എന്താണ് ലൈംഗിക അതിക്രമം... സിനിമ പ്രവര്ത്തകരില് ബഹുഭൂരിപക്ഷവും ഈ വിഷയത്തില് ബോധവാന്മാരല്ലെന്ന് റിമ കല്ലിങ്കല്
മലയാള സിനിമയില് തന്റേതായ സ്ഥാനം നേടിയെടുത്ത താരമാണ് റിമ കല്ലിങ്കല്. സനിമാ മേഖലയിലും സമൂഹത്തിലും തന്റേതായ അഭിപ്രായം ധൈര്യപൂര്വ്വം പറയുന്ന വ്യക്തിയാണ് റിമ. 'മലയാള സിനിമയില് ഇന്റേണല് കമ്മിറ്റി നിര്വഹണം' എന്ന വിഷയത്തില് ഐഎഫ്എഫ്കെ കൊച്ചി പ്രാദേശിക ചലച്ചിത്ര മേളയില് സംഘടിപ്പിച്ച ഓപ്പണ് ഫോറത്തില് സ്ത്രീകള്ക്കെതിരെ നടക്കുന്ന ലൈംഗിക അതിക്രമത്തെ കുറിച്ച് താരം സംസാരിച്ചു.
സ്ത്രീകളുള്പ്പെടെ സിനിമ മേഖലയിലുള്ളവര് എന്താണ് ലൈംഗിക അതിക്രമമെന്നു ബോധവാന്മാരാകണമെന്ന് പ്രോഗ്രാമില് പങ്കെടുത്ത ചലച്ചിത്രതാരം റിമ കല്ലിങ്കല് പറഞ്ഞു. സിനിമ പ്രവര്ത്തകരില് ബഹുഭൂരിപക്ഷവും ഈ വിഷയത്തില് ബോധവാന്മാരല്ല. വിവിധ സിനിമ സംഘടനകള് ഈ പ്രശ്നം പരിഹരിക്കുവാന് മുന്കൈയെടുക്കണമെന്നും റിമ പറഞ്ഞു.
സിനിമയില് സ്ത്രീകള് നേരിടുന്ന പ്രശ്നങ്ങള്ക്ക് പറയാനും പരിഹരിക്കാനും വേണ്ടി ഡബ്ലൂ.സി.സി എന്ന സംഘടനയ്ക്ക് തുടക്കം കുറിച്ചവരില് ഒരാളാണ് റിമ കല്ലിങ്കല്. നായികനടിയായി മാത്രമല്ല കിട്ടുന്ന റോളുകളില് എല്ലാം തിളങ്ങാന് റിമ കല്ലിങ്കലിന് സാധിച്ചിട്ടുണ്ട്. അഭിനയം കൂടാതെ താരം ഏറെ ഇഷ്ടപ്പെടുന്ന ഡാന്സിലും കഴിവുകള് തെളിയിച്ചിട്ടുള്ള റിമ സ്വന്തമായി കൊച്ചിയില് ഒരു ഡാന്സ് സ്കൂളും നടത്തുന്നുണ്ട്. മാമാങ്കം എന്നാണ് ആ സ്കൂളിന്റെ പേര്. അതുപോലെ സിനിമയില് നിര്മ്മാതാവായും ഇപ്പോള് നിറഞ്ഞ് നില്ക്കുന്ന ഒരാളാണ് റിമ.
മലയാള സിനിമ മേഖലയില് അടിയന്തരമായി ഇന്റേണല് കമ്മിറ്റി രൂപീകരണം അനിവാര്യമാണെന്ന് ചലച്ചിത്ര അക്കാദമി വൈസ് ചെയര്മാന് പ്രേംകുമാര് പറഞ്ഞു. ഓപ്പണ് ഫോറത്തില് പങ്കെടുത്ത് സംസാരിക്കവെയാണ് അദ്ദേഹം ഇക്കാര്യം പറഞ്ഞത്.
ഇന്റേണല് കമ്മിറ്റി രൂപീകരണത്തിന്ചലച്ചിത്ര അക്കാദമിയുടെയും സര്ക്കാരിന്റെയും പൂര്ണ്ണ പിന്തുണയുണ്ട്.
സ്ത്രീക്കും പുരുഷനും തുല്യവും നീതി പൂര്ണ്ണവുമായ തൊഴിലിടം ഭരണഘടന ഉറപ്പുനല്കുന്നതാണെന്നും ഇത് പ്രാവര്ത്തികമാകാത്തത് നിര്ഭാഗ്യകരമാണെന്നും അദ്ദേഹം പറഞ്ഞു. അഭിഭാഷകയും സാമൂഹ്യപ്രവര്ത്തകയുമായ അഡ്വ. മായ കൃഷ്ണന് ഇന്റേണല് കമ്മിറ്റിയുടെ സാങ്കേതിക വശങ്ങള് വിശദീകരിച്ചു.
കമ്മിറ്റി രൂപീകരണത്തിന് പ്രൊഡ്യൂസഴ്സ് അസോസിയേഷന്റെ പൂര്ണ്ണ പിന്തുണയുണ്ടെന്നും എന്നാല് ഇതുമായി ബന്ധപെട്ടു നിലനില്ക്കുന്ന സംശയങ്ങള് ദൂരീകരിക്കണമെന്നും നിര്മാതാവ് അനില് തോമസ് ആവശ്യപ്പെട്ടു. സാമൂഹ്യ പ്രവര്ത്തക രേഖാ രാജ്, നിര്മാതാവ് വിഷ്ണു വേണു, ചലച്ചിത്ര പ്രവര്ത്തകന് സന്തോഷ് കീഴാറ്റൂര് എന്നിവരും പങ്കെടുത്ത് സംസാരിച്ചു.
https://www.facebook.com/Malayalivartha
