും ഞാന്‍ വലിച്ചിഴയ്ക്കപ്പെട്ടത്. അതിന്റെ കലാശക്കൊട്ടായിരിക്കാം ഇപ്പോള്‍ കണ്ടത്. ഏത് വിഷയത്തിലാണ് ആക്രമിക്കപ്പെട്ടതെന്ന് ഇതിനു മുമ്പ് ഞാന്‍ പറഞ്ഞിട്ടുണ്ട്. അത് ആവര്‍ത്തിക്കേണ്ട ആവശ്യം എനിക്കില്ല, ശ്രീകുമാര്‍ മേനോന്‍ തിരുവനന്തപുരത്ത് പറഞ്ഞു.
മോഹന്‍ലാല്‍ എന്ന പേരില്‍ ചിത്രമെടുത്ത സാജിദ് യാഹിയയോ, മഞ്ജു വാരിയറെ നായികയാക്കി സംവിധാനം ചെയ്ത ഫാന്റം പ്രവീണോ ഇത്തരത്തില്‍ ആക്രമിക്കപ്പെടുന്നില്ല. അപ്പോള്‍ ഞാന്‍ പറഞ്ഞ കാര്യങ്ങള്‍ കുറച്ചുകൂടി സത്യസന്ധമാകുകയല്ലേ ചെയ്യുന്നത്. പണ്ട് കൂവിതോല്‍പിക്കാന്‍ തിയറ്ററുകളിലേയ്ക്ക് ആളെ വിടുകയാണ്. ഇന്ന് മൊബൈല്‍ മതി, ശ്രീകുമാര്‍ മേനോന്‍ ആരോപിച്ചു.
https://www.facebook.com/Malayalivartha
