മീരാ ജാസ്മിന്റെ വിവാഹം മേയര്‍ കെ. ചന്ദ്രിക റദ്ദാക്കി. മീരാജാസ്മിനും അനിലും തമ്മിലുള്ള വിവാഹമാണ് തിരുവനന്തപുരം കോര്‍പ്പറേഷന്‍ റദ്ദാക്കിയത്. വിവാഹത്തെക്കുറിച്ച് ശരിയായ രേഖകള്‍ മീരാജാസ്മിന്‍ ഹാജരാക്കാത്തതാണ് വിവാഹം റദ്ദാക്കാനുള്ള കാരണമെന്ന് അറിയുന്നു. അതേസമയം തിരുവനന്തപുരം നഗരസഭയില്‍ നിന്നും മീരയ്ക്ക് രേഖകളൊന്നും ലഭിച്ചിട്ടില്ലെന്ന് മീരയുമായി അടുത്ത വൃത്തങ്ങള്‍ സൂചിപ്പിക്കുന്നു.
വിവാഹത്തെ തുടര്‍ന്ന് മീര ദുബായിയിലാണ് താമസിക്കുന്നത്. ഇക്കൊല്ലം ഫെബ്രുവരിയിലാണ് മീരയുടെ വിവാഹം കഴിഞ്ഞത്. ദുബായിയിലെ വിലാസമാണ് മീര നഗരസഭയില്‍ കൊടുത്തിരിക്കുന്നത്. എന്നാല്‍ നഗരസഭയ്ക്ക് വിദേശത്തേയ്ക്ക് കത്തയയ്ക്കാന്‍ നിയമമില്ല.
ഓഗസ്റ്റില്‍ മീരയുടെ വിവാഹം രജിസ്റ്റര്‍ ചെയ്യാനുള്ള രേഖകള്‍ നഗരസഭ ഓഫീസില്‍ ലഭിച്ചതായി നഗരസഭ വൃത്തങ്ങള്‍ സൂചിപ്പിക്കുന്നു. അനില്‍ മുമ്പ് വിവാഹിതനായെന്ന അഭ്യൂഹങ്ങളാണ് വിവാഹം റദ്ദാക്കാന്‍ കാരണമെന്ന് നഗരസഭ പറയുന്നു. മുമ്പ് വിവാഹിതരായവര്‍ക്ക് വീണ്ടും വിവാഹം രജിസ്റ്റര്‍ ചെയ്ത് നല്‍കാനാവില്ലെന്ന് നഗരസഭാ വൃത്തങ്ങള്‍ സൂചിപ്പിച്ചു. വിവാഹം രജിസ്റ്റര്‍ ചെയ്യാന്‍ ചില നിയമങ്ങളുണ്ട്. ആര്‍ക്കും എപ്പോഴും വന്ന് രജിസ്റ്റര്‍ ചെയ്യാനുള്ളതല്ല വിവാഹമെന്ന് നഗരസഭാ വൃത്തങ്ങള്‍ പറയുന്നു.
അനിലിന്റെയും മീരയുടെയും വിവാഹം പോലീസ് സംരക്ഷണത്തിലായിരുന്നു. അനില്‍ നേരത്തെ വിവാഹിതനാണെന്നും ആദ്യഭാര്യ വിവാഹം അലങ്കോലമാക്കാന്‍ സാധ്യതയുണ്ടെന്നും അറിഞ്ഞ പശ്ചാത്തലത്തിലാണ് പോലീസ് സംരക്ഷണം നല്‍കാന്‍ ഹൈക്കോടതി ഉത്തരവിട്ടത്. എന്നാല്‍ താന്‍ നേരത്തെ വിവാഹം കഴിച്ചിട്ടില്ലെന്നും തന്നെ വിവാഹം കഴിക്കാന്‍ ആഗ്രഹിക്കുന്ന പെണ്‍കുട്ടിയാണ് സംഭവത്തിന് പിന്നിലെന്നും അനില്‍ അന്ന് വ്യക്തമാക്കിയിരുന്നു. അതേസമയം അനിലിന്റെ വിവാഹം നേരത്തെ കഴിഞ്ഞിരുന്നതായി അനിലുമായി അടുത്ത വൃത്തങ്ങള്‍ സൂചിപ്പിക്കുന്നു.
മീരയുടെ പുതിയ ചിത്രം സുഗീത് സംവിധാനം ചെയ്യുന്ന ഒന്നുംമിണ്ടാതെയാണ്. ജയറാമാണ് ചിത്രത്തിലെ നായകന്‍. അടുത്തിടെ ഒരു ചിത്രത്തിന്റെ ഷൂട്ടിങ്ങിന് വേണ്ടി മീരാജാസ്മിന്‍ ചേര്‍ത്തലയിലെത്തിയിരുന്നു. ഇതിനുമപ്പുറം എന്ന ചിത്രത്തിന് വേണ്ടിയാണ് മീരാ ജാസ്മിന്‍ ചിത്രീകരണത്തിന് കേരളത്തിലെത്തിയത്.
ഊഹാപോഹങ്ങളുടെ അടിസ്ഥാനത്തില്‍ ഒരിക്കലും ഒരാളുടെ വിവാഹം റദ്ദാക്കാന്‍ നിയമമില്ല. അങ്ങനെ റദ്ദാക്കുകയാണെങ്കില്‍ വിവാഹം റദ്ദാക്കപ്പെട്ടവര്‍ക്ക് കോടതിയെ സമീപിക്കാന്‍ അവസരമുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha