കൊവിഡ് 19 നെ തുരത്താന്‍ രാജ്യം ഒറ്റക്കെട്ടായി നില്‍ക്കുകയാണ്. മന്ത്രിമാരും എംപിമാരും മറ്റു ജനപ്രതിനിധികളുമെല്ലാം സാമ്പത്തിക സഹായം പ്രഖ്യാപിച്ചുവരികയാണ്. പല സംസ്ഥാനങ്ങളിലും ജനപ്രതിനിധികളുടെയും സര്‍ക്കാര്‍ ജീവനക്കാരുടെയും ശമ്പളം വെട്ടിക്കുറച്ചു. ഈ സാഹചര്യത്തില്‍ സെലിബ്രിറ്റികളും അവരുടെതായ രീതിയില്‍ സഹായം ചെയ്യുന്നുണ്ട്. ഇപ്പോള്‍ രാജ്യത്തിന് കൈതാങ്ങായി എത്തിയിരിക്കുകയാണ് നടന്‍ അജിത്. കൊവിഡ് പ്രതിരോധ പ്രവര്‍ത്തനങ്ങള്‍ക്കായി 1.25 കോടിയാണ് അജിത് സംഭാവന ചെയ്തത്. പ്രധാനമന്ത്രിയുടെ പിഎം കെയര്‍ ഫണ്ടിലേക്ക് 50 ലക്ഷം രൂപയും, തമിഴ്‌നാട് മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് 50 ലക്ഷം രൂപയും നല്‍കിയ അജിത് സിനിമാ രംഗത്ത് പ്രവര്‍ത്തിക്കുന്ന ദിവസ വേതനക്കാരെ സഹായിക്കാന്‍ സംഭാവന ചെയ്യണമെന്ന് ഫിലിം എംപ്ലോയിസ് ഫെഡറേഷന്‍ ഒഫ് സൗത്ത് ഇന്ത്യ (ഫെഫ്‌സി) ആവശ്യപ്പെട്ടതിനെ തുടര്‍ന്ന് സിനിമ സംഘടനയ്ക്ക് 25 ലക്ഷം രൂപയും നല്‍കി.

എച്ച്.വിനോദിന്റെ സംവിധാനത്തില്‍ ബോണി കപൂര്‍ നിര്‍മ്മിക്കുന്ന വലിമൈയാണ് അജിതിന്റെ ഏറ്റവും പുതിയ ചിത്രം. കൊവിഡിനെ തുടര്‍ന്ന് ഈ ചിത്രത്തിന്റെ ഷൂട്ടിംഗ് താത്കാലികമായി നിറുത്തിവച്ചിരിക്കുകയാണ്. കൊവിഡ് സഹായ ഫണ്ടിലേക്ക് സിനിമാ ലോകത്ത് നിന്നും നിരവധി സഹായങ്ങളാണ് ലഭിച്ചുകൊണ്ടിരിക്കുന്നത്.