മലയാളികളുടെ പ്രിയതാരം ശോഭന നീണ്ട ഇടവേളയ്ക്ക് ശേഷം വീണ്ടും സിനിമയില്‍ സജീവമാകുകയാണ്. എന്‍പതുകളിലും തൊണ്ണൂറുകളിലും സിനിമ അടക്കിവാണ ശോഭന മണിച്ചിത്രത്താഴ്, മിത്ര് മൈ ഫ്രണ്ട് എന്നീ ചിത്രങ്ങളിലൂടെ രണ്ട് ദേശീയ പുരസ്‌കാരങ്ങള്‍ സ്വന്തമാക്കി. സിനിമയോടല്ല നൃത്തത്തോടാണ് ശോഭനയ്ക്ക് ഏറെ പ്രിയം. അതുകൊണ്ടു തന്നെയാണ് തന്റെ ജീവിതം പൂര്‍ണമായും നൃത്തത്തിന് സമര്‍പ്പിച്ച് ശോഭന അഭിനയത്തിന്റെ ലോകത്ത് നിന്ന് മാറിനിന്നത്. 2000ന് ശേഷം ശോഭന അഭിനയം കുറച്ചു. പിന്നീട് വിരലില്‍ എണ്ണാവുന്ന ചിത്രങ്ങളേ ചെയ്തിട്ടുള്ളു ശോഭന. അനൂപ് സത്യന്‍ സംവിധാനം ചെയ്ത വരനെ ആവശ്യമുണ്ട് എന്ന ചിത്രത്തിലാണ് അവസാനമായി വേഷമിട്ടത്. സിനിമയില്‍ സജീവമല്ലെങ്കിലും സാമൂഹിക മാധ്യമങ്ങളിലൂടെ ആരാധകരുമായി നിരന്തരം സംവദിക്കാന്‍ ശോഭന സമയം കണ്ടെത്താറുണ്ട്. തന്റെ കൊച്ചു കൊച്ചു വിശേഷങ്ങളും പങ്കുവക്കാറുണ്ട്.

തന്റെ പ്രിയ സംവിധായകന്‍ ആരാണെന്ന് ഇപ്പോള്‍ വെളിപ്പെടുത്തുകയാണ് ശോഭന. മലയാളത്തിലെ ഏറ്റവും മികച്ച സംവിധായകരില്‍ ഒരാളായ ഭരതനാണ് ആ വ്യക്തി. ഒരു പഴയകാല ചിത്രം പങ്കുവച്ചാണ് ശോഭന തന്റെ ഇഷ്ടം തുറന്ന് പറഞ്ഞത്. അതില്‍ ഭരതനും ശോഭനയ്‌ക്കൊപ്പം നില്‍ക്കുന്നത് അച്ഛനാണ്. എന്റെ ഏറ്റവും പ്രിയപ്പെട്ട സംവിധായകനും അച്ഛനുമൊപ്പം ശോഭന കുറിച്ചു. ചിലമ്ബ് എന്ന സിനിമയുടെ ലൊക്കേഷനില്‍ നിന്നെടുത്ത ചിത്രമാണിത്. 1986ല്‍ പുറത്തിറങ്ങിയ ഭരതന്‍ ചിത്രത്തില്‍ റഹ്മാന്‍, തിലകന്‍, നെടുമുടി വേണു എന്നിവരായിരുന്നു മറ്റു താരങ്ങള്‍.