മോഹന്ലാലിന് കവിയൂര് പൊന്നമ്മയുടെ പൊന്നുമ്മ
മോഹന്ലാലിനെ കാണുമ്പോള് കവിയൂര് പൊന്നമ്മ ഒരു ഉമ്മ കൊടുക്കും. ലാല് തിരിച്ചും. അത് എവിടെവച്ചായായാലും, ആരുടെയൊക്കെ മുന്നില് വച്ചായാലും. ലാലിന് ഉമ്മ കൊടുക്കുക അമ്മ എന്ന നിലയില് തന്റെ അവകാശമാണെന്ന് കവിയൂര് പൊന്നമ്മ പറയും.
തങ്ങളെ അമ്മയും മകനുമായിട്ട് കാണാനാണ് പ്രേക്ഷകര്ക്കും ഇഷ്ടം. ശരീരപ്രകൃതികൊണ്ടുപോലും അമ്മയും മകനുമായിരുന്നു. അമ്പതിലേറെ ചിത്രങ്ങളില് ലാലിന്റെ അമ്മയായി കവിയൂര് പൊന്നമ്മ അഭിനയിച്ചു. കോമ്പിനേഷന് ഏറ്റവും കൂടുതലായി അംഗീകരിക്കപ്പെട്ടത് കിരീടം മുതല്ക്കാണ്.
കിരീടത്തിലൊരു രംഗമുണ്ട്. അമ്മയുടെ മടിയില് കിടക്കുന്ന മകന്. അമ്മ കൈകള് കൊണ്ട് മകന്റെ മുടിയിഴകളെ മൃദുവായി തഴുകുകയാണ്. ഇപ്പോഴും ആളുകള് പറയാറുണ്ട് ആ രംഗത്തെക്കുറിച്ച്. നമ്മുടെ ജീവിതത്തില് എവിടെയോ കണ്ടുമറന്ന അല്ലെങ്കില് അവര് തന്നെ അനുഭവിച്ചറിഞ്ഞ മാതൃത്വത്തിന്റെയും പുത്രവാത്സല്യത്തിന്റെയും നിറക്കാഴ്ചയായിരുന്നു അത്.
ഉത്സവപ്പിറ്റേന്ന് എന്ന ചിത്രത്തിലും ഇരുവരും ഒരുമിച്ചഭിനയിച്ചിട്ടുണ്ട്. അമ്മയും മകനുമായിട്ടല്ല. പൊന്നമ്മയ്ക്ക് ഒരു വീട്ടുജോലിക്കാരിയുടെ വേഷമാണ്. അതിലെ ഒരു സീനില് ലാല് പൊന്നമ്മയോട് പറയുന്നുണ്ട്. ഞാന് അമ്മേ എന്നൊന്ന് വിളിച്ചോട്ടെ എന്ന്. കേവലം അഭിനയമാണെന്നറിയാം. എങ്കിലും ആ വാക്കുകള് തന്റെ ഹൃദയത്തിലാണ് തൊട്ടതെന്ന് പൊന്നമ്മ പറഞ്ഞു.
അവിടം മുതല്ക്കായിരിക്കും ലാല് എനിക്ക് ജീവിതത്തിലും മകനായി തുടങ്ങിയതെന്നും കവിയൂര് പൊന്നമ്മ പറഞ്ഞു. താന് മോഹന്ലാലിനെ ഇന്നേവരെ പേര് വിളിച്ചിട്ടില്ലെന്നും . കുട്ടാ എന്നാണ് അഭിസംബോധന ചെയ്യുന്നത്. ലാല് ചേച്ചി എന്നേ വിളിച്ചിട്ടുള്ളൂ. പരിചയപ്പെട്ട കാലം മുതല് അങ്ങനെ വിളിച്ചു ശീലിച്ചതു കൊണ്ടാകാമെന്നും കവിയൂര് പൊന്നമ്മ പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha