കോവിഡ് കാലത്ത് പ്രതിസന്ധിയിലായ നിരവധി പേര്‍ക്ക് കൈത്താങ്ങായ താരമാണ് നടന്‍ സോനു സൂദ്. പാവങ്ങളെ സഹായിക്കാനായി മുംബൈയിലുള്ള തന്റെ എട്ട് കെട്ടിടങ്ങള്‍ പണയം വെച്ച് 10 കോടി രൂപ താരം ലോണെടുത്തതായുള്ള റിപ്പോര്‍ട്ടുകളും കഴിഞ്ഞ ദിവസം പുറത്തു വന്നിരുന്നു. സ്‌ക്രീനിലെ വില്ലന്‍ യഥാര്‍ത്ഥ ജീവിതത്തിലെ ഹീറോ എന്നാണ് സോനുവിനെ പ്രേക്ഷകര്‍ വിശേഷിപ്പിക്കുന്നത്.

കോവിഡ് മഹാമാരിയെ തുടര്‍ന്ന് ജോലി നഷ്ടപ്പെട്ടവര്‍ക്ക് ഇറിക്ഷകള്‍ സമ്മാനിക്കാനൊരുങ്ങുകയാണ് താരം. അവശ്യ സാധനങ്ങള്‍ വിതരണം ചെയ്യുന്നതിനേക്കാള്‍ പ്രധാനമാണ് തൊഴിലവസരങ്ങള്‍ നല്‍കുന്നത് എന്ന് താന്‍ കരുതുന്നു എന്നാണ് സോനു പറയുന്നത്.
ഈ പ്രവര്‍ത്തിയിലൂടെ അവര്‍ക്ക് സ്വന്തം കാലില്‍ നില്‍ക്കാന്‍ കഴിയുമെന്ന് തനിക്ക് ഉറപ്പുണ്ടെന്നും സോനു സോഷ്യല്‍ മീഡിയയിലൂടെ വ്യക്തമാക്കി. മഹാമാരിക്കിടയില്‍ ബുദ്ധിമുട്ടിയ നിരവധിപേരെയാണ് സോനു സഹായിച്ചത്. 45000ല്‍ കൂടുതല്‍ ആളുകള്‍ക്ക് താരം ദിവസവും ഭക്ഷണം നല്‍കിയിരുന്നു.
മഹാരാഷ്ട്രയില്‍ കുടങ്ങിയ ഇതര സംസ്ഥാന തൊഴിലാളികളെ ഉത്തര്‍പ്രദശേ്, ബിഹാര്‍, ജാര്‍ഖണ്ഡ്, ഒഡിഷ, മഹാരാഷ്ട എന്നീ സംസ്ഥാനങ്ങളിലേക്ക് പത്തിലധികം ബസുകള്‍ ഏര്‍പ്പാടാക്കി എത്തിച്ചിരുന്നു. കേരളത്തില്‍ കുടുങ്ങിയ 177 പെണ്‍കുട്ടികളെ സ്വദേശമായ ഭുവനേശ്വറില്‍ എത്തിക്കാനായി പ്രത്യേക വിമാനം ഒരുക്കിയിരുന്നു.
1500 പിപിഇ കിറ്റുകള്‍ പഞ്ചാബില്‍ വിതരണം ചെയ്യുകയും മുംബൈയിലെ ഹോട്ടല്‍ ക്വാറന്റൈന്‍ സൗകര്യത്തിനായി വിട്ടു നല്‍കുകയും ചെയ്തിരുന്നു. കോവിഡ് കാലത്തെ സന്നദ്ധ പ്രവര്‍ത്തനങ്ങളിലൂടെ നിരവധി അംഗീകരങ്ങളും താരത്തെ തേടിയെത്തി. സോനു സൂദിന്റെ പ്രവര്‍ത്തനത്തിന് എസ്ഡിജി സ്‌പെഷ്യല്‍ ഹ്യുമനറ്റേറിയന്‍ ആക്ഷന്‍ അവാര്‍ഡ് നല്‍കിയാണ് യുണൈറ്റഡ് നേഷന്‍ ആദരിച്ചത്.