സമൂഹ മാധ്യമങ്ങളിലൂടെ വ്യാജ പ്രചരണകള്‍ നടത്തുന്നവര്‍ക്കെതിരെ പരാതിയുമായി നടി ജൂഹി രസ്തഗി. ഡി.ജി.പി ലോക്‌നാഥ് ബെഹ്‌റക്കും എറണാകുളം സിറ്റി പൊലീസ് കമീഷണര്‍ക്കും ആണ് പരാതി നല്‍കിയത്. വാസ്തവവിരുദ്ധവും തനിക്കെതിരെ മോശം തരത്തിലുമുള്ള വ്യാജ പ്രചരണങ്ങള്‍ നടക്കുന്നു. വ്യക്തിഹത്യ നടത്തുകയെന്ന ഗൂഢ ലക്ഷ്യത്തോടെ ചില കുബുദ്ധികളാണ് ഇതിന് പിന്നിലെന്ന് ജൂഹി രസ്തഗി ഫേസ്ബുക്കില്‍ കുറിച്ചു.

ഫേസ്ബുക്ക് പോസ്റ്റിന്റെ പൂര്‍ണരൂപം:

കഴിഞ്ഞ കുറച്ചു ദിവസങ്ങളായി സമൂഹ മാധ്യമങ്ങളിലൂടെ വ്യാപകമായി എന്റെ പേരില്‍ തികച്ചും മോശമായ തരത്തിലുള്ള വ്യാജ പ്രചരണകള്‍ നടക്കുന്നതായി ശ്രദ്ധയില്‍പ്പെട്ടു. ഇത്തരം പ്രചരണങ്ങള്‍ എല്ലാം തന്നെ തികച്ചും വാസ്തവവിരുദ്ധവും എന്നെ വ്യക്തിഹത്യ നടത്തുക എന്ന ഗൂഢ ലക്ഷ്യത്തോടെ ചില കുബുദ്ധികള്‍ നടത്തുന്നതുമാണെന്ന് വേദനയോടെ അറിയിച്ചു കൊള്ളട്ടെ.

ശ്രദ്ധയില്‍പ്പെട്ട ഇത്തരം സമൂഹ മാധ്യമ പോസ്റ്റുകള്‍ ചൂണ്ടിക്കാട്ടി കേരള പൊലീസ് ഡയറക്ടര്‍ ജനറല്‍ ലോക് നാഥ് ബെഹ്‌റ ഐ.പി.എസിനും, എറണാകുളം സിറ്റി പൊലീസ് കമീഷണര്‍ക്കും പരാതി നല്‍കി.

ഇവരുടെ നിര്‍ദ്ദേശപ്രകാരം സൈബര്‍ സെല്‍ എന്റെ പരാതി അടിയന്തിരമായി അന്വേഷിക്കുകയാണെന്ന വിവരം അറിയിക്കട്ടെ. പൊലീസിന്റെ സഹായത്താല്‍ കുപ്രചരണങ്ങളുടെ ഉറവിടവും കുറ്റക്കാരെയും ഉടനെ തന്നെ നിയമത്തിന് മുന്നില്‍ കൊണ്ടു വരുവാന്‍ സാധിക്കുമെന്ന് ഞാന്‍ വിശ്വസിക്കുന്നു. എല്ലാവരുടെയും സ്‌നേഹവും പിന്തുണയും എപ്പോഴും ഒപ്പമുണ്ടാകുമെന്ന പ്രതീക്ഷയോടെ..

സസ്‌നേഹം.