മോഹൻലാലിന്റേയും മമ്മൂട്ടിയുടേയും നായികയായി തിരിച്ചുവരവ് നടത്തിയ മീന ഏറ്റവും ഒടുവിൽ അഭിനയിച്ചത് മമ്മൂട്ടി ചിത്രം ‘ഷൈലോക്കി’ലാണ്. ഇപ്പോൾ മീനയുടെ മേക്ക്ഓവർ ആണ് സമൂഹ മാധ്യമങ്ങളിൽ തരംഗമാകുന്നത്. ‘ദൃശ്യം’ മുതൽ ‘ഷൈലോക്ക്’ വരെ കണ്ട മീനയല്ല ഇപ്പോൾ. വലിയ മാറ്റമാണ് രൂപത്തിൽ തന്നെ വന്നിരിക്കുന്നത്. മെലിഞ്ഞ് കൂടുതല്‍ സുന്ദരിയായ താരത്തെക്കണ്ട് എങ്ങനെ ഇത്ര ചെറുപ്പമായെന്നാണ് ആരാധകർ ചോദിക്കുന്നത്. പഴയ സിനിമകളിലേതിനെക്കാള്‍ ഭംഗിയിലാണ് മീനയെന്നും ഇപ്പോള്‍ കണ്ടാല്‍ 43 അല്ല 25 വയസുകാരിയുടെ ലുക്ക് ആണെന്നുമൊക്കെ ആരാധകര്‍ കമന്റ് ഇട്ട് കൊണ്ടിരിക്കുകയാണ്.

ഇങ്ങനെ ഒരു മേക്കോവറിന് പിന്നിലെ രഹസ്യമെന്താണെന്നും പലരും അന്വേഷിക്കുന്നുണ്ട്. ഇഞ്ചാംപക്കത്തെ പ്രിംറോസ് സ്കൂളില്‍ നടന്ന മാരത്തോണ്‍ ഫ്ലാഗ് ഓഫ് ചടങ്ങിനെത്തിയ മീനയുടെ ചിത്രങ്ങളാണ് ഇതില്‍ ഏറ്റവും ശ്രദ്ധേയം. വെള്ള ഷര്‍ട്ടും ബ്ലൂ ജീന്‍സുമണിഞ്ഞ മീന യുവനടിമാരെ പോലും പിന്നിലാക്കുമെന്നാണ് ആരാധകരുടെ പക്ഷം. എന്തായാലും അടുത്ത കാലത്ത് ഇങ്ങനെയൊരു മാറ്റം കൊണ്ട് ഞെട്ടിച്ച മറ്റൊരു നടിയില്ലെന്ന് വേണം പറയാന്‍

1982 മുതല്‍ എട്ടു വര്‍ഷത്തോളം ബാലതാരമായി മലയാളം, തമിഴ്, തെലുങ്ക് ചിത്രങ്ങളില്‍ തിളങ്ങിയിരുന്ന നടി 1990ല്‍ നവയുഗം എന്ന തെലുങ്ക് ചിത്രത്തിലൂടെയാണ് നായികയായി അരങ്ങേറ്റം കുറിക്കുന്നത്. 2009 ലായിരുന്നു മീനയുടെ വിവാഹം. ഐടി ഉദ്യോഗസ്ഥനായ വിദ്യസാഗര്‍ ആയിരുന്നു ഭര്‍ത്താവ്. ഇരുവര്‍ക്കും നൈനിക എന്നൊരു മകളുണ്ട്. വിവാഹത്തോടെ സിനിമയില്‍ നിന്നും ചെറിയ ഇടവേളകള്‍ എടുത്ത നടി 2013 ല്‍ ദൃശ്യം എന്ന സിനിമയിലൂടെ വമ്പന്‍ തിരിച്ച് വരവ് നടത്തി. വീണ്ടും മോഹന്‍ലാലിനൊപ്പം മുന്തിരിവള്ളികള്‍ എന്ന സിനിമയിലെ പ്രകടനം ഏറെ പ്രേക്ഷക പ്രശംസ സ്വന്തമാക്കിയിരുന്നു. അമ്മയുടെ പാത പിന്തുടര്‍ന്ന് മകള്‍ നൈനികയും സിനിമയിലേക്ക് എത്തിയിരുന്നു. ഇളയദളപതി വിജയിയുടെ മകളുടെ വേഷത്തില്‍ തമിഴ് ചിത്രത്തിലൂടെയാണ് നൈനിക വെള്ളിത്തിരയിലെത്തിയത്. രജനീകാന്തിനൊപ്പം തലൈവരുടെ 168ാം ചിത്രത്തില്‍ അഭിനയിച്ചുകൊണ്ടിരിക്കുകയാണ് ഇപ്പോള്‍ നടി.