സ്വന്തം വീടുകളിൽ സ്ത്രീകൾ നേരിടുന്ന ഗാർഹിക പീഡനങ്ങളെക്കുറിച്ച് ലോകമെങ്ങും വലിയ ചർച്ചകൾ നടക്കാറുണ്ടെങ്കിലും, പുരുഷന്മാർ അനുഭവിക്കുന്ന സമാനമായ അതിക്രമങ്ങൾ പലപ്പോഴും നിശബ്ദമാക്കപ്പെടാറാണ് പതിവ്. എന്നാൽ, ഭാര്യയിൽ നിന്ന് നിരന്തരമായ ശാരീരിക പീഡനം ഏറ്റുവാങ്ങുന്ന ഒരു യുവാവിന്റെ വീഡിയോ സമൂഹ മാധ്യമങ്ങളിൽ പ്രചരിച്ചതോടെ ഈ വിഷയം വീണ്ടും സജീവ ചർച്ചയായിരിക്കുകയാണ്. രണ്ട് വർഷം നീണ്ട പീഡനങ്ങൾക്കൊടുവിൽ യുവാവ് ലാപ്ടോപ്പിൽ രഹസ്യമായി റെക്കോർഡ് ചെയ്ത ദൃശ്യങ്ങളാണ് ഇപ്പോൾ പുറത്തുവന്നിരിക്കുന്നത്.

വിശാൽ എന്ന എക്സ് (ട്വിറ്റർ) ഹാൻഡിലിലൂടെ പങ്കുവെക്കപ്പെട്ട വീഡിയോയിൽ, ഭാര്യ യുവാവിനെ അതിക്രൂരമായി മർദ്ദിക്കുന്നത് വ്യക്തമാണ്. ഷർട്ടിന് കുത്തിപ്പിടിച്ച് വലിക്കുന്നതും തലമുടിയിൽ പിടിച്ചു വലിച്ച് മർദ്ദിക്കുന്നതും ദൃശ്യങ്ങളിൽ കാണാം. മിക്കവാറും സമയങ്ങളിൽ യാതൊരു പ്രകോപനവുമില്ലാതെ ഭാര്യ യുവാവിനെ തലയ്ക്കും മറ്റും അടിക്കുന്നുണ്ട്. മർദ്ദനം സഹിക്കവയ്യാതെ യുവാവ് ഇടയ്ക്ക് പ്രതിരോധിക്കാൻ ശ്രമിക്കുന്നുണ്ടെങ്കിലും വീഡിയോയിലുടനീളം ഇയാൾ മർദ്ദനം ഏറ്റുവാങ്ങുന്ന കാഴ്ചയാണ് കാണാൻ കഴിയുന്നത്. 'വിവാഹത്തിന് മുൻപ് രണ്ടുതവണ ആലോചിക്കുക' എന്ന കുറിപ്പോടെയാണ് ഈ വീഡിയോ പങ്കുവെച്ചിരിക്കുന്നത്.

വീഡിയോ വൈറലായതോടെ പുരുഷന്മാരുടെ സുരക്ഷയെയും അവർ നേരിടുന്ന ഗാർഹിക പീഡനങ്ങളെയും കുറിച്ച് വലിയ രീതിയിലുള്ള സംവാദങ്ങളാണ് സൈബർ ഇടങ്ങളിൽ നടക്കുന്നത്. യുവാവിനോട് ഉടൻ തന്നെ പോലീസിൽ പരാതി നൽകാനും വിവാഹമോചനത്തിന് തയ്യാറെടുക്കാനും നിരവധി പേർ ഉപദേശിച്ചു. നിയമവ്യവസ്ഥകൾ പലപ്പോഴും സ്ത്രീകൾക്ക് അനുകൂലമാണെന്നും, പീഡനം അനുഭവിക്കുന്ന പുരുഷന്മാരെ സംരക്ഷിക്കാൻ കൃത്യമായ നിയമങ്ങളില്ലെന്നും ചിലർ ചൂണ്ടിക്കാട്ടി. ലിംഗഭേദമന്യേ ഏതൊരു വ്യക്തിയും സ്വന്തം വീട്ടിൽ സുരക്ഷിതനായിരിക്കണമെന്നും അക്രമങ്ങൾ ആരുടെ ഭാഗത്തുനിന്നുണ്ടായാലും അത് ചോദ്യം ചെയ്യപ്പെടണമെന്നുമുള്ള അഭിപ്രായമാണ് ഭൂരിഭാഗം പേരും പങ്കുവെച്ചത്.